குடும்ப தலைவிகளுக்கு ஆயிரம் ரூபாய் திட்டம் எப்போது? மூத்த தலைவர் டிஆர்.பாலு சொன்ன முக்கிய தகவல்

Updated: Saturday, June 4, 2022, 11:43 [IST]

Subscribe to Oneindia Tamil

சென்னை: திமுக கூட்டம் ஒன்றில் பேசிய திமுக மூத்த தலைவர்களில் ஒருவரான டி.ஆர்.பாலு, மகளிருக்கு மாதம் ஆயிரம் ரூபாய் வழங்கும் திட்டம் குறித்து சில முக்கிய கருத்துகளைத் தெரிவித்துள்ளார்.

தமிழக முன்னாள் முதல்வரும் திமுக தலைவருமான கருணாநிதியின் 99ஆவது பிறந்த நாள் நேற்று கொண்டாடப்பட்டது.

ஏற்கனவே, கருணாநிதி பிறந்த நாள் அரசு விழாவாகக் கொண்டாடப்படும் என முதல்வர் ஸ்டாலின் அறிவித்து இருந்தார். அதற்கேற்ப அரசு சார்பில் பல்வேறு நிகழ்ச்சிகள் ஏற்பாடு செய்யப்பட்டு இருந்தது.

பொதுக்கூட்டம்

அதேபோல திமுக சார்பிலும் மாநிலம் முழுவதும் பல்வேறு நிகழ்ச்சிகள் ஏற்பாடு செய்யப்பட்டு இருந்தது. அதன்படி தாம்பரம் சண்முகம் சாலையில் கருணாநிதி பிறந்தநாளை முன்னிட்டும், திமுக ஆட்சி அமைந்து ஓராண்டு நிறைவடைந்துள்ள நிலையில் அதையொட்டி சாதனை விளக்கப் பொதுக்கூட்டமும் நடைபெற்றது. இந்தக் கூட்டத்தில் சிறப்பு விருந்தினராக நாடாளுமன்ற திமுக குழு தலைவர் டி.ஆர்.பாலு கலந்து கொண்டார்.

பீனிக்ஸ் பறவை

அப்போது அவர் பேசுகையில், "இரண்டு முறை திமுக ஆட்சி கலைக்கப்பட்டாலும், பீனிக்ஸ் பறவை போல மீண்டும் ஆட்சி அமைத்த பெருமை கருணாநிதியைச் சேரும். திராவிட மாடல் ஆட்சி என்பது மாநில சுயாட்சி பெறும் ஆட்சி. சமயசார்பின்மையே திராவிடமாடல் ஆட்சி. 505 தேர்தல் வாக்குறுதிகளில் 320 வாக்குறுதிகள் ஒரே ஆண்டில் நிறைவேற்றப்பட்டுள்ளது.

ஆயிரம் ரூபாய் திட்டம்

ஆனால் ஆயிரம் ரூபாய் தரவில்லை என்று வாக்குறுதியை நிறைவேற்றவில்லை எனக் கூறி வருகின்றனர். ஆயிரம் ரூபாய் தரமாட்டோம் என எங்கேயாவது சொன்னோமா. இன்னும் 4 ஆண்டுகள் உள்ளது. அதற்குள் நிச்சயமாக மற்ற அனைத்து வாக்குறுதிகளும் நிறைவேற்றப்படும். அதேபோல குடும்ப பெண்களுக்கு ஆயிரம் ரூபாய் வழங்கும் திட்டமும் நிறைவேற்றப்படும்.

பெட்ரோல் விலை

பெட்ரோல் விலை எப்படி ஏறுகிறது என எனக்குப் புரியவில்லை. நான் பெட்ரோலிய துறை அமைச்சராக இருந்துள்ளேன். ஆனால் பெட்ரோல் விலை ஏற்றத்தில் மக்களை மத்திய அரசு ஏமாற்றி வருகிறது. 8 வருட ஆட்சியில் 26.5 லட்சம் கோடி ரூபாய் வரியாக மட்டுமே மத்திய அரசு பெற்றுள்ளது. மொத்தம் ஒரு லிட்டர் பெட்ரோலில் 26 ரூபாய் 50 காசு மத்திய அரசின் செஸ் வரி என்ற பெயரில் மத்திய கஜானாவிற்கு செல்கிறது. இதில் இருந்து மாநில அரசுக்கு எந்த ஒரு ரூபாயும் வந்து சேருவதில்லை. இது ஏமாற்று வேலை இல்லையா?" என்று அவர் கேள்வி எழுப்பினார்.