“தேசத்திற்கே அவமானம்.. நடவடிக்கை எடுங்க” பாஜக எம்பியின் பேச்சுக்கு திமுக எம்பி கனிமொழி கடும் கண்டனம்

சென்னை: நாடாளுமன்ற சிறப்பு கூட்டத்தொடரில் பகுஜன் சமாஜ் கட்சியை சேர்ந்த இஸ்லாமிய எம்பி டேனிஷ் அலியை பாஜக எம்பி ரமேஷ் பிதுரி விமர்சித்திருந்து பெரும் சர்ச்சையாக உருவெடுத்துள்ளது. இந்நிலையில் இது குறித்து திமுக எம்பி கனிமொழி பாஜகவுக்கு கண்டனம் தெரிவித்துள்ளார்.

நிலவின் தென் துருவத்தில் இஸ்ரோவின் சந்திரயான் 3 விக்ரம் லேண்டர் மற்றும் பிரக்யான் ரோவர் வெற்றிகரமாக தரையிறங்கி வரலாற்று சாதனை படைத்துள்ளது. இந்த வெற்றியையடுத்து பல்வேறு தரப்பினரும் இஸ்ரோ விஞ்ஞானிகளை பாராட்டி வருகின்றனர். இந்நிலையில், நேற்று நாடாளுமன்றத்தில் இஸ்ரோ விஞ்ஞானிகளுக்கு பாராட்டு தெரிவித்து மக்களவையில் விவாதம் நடைபெற்றது. அப்போது பாஜக எம்பி ரமேஷ் பிதுரி, பகுஜன் சமாஜ் கட்சியின் நாடாளுமன்ற உறுப்பினர் டேனிஷ் அலிக்கு எதிராக கூறிய கருத்துக்கள் கடுமையான சலசலப்புகளை ஏற்படுத்தியுள்ளது.

ரமேஷ் பிதுரி, இஸ்லாமிய எம்பியான டேனிஷ் அலியை பார்த்து, "ஏய் போராளி, ஏய் முஸ்லீம் பயங்கரவாதி" என்று கத்தி கூச்சலிட்டு அவரை விமர்சித்துள்ளார். வெறுப்பு பேச்சுக்களுக்கு எதிராக உச்சநீதிமன்றம் கடுமையான கண்டனங்களை தெரிவித்து வரும் நிலையில், நாடாளுமன்றத்தில் பாஜக எம்பி ஒருவர் இப்படி பேசியிருப்பது அதிர்ச்சியை ஏற்படுத்தியுள்ளதாக எதிர்க்கட்சிகள் விமர்சித்துள்ளன.

இது குறித்து காங்கிரஸ் மூத்த தலைவர் ஜெய்ராம் ரமேஷ் கூறுகையில், "பாஜக எம்பி பிதுரி பாராளுமன்றத்தை மட்டுமல்ல, ஒவ்வொரு இந்தியனையும் அவமதிக்கும் மொழியில் பேசியுள்ளார். பாஜக ஏன் அவரை இடைநீக்கம் செய்யாமல் இன்னும் பாதுகாத்து வருகிறது?" என்று கேள்வியெழுப்பியுள்ளார். இந்த விவகாரம் குறித்து லோக்சபா ஆளுங்கட்சித் துணைத் தலைவரும், பாதுகாப்பு அமைச்சருமான ராஜ்நாத் சிங் வருத்தம் தெரிவித்துள்ளார்.

அதேபோல மார்க்சிஸ்ட் கம்யூனிஸ்ட் கட்சியின் மதுரை எம்பி சு.வெங்கடேசனும் இதற்கு கடுமையான விமர்சனங்களை முன்வைத்துள்ளார். அதாவது, "அறிவியலுக்கு எதிரான பழமைவாத பித்துப்பிடித்த ஒரு கூட்டத்திடம் இந்த தேசம் எப்படி சிக்கிக்கிடக்கிறது என்பதன் சான்றுகள்தான் நேற்று BJP
எம்பிக்கள் பேசிய காணொலிகள்.

இதன் உச்சமாக எதிர் கட்சி MP களை தீவிரவாதிகள் என்றும் மாமாக்காரர்கள் என்றும் இன்னும் மோசமான பல வார்த்தைகளைக் கொண்டும் தாக்கினார்கள். அறிவியல் பார்வை, சந்திரயான் வெற்றி, இந்தியா கூட்டணி, அவையின் மாண்பு அனைத்தும் ஒரு சேர ஆளுங்கட்சியால் தாக்கப்பட்ட நாள் நேற்று" என்று தனது x சோஷியல் மீடியாவில் விமர்சித்துள்ளார்.

தொடர் விமர்சனங்களையடுத்து பாஜக தலைவர் ஜே பி நட்டா உத்தரவின் பேரில் எம்பி ரமேஷ் பிதூரிக்கு கட்சி தலைமை விளக்கம் கேட்டு நோட்டீஸ் அனுப்பியுள்ளது. இந்நிலையில், திமுக எம்பி கனிமொழி இந்த விவகாரம் குறித்து கண்டனம் தெரிவித்துள்ளார். இது தொடர்பான X சோஷியல் மீடியா பக்கத்தில், "பாஜக எம்பி ரமேஷ் பிதுரியின் பேச்சு கண்டனத்திற்குரியது. அவர் மீது நடவடிக்கை எடுக்க வேண்டும். அவருடைய வார்த்தைகள் நாடாளுமன்ற கண்ணியத்தையும், ஜனநாயகத்திற்கும் நமது ஒட்டுமொத்த தேசத்திற்கும் அவமதிப்பை ஏற்படுத்தியுள்ளன" என்று கூறியுள்ளார்.

English summary

BJP MP Ramesh Bidhuri criticized Bahujan Samaj Party's Islamic MP Danish Ali in a special session of Parliament and it has become a big controversy. Meanwhile, DMK MP Kanimozhi has condemned the BJP.