விஜயின் தமிழக வெற்றி கழகத்தை விடுங்க! தமிழ், தமிழ்நாடு, தமிழகம் பெயரில் இத்தனை கட்சிகளா?
சென்னை: தமிழ், தமிழ்நாடு, தமிழகம் என்ற பெயரில் இத்தனை கட்சிகளா உள்ளது? அதன் பட்டியலை பார்ப்போம்.
தமிழ், திராவிடம், புரட்சி, தேசியம் உள்ளிட்ட வார்த்தைகளுக்கு தமிழகத்தில் அதிக பவர் உள்ளது. இதனால்தான் அரசியல் கட்சிகளும் இந்த பெயர்களை தங்கள் கட்சி பெயர்களில் புகுத்திக் கொள்கின்றன.
அந்த வகையில் கடந்த 2021 ஆம் ஆண்டு அரசியல் கட்சியை தொடங்குவார் என எதிர்பார்க்கப்பட்ட விஜய் தற்போது தொடங்கியுள்ளார். அவரது கட்சியின் பெயர் தமிழக வெற்றி கழகம் ஆகும்.
அதாவது விஜய் தனது மக்கள் இயக்கத்தை அரசியல் கட்சியாக நேற்றைய தினம் பதிவு செய்தார். இந்த விஜய் மக்கள் இயக்கம் ஏற்கெனவே மக்களுக்கு பல்வேறு நன்மைகளை செய்து வருகிறது. அது போல் இந்த இயக்கத்தின் கொடியை வைத்து கடந்த உள்ளாட்சி தேர்தலில் விஜய் மக்கள் இயக்க நிர்வாகிகள் நிறைய இடங்களில் பிரதான கட்சிகளை ஓரம்கட்டிவிட்டு வெற்றி பெற்றனர்.
இந்த நிலையில் விஜய் தொடங்கியுள்ள தமிழக வெற்றி கழகம் வரும் 2024 நாடாளுமன்றத் தேர்தலில் போட்டியிடாது என்றும் எந்த கட்சிக்கும் ஆதரவளிக்காது என்றும் தெரிவிக்கப்பட்டுள்ளது. மேலும் தனது கையில் இருக்கும் படங்களை முடித்துக் கொடுத்துவிட்டு முழு நேர அரசியலில் ஈடுபட போவதாகவும் விஜய் அறிவித்துள்ளார்.
அவர் தொடங்கிய கட்சியின் பெயரில் இரு கேள்விகள் மக்களுக்கு எழுகின்றன. ஒன்று தமிழக வெற்றி கழகம் என்ற பெயரை சூட்டியது ஏன், இன்னொன்று வெற்றிக் கழகமா இல்லை வெற்றி கழகமா என்பதுதான். இது ஒரு புறமிருக்க தமிழகத்தில் தமிழ், தமிழக, தமிழ்நாடு என தொடங்கும் கட்சிகள் எத்தனை உள்ளது என்பதை பார்க்கலாம்.
தமிழ் மாநில காங்கிரஸ், தமிழ் மாநில கட்சி, தமிழ் மாநில முற்போக்கு திராவிட கழகம், தமிழ்நாடு இளைஞர் கட்சி, தமிழ்நாடு விவசாயிகள் மற்றும் தொழிலாளர்கள் கட்சி, தமிழ் தெலுங்கு தேசிய கட்சி, தமிழ் தாயக மக்கள் முன்னேற்ற கட்சி, தமிழக மக்கள் திராவிட முன்னேற்ற கழகம், தமிழக மக்கள் முன்னேற்றக் கழகம், தமிழக மக்கள் நலக் கட்சி, தமிழக மக்கள் தன்னுரிமை கட்சி, தமிழக ஸ்தாபன காங்கிரஸ், தமிழர் தேசிய முன்னணி, தமிழர் மக்கள் கட்சி, தமிழ்நாடு மகாத்மா காந்தி மக்கள் கட்சி, தமிழ்நாடு மக்கள் நலவாழ்வு பேரியக்கம், தமிழ்நாடு மக்கள் உரிமை கட்சி, தமிழ்நாடு தெலுங்கு மக்கள் கட்சி, தமிழக முற்போக்கு மக்கள் கட்சி, தமிழக வாழ்வுரிமை கட்சி, தமிழர் தேசம் கட்சி ஆகியவை ஆகும்.
அதாவது விஜய் கட்சியை சேர்க்காமல் மொத்தம் 21 கட்சிகள் உள்ளன. இவற்றில் தமிழ் மாநில காங்கிரஸ், தமிழக வாழ்வுரிமை கட்சியை தவிர மற்றவை முறைப்படி தேர்தல் ஆணையத்தில் பதிவு செய்திருக்க வாய்ப்பில்லை என்றே தெரிகிறது. எனினும் தமிழ், தமிழகம், தமிழ்நாடு என தொடங்கும் பெயரில் தமிழகத்தில் 21 கட்சிகள் உள்ளன.
Click it and Unblock the Notifications
Sign in with Google