திமுக எம்பியின் சகோதரர்.. நடிகர் ஆர்.என்.ஆர்.மனோகர் மாரடைப்பால் மரணம்- விஸ்வாசம், கைதியில் நடித்தவர்

சென்னை: திமுக மாநிலங்களவை உறுப்பினர் என்.ஆர்.இளங்கோவின் சகோதரர் நடிகர் ஆர்.என்.ஆர்.மனோகர் (வயது 61) மாரடைப்பால் இன்று காலமானார்.

மாசிலாமணி, வேதாளம், கைதி உள்ளிட்ட பல்வேறு படங்களில் வில்லனாகவும், குணசித்திர கதாபாத்திரத்திலும் நடித்து பிரபலம் அடைந்தவர் நடிகர் ஆர்.என்.ஆர்.மனோகர். 1993ஆம் ஆண்டு வெளியான 'பேண்டு மாஸ்டர்' படத்தின் மூலம்தான் இவர் தமிழ் திரையுலகிற்கு அறிமுகம் ஆனார்.

அந்த படத்தில் இவர் துணை இயக்குனராக இயக்குநர் கே.எஸ்.ரவிகுமாரிடம் பணியாற்றி இருந்தார்.

பல்வேறு படங்கள்

அதன்பின் பல்வேறு படங்களில் இவர் உதவி இயக்குனராகவும், திரைக்கதை உதவியாளராகவும் பணியாற்றி இருக்கிறார். ஐ.வி.சசி இயக்கத்தில் வெளியாகி ஹிட் அடித்த 'கோலங்கள் படத்தில் இவர் வசனம் எழுதி இருக்கிறார். அந்த படத்தில்தான் முதல் முறையாக திரையிலும் தோன்றி சிறிய வேடம் ஒன்றையும் ஏற்று இருந்தார்.

முதல் வாய்ப்பு

பின்னர் பல்வேறு படங்களில் வெவ்வேறு வாய்ப்புகளை பெற்றவர் அவ்வப்போது காமெடி ரோலிலும் நடித்துள்ளார். பல்வேறு காமெடி காட்சிகளில் இவர் விவேக், வடிவேலு ஆகியோருடன் தோன்றி உள்ளார். சமீபத்தில் இவர், வேதாளம், கைதி, காப்பான், விசுவாசம் போன்ற படங்களில் இவர் நடித்து கவனம் பெற்றார். குணசித்திர நடிப்பிலும், வில்லன் கதாபாத்திரங்களிலும் இவர் கவனம் ஈர்த்தார்.

ஆர்.என்.ஆர்.மனோகர்

இந்த நிலையில் சென்னையில் நடிகர் ஆர்.என்.ஆர்.மனோகர் மாரடைப்பால் இன்று காலமானார். சென்னையில் இவர் வீட்டில் இருக்கும் போது திடீரென மாரடைப்பு ஏற்பட்டுள்ளது. இதையடுத்து அவசரமாக மருத்துவமனைக்கு அழைத்து செல்லப்பட்டவருக்கு சிகிச்சை அளிக்கப்பட்டது.

மரணம்

தீவிர சிகிச்சை பலன் அளிக்காத நிலையில் ஆர்.என்.ஆர்.மனோகர் காலமானார். திமுக மாநிலங்களவை உறுப்பினர் என்.ஆர்.இளங்கோவின் சகோதரர் இவர் என்பது குறிப்பிடத்தக்கது. ஆர்.என்.ஆர்.மனோகரின் மகன் ரஞ்சன் கடந்த 2012 ஆகஸ்ட் 16 அன்று சென்னையில் பிரபல தனியார் பள்ளியில் நீச்சல்குளத்தில் மூழ்கி பலியானது குறிப்பிடத்தக்கது.

English summary

DMK MP Elangovan brother Actor Manohar died of Cardiac arrest today.