அப்பா.. தாத்தாவை மிஞ்சிடீங்க! கட்சிப் பணிகளில் ஹைஸ்பீடு! உதயநிதி ஸ்டாலினை 5G என அழைத்த கி.வீரமணி!
சென்னை: கட்சிப்பணிகளில் கருணாநிதி, ஸ்டாலினை விட உதயநிதி ஸ்டாலின் படு வேகமாக இயங்கி வருவதாக திராவிடர் கழகத் தலைவர் கி.வீரமணி தெரிவித்துள்ளார்.
மேலும் தனது 90வது பிறந்தநாளை ஒட்டி தன்னை சந்தித்து வாழ்த்து கூற வந்த உதயநிதி ஸ்டாலினிடம், அவரது செயல்பாடுகள் குறித்து கி.வீரமணி பெருமிதம் தெரிவித்தார்.
உதயநிதி ஸ்டாலினுக்கு 5ஜி என புதிய அடைமொழியை சூட்டிய கி.வீரமணி, 5ஜியை போல் அதிவேகமாக் செயல்படுகிறீர்கள் என பாராட்டினார்.
உதயநிதி.. நெஞ்சை நிமிர்த்தி சொல்கிறோம்.. வெகு விரைவில் அங்கீகாரம்.. அமைச்சர் சேகர்பாபு சொன்ன விஷயம்!
கி.வீரமணி பிறந்தநாள்
திராவிடர் கழகத் தலைவர் கி.வீரமணியின் 90வது பிறந்தநாளை ஒட்டி, திமுக இளைஞரணிச் செயலாளர் உதயநிதி ஸ்டாலின் நேற்று அவரை நேரில் சந்தித்து வாழ்த்துக் கூறினார். பெரியார் திடலுக்கு சென்ற உதயநிதியை திராவிடர் கழக நிர்வாகிகள் வாசலில் நின்று வரவேற்று கீ.வீரமணியிடம் அழைத்துச் சென்றனர். உதயநிதியின் வருகையால் மகிழ்ந்து போன கி.வீரமணி அவரது கரங்களை பற்றி, தம்பி நீங்க ரொம்ப வேகமாகவும் சுறுசுறுப்பாகவும் செயல்படுறீங்க என மனதார பாராட்டினார்.
5ஜியை போல் வேகம்
அது மட்டுமல்லாமல் அப்பா, தாத்தாவை எல்லாம் மிஞ்சும் வகையில் உங்கள் செயல்பாடுகள் உள்ளது என உதயநிதியிடம் கூறிய அவர், நீங்க 5ஜியை போல் அதிவேகமாக இயங்குவதால் உங்களுக்கு 5ஜி என நான் பெயர் வைக்கிறேன் என கி.வீரமணி கூறினார். இதனால் அங்கு சிரிப்பலை எழுந்தது. மேலும், என்ன சாப்பிடுகிறீர்கள் என வாஞ்சையுடன் உதயநிதியிடம் கீ.வீரமணி கேட்ட நிலையில், அதற்கு ஒன்றும் வேண்டாம் உங்களை சந்தித்து பேசியதே போதும் என்கிற வகையில் அங்கிருந்து புறப்பட்டார்.
கி.வீரமணி பாராட்டு
கி.வீரமணியிடம் இருந்து பாராட்டு பெறுவது அவ்வளவு எளிதான காரியமல்ல. ஆனால் அப்பேர்பட்ட நபரே உதயநிதியை பாராட்டி 5ஜி எனக் கூறி புகழ்ந்துள்ளார் என்றால் உதயநிதியின் செயல்பாடுகள் அனைத்து தரப்பிலும் கவனிக்கப்படுகிறது என்பது தெளிவாகிறது. ஒரு காலத்தில் சமூகநீதி காத்த வீராங்கனை என ஜெயலலிதாவுக்கு சிறப்பு பட்டம் கொடுத்தவர் கீ.வீரமணி என்பது திரும்பிப் பார்க்கத் தக்கது.
இளம் தலைமுறைகள்
கி.வீரமணி பிறந்தநாளை ஒட்டி மதிமுக பொதுச்செயலாளர் வைகோவின் மகன் துரையும் நேரில் சென்று சந்தித்து வாழ்த்துக் கூறினார். அதேபோல் கனிமொழி, ராஜீவ்காந்தி உட்பட திமுகவின் முக்கிய நிர்வாகிகள் பலர் கி.வீரமணியை நேரில் சந்தித்து வாழ்த்துத் தெரிவித்தார்கள்.