அதானி விவகாரம்.. உண்மையை மறைக்க ராமதாஸை தரக்குறைவாக பேசுகிறார் முதல்வர் ஸ்டாலின்.. கொதித்த அண்ணாமலை!

Updated: Monday, November 25, 2024, 19:18 [IST]

Subscribe to Oneindia Tamil

சென்னை: அதானி நிறுவனத்துடன் திமுக அரசுக்கு தொடர்பு என்ற செய்திகள் வெளிவந்ததும், அதனை மறைக்கும் முயற்சிகளில் ஈடுபட்டு வருகிறார்கள். ராமதாஸ் கேட்ட கேள்வியின் உண்மையை எதிர்கொள்ள இயலாமல், தரக்குறைவான முறையில் முதல்வர் ஸ்டாலின் பதிலளித்திருப்பது, அவரது இயலாமையைத்தான் காட்டுகிறது என பாஜக மாநிலத் தலைவர் அண்ணாமலை தெரிவித்துள்ளார்.

சூரிய மின் சக்தி ஒப்பந்தங்களுக்காக அதானி லஞ்சம் கொடுத்ததாக குற்றச்சாட்டுகள் எழுந்துள்ள நிலையில், அதானியை தமிழக முதல்வர் ஸ்டாலின் சந்தித்ததாக குற்றம்சாட்டி இருந்தார் பாமக நிறுவனர் ராமதாஸ். கடந்த ஜூலை மாதம் 10 ஆம் தேதி தமிழக முதலமைச்சர் மு.க.ஸ்டாலினை சென்னை சித்தரஞ்சன் சாலையில் உள்ள அவரது இல்லத்தில் அதானி குழுமத் தலைவர் கவுதம் அதானி ரகசியமாக சந்தித்து பேசியிருக்கிறார். இந்த ரகசிய சந்திப்பின் நோக்கம் என்ன? என பாமக நிறுவனர் ராமதாஸ் கேள்வி எழுப்பி இருந்தார்.

இன்று செய்தியாளர் சந்திப்பில் இது பற்றிய கேள்விக்கு, “ராமதாஸுக்கு வேறு வேலையில்லை. அதனால், தினமும் ஏதாவது ஒரு அறிக்கை வெளியிட்டுக் கொணடிருப்பார். அதற்கெல்லாம் பதில் சொல்ல வேண்டிய அவசியம் இல்லை.” எனக் கூறினார் தமிழக முதல்வர் ஸ்டாலின்.

பாமக நிறுவனர் ராமதாஸின் அறிக்கை பற்றிய கேள்விக்கு முதல்வர் ஸ்டாலின், அலட்சியமாக பதில் அளித்ததாக விமர்சனங்கள் எழுந்துள்ளன. பாமக தலைவர் அன்புமணி ராமதாஸ் இது தொடர்பாக கடுமையாக விமர்சித்திருந்தார். இந்நிலையில், முதல்வர் ஸ்டாலினுக்கு கடும் கண்டனம் தெரிவித்துள்ளார் பாஜக மாநிலத் தலைவர் அண்ணாமலை.

அண்ணாமலை வெளியிட்டுள்ள பதிவில், “தங்கள் ஆட்சியின் ஊழல்களையும், நிர்வாகச் சீர்கேடுகளையும் மக்களிடம் இருந்து மறைக்க, அம்பானி, அதானி என்று திசைதிருப்பும் வேலைகளில் ஈடுபட்டு வந்த திமுக, தற்போது, அதானி நிறுவனத்துடன் திமுக அரசுக்கும், குடும்பத்தினருக்கும் தொடர்பு என்ற செய்திகள் வெளிவந்ததும், அதனை மறைக்கும் முயற்சிகளில் ஈடுபட்டு வருகிறார்கள்.

இது குறித்து, தமிழகத்தின் மூத்த அரசியல் தலைவர்களில் ஒருவரும், பாட்டாளி மக்கள் கட்சியின் நிறுவனருமான ராமதாஸ் அவர்கள் கேள்வி எழுப்பியதற்கு, தரக்குறைவான முறையில் முதலமைச்சர் ஸ்டாலின் அவர்கள் பதிலளித்திருப்பது முற்றிலும் கண்டிக்கத்தக்கது.

திமுக ஆட்சியில் இல்லாத கடந்த 2011 – 2021 பத்து ஆண்டுகள், அங்கும், இங்கும், ஆளுநர் மாளிகைக்கும் எனத் தான் ஓடி ஓடிச் சென்றதை முதலமைச்சர் ஸ்டாலின் அவர்கள் மறந்து விட்டார் போலும். ராமதாஸ் அவர்கள் மீதான அவரது இன்றைய விமர்சனத்தை, அன்று அவர் மீது வைத்திருந்தால், அதனை அவர் எப்படி எதிர்கொண்டிருப்பார்?

அரசியலில் திமுகவின் இரட்டை வேடத்தைக் கேள்வி கேட்க அனைவருக்கும் உரிமை உண்டு. குறிப்பாக, தமிழக அரசியல் வரலாற்றில், முக்கியமான பங்கினை வகிக்கும் ராமதாஸ் அவர்கள் கேட்டிருக்கும் கேள்வியின் உண்மையை எதிர்கொள்ள இயலாமல், இது போன்ற தரக்குறைவான, முற்றிலும் ஏற்கத் தகாத முறையில் பதிலளித்திருப்பது, முதலமைச்சரின் இயலாமையைத்தான் காட்டுகிறது. அவர் வகிக்கும் தமிழக முதலமைச்சர் பதவிக்கு அது அழகல்ல என்பதை நினைவூட்டக் கடமைப்பட்டிருக்கிறேன்.” எனத் தெரிவித்துள்ளார்.