எதிர்க்கட்சி TRAPல் சிக்க வேண்டாம்.. கடும் நடவடிக்கை எடுப்பேன்! தவெக மீட்டிங்கில் விஜய் வார்னிங்
சென்னை: ஆளுங்கட்சியான தமிழக வெற்றிக் கழகத்தின் சட்டமன்ற உறுப்பினர்கள் மீது அடுத்தடுத்து புகார்களும் சர்ச்சைகளும் எழுந்துள்ள நிலையில், அக்கட்சியின் தலைவரும் முதலமைச்சருமான விஜய், தனது கட்சி எம்.எல்.ஏ.க்களுக்கு மிகக் கடுமையான எச்சரிக்கையை விடுத்துள்ளார்.
"எதிர்க்கட்சியினர் உங்களுக்கு விரிக்கும் TRAPலோ.. வலைகளிலோ யாரும் சிக்கிவிடக் கூடாது. மக்கள் பணியில் ஒழுக்கத்தைக் கடைப்பிடியுங்கள்; தவறான பாதையில் யார் சென்றாலும் பாரபட்சமின்றி நடவடிக்கை பாயும்" என்று அவர் திட்டவட்டமாகத் தெரிவித்துள்ளார்.
பின்னணி என்ன?
தமிழக வெற்றிக் கழகம் ஆட்சிக்கு வந்து ஆறு மாதங்கள் நிறைவடைந்துள்ள சூழலில், அண்மைக்காலமாக கட்சியின் சில முக்கியப் பிரதிநிதிகள் மீது கடுமையான குற்றச்சாட்டுகள் எழுந்தன.
கள்ளக்குறிச்சி தொகுதி தவெக எம்.எல்.ஏ. அருள் விக்னேஷ், மாவட்ட பெண் ஆட்சியருக்குத் தகாத குறுஞ்செய்தி அனுப்பியதாகப் புகார் எழுந்தது. இந்த விவகாரத்தை எதிர்க்கட்சிகள் கையில் எடுத்து தீவிரமாகப் போராடி வருகின்றன. அதேபோல, துரையூர் தொகுதியில் குடிநீர் மற்றும் அடிப்படை வசதிகள் கோரி மனு அளிக்க வந்த கார்த்திக் குமார் என்ற இளைஞரை, சட்டப்பேரவை துணை சபாநாயகரும் தவெக எம்.எல்.ஏ.வுமான ரவிசங்கர் தாக்கியதாகக் கூறி வெளியான வீடியோ பெரும் சர்ச்சையை ஏற்படுத்தியது.
இதுமட்டுமின்றி, மாநிலத்தில் சட்டம்-ஒழுங்கு விவகாரங்கள் தொடர்பாகவும் எதிர்க்கட்சிகள் தவெக அரசு மீது கடுமையான விமர்சனங்களை முன்வைத்து வருகின்றன. இந்த அடுத்தடுத்த சம்பவங்கள் கட்சியின் நற்பெயருக்கு களங்கம் விளைவிப்பதாகக் கருதிய முதல்வர் விஜய், அனைத்து தவெக எம்.எல்.ஏ.க்களையும் நேரில் அழைத்து அவசர ஆலோசனைக் கூட்டம் நடத்த உத்தரவிட்டார்.
மாமல்லபுரத்தில் அவசரக் கூட்டம்
இதனைத் தொடர்ந்து, செங்கல்பட்டு மாவட்டம் மாமல்லபுரம் அருகே உள்ள தனியார் நட்சத்திர விடுதியில் தவெக எம்.எல்.ஏ.க்களின் அவசர ஆலோசனைக் கூட்டம் இன்று நடைபெற்றது. இந்தக் கூட்டத்திற்கு முதல்வர் விஜய் தலைமை தாங்கினார். கட்சியின் பொதுச்செயலாளர் என். ஆனந்த் (புஸ்ஸி ஆனந்த்) உள்ளிட்ட மூத்த நிர்வாகிகளும், அனைத்து சட்டமன்ற உறுப்பினர்களும் இதில் கலந்துகொண்டனர்.
கூட்டம் தொடங்கியதும், மக்கள் பிரதிநிதிகளின் களச் செயல்பாடுகள் மற்றும் சமீபத்திய புகார்கள் குறித்து உளவுத்துறை அறிக்கையின் அடிப்படையில் விரிவான ஆலோசனை நடத்தப்பட்டது.
பொறியில் சிக்காதீர்கள்" - விஜய் கண்டிப்பு
கூட்டத்தில் சட்டமன்ற உறுப்பினர்களிடம் மிகத் தீவிரமாகவும் கோபமாகவும் பேசிய முதல்வர் விஜய், எதிர்க்கட்சிகளின் அரசியல் திட்டங்கள் குறித்து விரிவாக எடுத்துரைத்தார்:
"நாம் புதிதாக ஆட்சிக்கு வந்துள்ளோம். மக்கள் நம் மீது அசைக்க முடியாத நம்பிக்கை வைத்து வாக்களித்து அதிகாரத்தை வழங்கியுள்ளனர். ஆனால், நம்மை வீழ்த்த எதிர்க்கட்சிகள் ஒவ்வொரு நிமிடமும் காத்துக் கொண்டிருக்கின்றன. உங்களை ஆத்திரமூட்டவும், உங்களை வம்பில் இழுத்து விடவும் பலவிதமான பொறிகளையும், வலைகளையும் அவர்கள் விரிப்பார்கள். அதற்குள் நீங்கள் எந்தக் காரணத்தைக் கொண்டும் சென்று மாட்டிக்கொள்ளக் கூடாது. நிதானமும் பொறுமையும் மக்கள் பிரதிநிதிக்கு மிக முக்கியம்."
ஒழுக்கம் இல்லையென்றால் பதவி பறிபோகும்"
தொடர்ந்து பேசிய அவர், பொதுமக்களிடமும் அரசு அதிகாரிகளிடமும் சட்டமன்ற உறுப்பினர்கள் எவ்வாறு நடந்துகொள்ள வேண்டும் என்பதைத் தெளிவுபடுத்தினார்:
"பொதுமக்கள் நம்மிடம் குறைகளைக் கூற வரும்போது அவர்களிடம் கோபப்படுவதோ, அதிகாரத் தோரணையில் நடப்பதோ துளியும் ஏற்க முடியாது. மக்களின் குரலுக்குப் பணிவோடு செவிசாய்க்க வேண்டும். அரசு அதிகாரிகளிடம் கண்ணியத்துடன் பழக வேண்டும். எல்லை மீறும் எந்தவொரு நடவடிக்கையும் மன்னிக்கப்படாது. தவறான வழியில் யார் சென்றாலும், அவர்கள் அமைச்சராக இருந்தாலும் சரி, எம்.எல்.ஏ.வாக இருந்தாலும் சரி, அவர்கள் மீது கட்சி ரீதியாகவும் சட்ட ரீதியாகவும் கடுமையான நடவடிக்கை எடுக்கப்படும். ஒழுக்கம்தான் நமது கட்சியின் முதல் அடையாளம். அதை மீறுபவர்கள் யாராக இருந்தாலும் கட்சியில் இடமில்லை" என்று நேரடியாகவே இறுதி எச்சரிக்கை விடுத்தார்.
கூட்டத்தில் கலந்துகொண்ட எம்.எல்.ஏ.க்கள் அனைவரும் தொகுதிப் பணிகளில் மட்டுமே முழு கவனம் செலுத்த வேண்டும் என்றும், சர்ச்சைக்குரிய விவகாரங்களில் தேவையின்றி ஊடகங்களிலோ சமூக வலைத்தளங்களிலோ கருத்துத் தெரிவிக்கக் கூடாது என்றும் அறிவுறுத்தப்பட்டுள்ளனர். முதலமைச்சர் விஜய்யின் இந்த அதிரடி எச்சரிக்கை தவெக வட்டாரத்தில் பெரும் பரபரப்பை ஏற்படுத்தியுள்ளது.
Click it and Unblock the Notifications
Sign in with Google
