'எனக்கு கோயில் கட்டினார்கள்’.. சனாதன தர்மம் எது தெரியுமா? திமுகவை தாக்கி குஷ்பு ட்வீட்

சென்னை: சனாதன தர்மம் குறித்த அமைச்சர் உதயநிதி ஸ்டாலினின் பேச்சு நேற்று முதலே தேசிய அளவில் பெரும் விவாதப்பொருளாக மாறியுள்ளது. இந்த நிலையில் இந்த விவகாரம் தொடர்பாக தமிழக பாஜக நிர்வாகியும் தேசிய மகளிர் ஆணைய உறுப்பினருமான குஷ்பு கருத்து தெரிவித்துள்ளார்.

சென்னையில் நடைபெற்ற மாநாட்டில் பங்கேற்ற தமிழக இளைஞர் நலன் மற்றும் விளையாட்டு துறை அமைச்சர் அமைச்சர் உதயநிதி ஸ்டாலின், சனாதன தர்மம் என்பது டெங்கு, மலேரியா போன்றது என்றும், சனாதன தர்மத்தை ஏதிர்க்கக் கூடாது; ஒழித்தாக வேண்டும் என்றும் பேசினார். ஆனால் நாடு முழுவதும் பாஜகவினர், சனாதன தர்மத்தை பின்பற்றும் 80% இந்துக்களை இனப்படுகொலை செய்ய வேண்டும் என அமைச்சர் உதயநிதி ஸ்டாலின் பேசியதாக திரித்து பொய் செய்தி பரப்பினர்.

இதனடிப்படையில் பாஜக மற்றும் காங்கிரஸ் தலைவர்கள் பலரும் அமைச்சர் உதயநிதி ஸ்டாலின் பேச்சுக்கு எதிர்ப்பும் கண்டனமும் தெரிவித்து வருகின்றனர். மத்திய உள்துறை அமைச்சர் அமித்ஷாவும் அமைச்சர் உதயநிதியை கடுமையாக விமர்சித்தார். ஆனால் அமைச்சர் உதயநிதியோ, தாம் சனாதன தர்மத்தைதான் எதிர்க்கிறேன்; காங்கிரஸ் ஒழிக என பிரதமர் மோடி பேசுகிறார்.. அப்படியானால் காங்கிரஸ் கட்சியினரை படுகொலை செய்ய மோடி சொல்வதாக எடுத்துக் கொள்ளலாமா?

ஒன்றே குலம் ஒருவனே தேவன் என்பதுதான் திமுகவின் கொள்கை என திட்டவட்டமாக கூறியிருந்தார். அமைச்சர் உதயநிதி ஸ்டாலின் சனதான தர்மம் குறித்த பேச்சுக்கு பாஜக கடும் எதிர்ப்பு தெரிவித்து வருகிறது. இருந்த போதும் அமைச்சர் உதயநிதிக்கு எதிராக போராட்டம், போலீசில் புகார் என வட இந்திய பாஜகவினர் செயல்பட்டு வருகின்றனர். அமைச்சர் உதயநிதியின் சனாதனம் குறித்த பேச்சு நேற்று முதலே தேசிய அளவில் பெரும் விவாதப்பொருளாக மாறியுள்ளது.

இந்த நிலையில், பாஜக நிர்வாகியும் தேசிய மகளிர் ஆணைய உறுப்பினருமான குஷ்பு தனது ட்விட்டரில் பதிவிட்டு இருப்பதாவது:- முஸ்லீம் பின்னணியில் இருந்து நான் வந்தேன், இருந்தாலும் எனக்காக கோவில் கட்டினார்கள். அதுதான் சனாதன தர்மம், நம்புவது, மரியாதை கொடுப்பது, அன்பு காட்டுவது அனைவரும் சமம் என ஏற்றுக்கொள்வது.

திராவிடர் கழக தலைவர் கி வீரமணி சனாதன தர்மத்தின் உண்மையை ஏற்றுக்கொள்கிறார். திமுக ஏன் மறுக்கிறது? தங்களின் தோல்விகளை திசை திருப்பும் ஒரு வழி. சனாதன தர்மம் என்பது ஒரு வாழ்க்கை முறை. அது அனைவரையும் உள்ளடக்கியது. திமுக உருவாக்க முயற்சிப்பது போல பிளவுபடுத்துவது அல்ல" என்று பதிவிட்டுள்ளார்.

English summary

Minister Udayanidhi Stalin's speech on Sanatana Dharma has become a topic of national debate since yesterday. At this stage, Tamil Nadu BJP executive and member of National Commission for Women, Khushpu, has commented on this issue.