துபாய் கார் ரேஸிங்கில் அணிந்திருந்த உடையை காட்டி பெருமிதம் கொண்ட அஜித்! என்ன சொல்றாரு ஏ.கே.!

Updated: Monday, January 13, 2025, 16:17 [IST]

Subscribe to Oneindia Tamil

சென்னை: துபாயில் நடந்த கார் பந்தயத்தில் வெற்றி பெற்ற நடிகர் அஜித் தனது உடையில் தமிழக விளையாட்டு மேம்பாட்டு ஆணையத்தின் (SDAT) லோகோவை சுட்டிக் காட்டி பெருமைப்பட்டுக் கொண்ட காட்சிகள் வைரலாகி வருகின்றன.

2003, 2004 ஆகிய ஆண்டுகளில் நடந்த சர்வதேச கார் ரேஸ்களில் அஜித் கலந்து கொண்டார். அது போல் 2010 ஆம் ஆண்டு நடந்த எஃப்ஐஏ பார்முலா 2 ஐரோப்பியன் சாம்பியன்ஷிப் போட்டியிலும் அவர் பங்கேற்றார்.

இதைத் தொடர்ந்து 15 ஆண்டுகளாக படங்களில் நடித்து வந்ததால் அவரால் கார் ரேஸிங்கில் கலந்து கொள்ள முடியவில்லை. தற்போது விடாமுயற்சி, குட் பேட் அக்லி ஆகிய படங்களை முடித்துவிட்ட அஜித், துபாயில் நடந்த 24 எச் எனப்படும் 24 மணி நேர கார் ரேஸிங்கில் கலந்து கொண்டார்.

இதற்காக பல கோடி மதிப்பிலான 24 எச் வகை காரை அஜித் வாங்கினார். அவர் ரேஸிங்கில் இயக்கிய காரின் எண் 901. நேற்று முன் தினம் 11 ஆம் தேதி மதியம் 1 மணிக்குத் தொடங்கிய இந்த ரேஸ் நேற்று மதியம் 12 ஆம் தேதி மதியம் 1 மணி முடிந்தது. இந்த ரேஸிங்கில் 3 ரேஸர்கள் அஜித்தின் காரில் இருந்தனர்.

இவர்களில் கார் ரேஸின் கேப்டன் அஜித்குமார். எனவே அவர்தான் 14 முதல் 18 மணி நேரம் வரை காரை ஓட்டினார். அந்த வகையில் நடந்த இந்த போட்டியில் அஜித்குமாரின் அணி 3ஆவது இடத்தை பிடித்து பெரும் சாதனை படைத்தது.

அவருக்கு பெரும்பாலானோர் வாழ்த்துகளை சொல்லி வருகிறார்கள். மேலும் தேசியக் கொடியை வீசியபடி துபாயில் அஜித்குமார் உற்சாகமாக வந்தது பெரும் பெருமையை கொடுத்துள்ளது. எல்லாவற்றுக்கும் மேல் அவர் அணிந்திருந்த கார் ரேஸிங்கிற்கான பிரத்யேக உடையில் தமிழக விளையாட்டு மேம்பாட்டு ஆணையத்தின் லோகோவை பொறித்திருந்தார்.

அந்த லோகோவையும் காட்டியபடியே அவர் துபாய் ரேஸிங் பகுதியில் வலம் வந்தார். இதுகுறித்து உதயநிதி ஸ்டாலின் கூறியிருப்பதாவது: துபாய் கார் பந்தயத்தில் அஜித்குமார் 3ஆவது இடம் பிடித்ததற்கு வாழ்த்துகளை தெரிவித்துக் கொள்கிறேன்.

அதே வேளையில் திராவிட மாடல் அரசின் தமிழ்நாடு விளையாட்டு மேம்பாட்டு ஆணையத்தின் லோகோ காட்டியதற்கு அஜித் சாருக்கு நன்றி தெரிவித்துக் கொள்கிறேன். இந்த நாட்டிற்கும், தமிழகத்திற்கும் பெருமை சேர்க்கும் விதமாக அஜித் மேலும் பல சாதனைகளை செய்ய வாழ்த்துகிறேன் என உதயநிதி தெரிவித்துள்ளார்.

இதுகுறித்து தமிழக பாஜக தலைவர் அண்ணாமலை கூறியிருப்பதாவது: துபாய் கார் பந்தய போட்டியில் அஜித் 3-ஆவது இடம் பிடித்துள்ளதற்கு பாராட்டுகள் என தெரிவித்துள்ளார்.