மாவட்ட செயலர் வயது வரம்பு 70.. இனி தேர்தல் இருக்கு.. திமுக செயற்குழுவில் 9 தீர்மானங்கள் நிறைவேற்றம்!
சென்னை: திமுகவில் 2 தொகுதிகளுக்கு ஒரு மாவட்டச் செயலாளர் என்ற வகையில், மாவட்டச் செயலாளர்களின் எண்ணிக்கையை 110ஆக உயர்த்த திமுக செயற்குழு கூட்டத்தில் தீர்மானம் நிறைவேற்றப்பட்டுள்ளது. அதேபோல் திமுகவில் பதவிகளுக்கு ஏற்ப உச்சப்பட்ட வயது வரம்பு நிர்ணயிக்கப்பட்டும் தீர்மானம் நிறைவேற்றப்பட்டிருக்கிறது. இதுதொடர்பாக விரிவாக பார்க்கலாம்.
திமுகவின் செயற்குழு கூட்டம் அண்ணா அறிவாலயத்தில் நடைபெற்று வருகிறது. இந்த செயற்குழு கூட்டத்தில் திமுகவின் மறுசீரமைப்பு நடவடிக்கைகள் தொடர்பாக பல்வேறு தீர்மானங்கள் நிறைவேற்றப்பட்டுள்ளன. அதன் அடிப்படையில், திமுகவில் கிளைச் செயலாளர் முதல் மாவட்டச் செயலர்கள் வரை அத்தனை பதவிகளிலும் ஒருவர் 2 முறை மட்டுமே பொறுப்பில் இருக்க முடியும் என்று தீர்மானம் நிறைவேற்றப்பட்டுள்ளது. திமுக செயற்குழு மொத்தமாக 9 தீர்மானங்கள் நிறைவேற்றப்பட்டுள்ளது. அதுதொடர்பாக பார்க்கலாம்.
1. கட்சியின் கட்டமைப்பில் புது ரத்தம் பாய்ச்சிட, கிளைக்கழகச் செயலாளருக்கான அதிகபட்ச வயது 45 என்றும், கிளைக்கழகச் செயலாளராகத் தேர்ந்தெடுக்கப்படும் ஒருவர் அதிகபட்சம் இரண்டு முறை மட்டுமே அப்பொறுப்பை வகிக்க முடியும்.
2. சென்னை, கோவை, மதுரை, திருச்சி, சேலம் ஆகிய மாநகரகங்களிலும், சூழலுக்கு ஏற்ப பிற மாநகராட்சிகளிலும் வட்டக்கழகங்களை வலிமைப்படுத்திட கிளைக்கழகம் அமைக்கப்படுகிறது. 45 வயதுக்கு மிகாதவர் கிளைச்செயலாளராக தேர்ந்தெடுக்கப்பட வேண்டும். ஒருவர் அதிகபட்சம் இரண்டு முறை மட்டுமே இப்பொறுப்பை வகிக்க முடியும்.
3. சென்னை மாநகராட்சியின் வட்டக்கழகங்கள் சராசரியாக 10 ஆயிரம் வாக்காளர்களைக் கொண்டதாகவும், பிற மாநகராட்சிகளில் சராசரியாக 5 ஆயிரம் வாக்காளர்களைக் கொண்டதாகவும் அமையும். மாநகர-நகர-பேரூர் வட்டக்கழகச் செயலாளர்களின் அதிகபட்ச வயது 50 என நிர்ணயிக்கப்படுகிறது. ஒருவர் அதிகபட்சம் இரண்டு முறை மட்டுமே அப்பொறுப்பை வகிக்க முடியும்.
4. பேரூர் கழகச் செயலாளரின் அதிகபட்ச வயது 60 எனவும், அதிகபட்சம் இரண்டு முறை மட்டுமே பொறுப்பை வகிக்க முடியும் என தீர்மானிக்கப்படுகிறது.
5. சென்னை மாநகராட்சியில் பகுதிக்கழகங்கள் சராசரியாக 40 ஆயிரம் வாக்காளர்களைக் கொண்டதாகவும், பிற மாநகராட்சிகளில் பகுதிக்கழகங்கள் சராசரியாக 30 ஆயிரம் வாக்காளர்களைக் கொண்டதாகவும் அமையும். பகுதிக் கழகச் செயலாளர்களின் அதிகபட்ச வயது 60 என நிர்ணயிக்கப்படுகிறது. ஒருவர் அதிகபட்சம் இரண்டு முறை மட்டுமே அப்பொறுப்பை வகிக்க முடியும்.
6. நகரக் கழகங்கள் சராசரியாக 40 ஆயிரம் வாக்குகளைக் கொண்டிருக்கும். நகரக் கழகச் செயலாளரின் அதிகபட்ச வயது 60 எனவும், ஒருவர் அதிகபட்சம் இரண்டு முறை மட்டுமே அப்பொறுப்பை வகிக்க முடியும் என தீர்மானிக்கப்படுகிறது.
7. சராசரியாக 30 ஆயிரம் வாக்காளர்களுக்கு ஒரு ஒன்றியக் கழகம் உருவாக்கப்பட வேண்டும். ஒன்றியக் கழகச் செயலாளரின் அதிகபட்ச வயது 60 என நிர்ணயிக்கப்படுகிறது. ஒருவர் அதிகபட்சம் இரண்டு முறை மட்டுமே அப்பொறுப்பை வகிக்க முடியும்.
8. வருவாய் மாவட்டங்களின் அடிப்படையில் இரண்டு சட்டமன்றத் தொகுதிகளுக்கு ஒரு கழக மாவட்டம் என்ற வகையில் மறுசீரமைப்பு மேற்கொள்ளப்படுகிறது. பிரிக்கும் போது ஒரு தொகுதி மட்டும் எஞ்சியிருப்பின் அதே வருவாய் மாவட்டத்தில் பொருத்தமான கழக மாவட்டத்துடன் மூன்றாவது தொகுதியாக இணைக்கப்படும். மாவட்டக் கழகச் செயலாளரின் அதிகபட்ச வயது 70 என நிர்ணயிக்கப்படுகிறது. ஒருவர் அதிகபட்சம் இரண்டு முறை மட்டுமே அப்பொறுப்பை வகிக்க முடியும். இனி மாநகரச் செயலாளர் என்ற பொறுப்பு இருக்காது.
9. 110 மாவட்டங்களை அறிவித்தவுடன், மாவட்ட செயற்குழு கூட்டங்கள் நடத்தப்பட்டு வழிகாட்டு நெறிமுறைகளின்படி 15 நாட்களுக்குள் ஒன்றியம்-நகரம்-பகுதி-வட்டக்கழகங்கள் பிரிக்கப்பட வேண்டும். தலைமைக்கழகத்தால் அனுப்பி வைக்கப்படும் பிரதிநிதி முன்னிலையில் மீண்டும் மாவட்ட செயற்குழு கூட்டம் கூட்டப்பட்டு, பிரிக்கப்பட்ட அமைப்புகளுக்கு ஒப்புதல் பெறப்பட்டு தலைமைக்கழகத்துக்கு அனுப்பி வைக்க வேண்டும்.
மக்கள் தொகைக்கு ஏற்ப திமுகவில் பதவி கொண்டு வரப்படுவது இதுவே முதல்முறையாகும். வாக்காளர் எண்ணிக்கைக்கு ஏற்ப அமைப்புகளை உருவாக்குவது புதிய நடைமுறையாகவும் இருக்கிறது. தமிழக அரசியல் வரலாற்றில் எந்த கட்சியும் மக்கள் தொகைக்கு ஏற்ப அமைப்புகளை உருவாக்கியது கிடையாது.
அதேபோல் மாவட்டச் செயலர்களுக்கு வயது வரம்பு 70ஆக நிர்ணயிக்கப்பட்டுள்ளதால், தற்போதைய முக்கிய முகங்கள் பலரும் பதவியை இழக்க வாய்ப்பு நேரிட்டுள்ளது. தற்போது மாவட்டச் செயலாளராக இருக்கும் 78 பேரில், 13 பேர் 70 வயதை கடந்தவர்கள். எவ வேலு, கேகேஎஸ்எஸ்ஆர் ராமச்சந்திரன், செஞ்சி மஸ்தான், முத்துசாமி, எஸ்ஆர் சிவலிங்கம், தளபதி, அனிதா ராதாகிருஷ்ணன், ரகுபதி உள்ளிட்ட பலருக்கும் பதவி பறிபோகும் சூழல் ஏற்பட்டுள்ளதாக பார்க்கப்படுகிறது.
Click it and Unblock the Notifications
Sign in with Google
