திமுகவின் இளம் வேட்பாளர்.. அவினாசி தொகுதியில் 26 வயது மருத்துவருக்கு வாய்ப்பு கொடுத்த ஸ்டாலின்!
சென்னை: திமுகவில் மிகவும் இளம் வேட்பாளராக 26 வயதான மருத்துவர் கோகிலாமணி அவினாசி தொகுதியில் போட்டியிடுகிறார். அவினாசி தொகுதி அதிமுக தரப்பில் பாஜகவுக்கு ஒதுக்கப்பட்டுள்ள சூழலில், அங்கு மத்திய இணையமைச்சர் எல்.முருகன் களமிறங்க உள்ளதாக சொல்லப்படுகிறது. மத்திய இணையமைச்சரை எதிர்த்து திமுகவில் மிகவும் இளம் வேட்பாளர் களமிறக்கப்படுவது விவாதமாகி இருக்கிறது.
சட்டசபைத் தேர்தலுக்கான திமுக வேட்பாளர்கள் பட்டியலை முதல்வர் ஸ்டாலின் அறிவித்துள்ளார். மொத்தமாக 164 தொகுதிகளில் திமுக வேட்பாளர்கள் நேரடியாகவும், 11 கூட்டணி கட்சிகள் உதயசூரியன் சின்னத்திலும் போட்டியிடுகின்றன. அதேபோல் திமுக வேட்பாளர்களில் 18 பெண்களுக்கு வாய்ப்பு வழங்கப்பட்டுள்ளது.
அதேபோல் கடினமான தொகுதிகளில் திமுக நேரடியாக களமிறங்கி இருக்கிறது. அதுமட்டுமல்லாமல் கரூரில் முடிசூடா மன்னனாக இருந்து வரும் செந்தில் பாலாஜி, இம்முறை கோவை தெற்கு தொகுதிக்கு மாறி இருக்கிறார். கடந்த முறை கோவையில் ஒரு தொகுதியில் கூட திமுக வெல்லவில்லை. இதனால் இம்முறை கோவையில் 4 முதல் 6 தொகுதிகளையாவது கைப்பற்ற வேண்டும் என்பதில் தீவிரமாக இருக்கிறார்.
இதனிடையே திமுக வேட்பாளர்கள் பட்டியலில் ஒரு வியப்பூட்டும் சம்பவம் அமைந்துள்ளது. அதாவது திமுக வேட்பாளர்கள் பட்டியலில் மிகவும் இளம் வேட்பாளர் என்ற பெருமை கோகிலா மணி என்ற பெண்ணிற்கு கிடைத்துள்ளது. 26 வயதான மருத்துவரான கோகிலா மணி திமுக சார்பாக அவினாசி தொகுதியில் போட்டியிட இருக்கிறார்.
அதிமுக கூட்டணியில் அவினாசி தொகுதி பாஜகவுக்கு ஒதுக்கப்பட்டுள்ளது. பாஜக சார்பாக இம்முறை மத்திய இணையமைச்சர் எல்.முருகன் போட்டியிட உள்ளதாக தெரிகிறது. அவினாசி தொகுதியில் அதிமுக பலமாக இருந்து வரும் சூழலில், இளம் வேட்பாளரை திமுக களமிறக்கி இருப்பது விவாதப் பொருளாக மாறியுள்ளது.
இதுதொடர்பாக கோகிலா மணி பேசுகையில், அவினாசி தொகுதியில் போட்டியிட என்னை தேர்வு செய்த முதல்வர் ஸ்டாலின், உதயநிதி ஸ்டாலின், ஆ.ராசா, மேற்கு மண்டல பொறுப்பாளர் செந்தில் பாலாஜி, திருப்பூர் வடக்கு மாவட்ட செயலாளர் தினேஷ் குமார் ஆகியோருக்கு எனது நன்றியை தெரிவித்துக் கொள்கிறேன் என்று கூறியுள்ளார்.
Click it and Unblock the Notifications
Sign in with Google