சென்னை கிழக்கு மாவட்டம் 3 ஆக பிரிப்பு? உதயநிதி திட்டத்திற்கு சேகர்பாபு கடும் எதிர்ப்பு? மோதல்?
சென்னை: சட்டமன்றத் தேர்தல் தோல்விக்கு பிறகு, திமுகவை உட்கட்சி அளவில் வலுப்படுத்தவும், அடுத்தகட்டப் பணிகளை விரைவுபடுத்தவும் திமுக தலைமை தீவிர நடவடிக்கைகளை மேற்கொண்டு வருகிறது.
இதன் ஒரு பகுதியாக, மாவட்ட செயலாளர்கள் மற்றும் கட்சிப் பொறுப்புகளில் மாற்றங்களைச் செய்ய பரிந்துரைக் குழுக்கள் அமைக்கப்பட்டு ஆலோசனைகள் நடத்தப்பட்டு வருகின்றன. இந்த நிலையில், சென்னையில் உள்ள மிகவும் சக்திவாய்ந்த மாவட்ட அமைப்புகளில் ஒன்றான சென்னை கிழக்கு மாவட்ட திமுகவில் பெரும் புயல் வீசத் தொடங்கியுள்ளது.
சென்னை கிழக்கு மாவட்டம் 3 ஆகப் பிரிகிறதா?
சென்னை கிழக்கு மாவட்டத்தைச் சீரமைப்பது தொடர்பாக இளைஞரணிச் செயலாளரும், கட்சியின் முக்கியத் தலைவருமான உதயநிதி ஸ்டாலின் புதிய திட்டம் ஒன்றை முன்வைத்துள்ளதாக அறிவாலய வட்டாரங்கள் தெரிவிக்கின்றன. அதன்படி, தற்போதுள்ள சென்னை கிழக்கு மாவட்டத்தை மூன்று தனித்தனி மாவட்டங்களாகப் பிரிக்க அவர் பரிந்துரைத்துள்ளார்.
இந்த புதிய அமைப்பில், நீண்டகாலமாக மாவட்டச் செயலாளராகப் பணியாற்றி வரும் அமைச்சர் பி.கே. சேகர்பாபுவிடம் இரண்டு சட்டமன்றத் தொகுதிகளை மட்டுமே ஒப்படைக்க திட்டம் வகுக்கப்பட்டுள்ளது. மீதமுள்ள இரண்டு புதிய மாவட்டங்களுக்குத் தலைவர்களாக பரந்தாமன் மற்றும் ரங்கநாதன் ஆகியோரை புதிய மாவட்டச் செயலாளர்களாக நியமிக்க பரிந்துரை செய்யப்பட்டுள்ளது.
சேகர்பாபுவின் அதிரடி எதிர்ப்பு
உதயநிதி ஸ்டாலினின் இந்த மறுசீரமைப்பு திட்டம் குறித்து அறிந்ததும், சென்னை கிழக்கு மாவட்ட செயலாளரும் அமைச்சருமான சேகர்பாபு அதிர்ச்சியும் அதிருப்தியும் அடைந்ததாகக் கூறப்படுகிறது. இந்தத் தகவலை உறுதிப்படுத்திய உடனடியாக, அவர் முதலமைச்சரும் கட்சித் தலைவருமான மு.க. ஸ்டாலினிடம் தொடர்பு கொண்டு பேசி உள்ளார்.
அந்தச் சந்திப்பின் போது, கட்சியின் தற்போதைய நகர்வுகள் மற்றும் மாவட்டப் பிரிப்பு குறித்துத் தனது வெளிப்படையான கருத்துக்களை அவர் முன்வைத்துள்ளார். சென்னை கிழக்கு மாவட்டத்தில் எனக்கு குறைந்தது நான்கு சட்டமன்றத் தொகுதிகளாவது ஒதுக்கப்பட்டால் மட்டுமே நான் மாவட்டச் செயலாளர் பொறுப்பில் தொடர்ந்து நீடிப்பேன். இரண்டு தொகுதிகள் மட்டுமே ஒதுக்கப்படும் பட்சத்தில், எனக்கு எந்தவிதமான கட்சிப் பொறுப்பும் தேவையில்லை. சாதாரண தொண்டனாகவே இருந்துவிட்டுப் போகிறேன்.. என்று மிகத் திட்டவட்டமாகக் கூறி தலைமையை அதிர வைத்துள்ளார்.
கொதிப்பில் அறிவாலயம்
சென்னையில் கட்சிக்கு வலுவான தூணாக விளங்கும் சேகர்பாபுவின் இந்த அதிரடி நிலைப்பாடு, திமுக தலைமைக்கு பெரும் தலைவலியாக உருவெடுத்துள்ளது. ஒருபுறம் இளைஞரணியை மையப்படுத்தி கட்சி அமைப்புகளை மறுசீரமைக்க வேண்டும் என்ற உத்வேகத்தில் உதயநிதி ஸ்டாலின் செயல்பட்டு வரும் நிலையில், மறுபுறம் மூத்த நிர்வாகிகளின் எதிர்ப்பை எவ்வாறு சமாளிப்பது என்று தலைமை தீவிர யோசனையில் ஈடுபட்டுள்ளது.
சேகர்பாபுவின் இந்த எச்சரிக்கையைத் தொடர்ந்து, சென்னை கிழக்கு மாவட்ட மறுசீரமைப்பு முடிவை தற்காலிகமாக ஒத்திவைப்பதா அல்லது சமரசப் பேச்சுவார்த்தை நடத்தி புதிய தீர்வை எட்டுவதா என்பது குறித்து மு.க. ஸ்டாலின் மூத்த நிர்வாகிகளுடன் ஆலோசித்து வருகிறார். இந்த உட்கட்சிப் பூசல் சென்னையின் அரசியல் வட்டாரத்தில் பெரும் பரபரப்பை ஏற்படுத்தியுள்ளது.
Click it and Unblock the Notifications
Sign in with Google
