ஸ்டாலின் சொல்லசொல்ல அச்சு பிசகாமல் அப்படியே செய்கிறார் எடப்பாடி.. உதயநிதி போட்ட டுவிட்

Updated: Monday, August 31, 2020, 19:25 [IST]

Subscribe to Oneindia Tamil

சென்னை: 'இ-பாஸ் முறை ரத்து' என்பது உள்பட திமுக தலைவர் முக ஸ்டாலின் வலியுறுத்திய விஷயங்களை அச்சு பிசகாமல் தமிழக முதல்வர் எடப்பாடி பழனிசாமி அறிவித்துள்ளார் என திமுக இளைஞரணி செயலாளர் உதயநிதி ஸ்டாலின் கூறியுள்ளார்.

தமிழக முதல்வர் எடப்பாடி பழனிசாமி நேற்று ஊரடங்கில் பல்வேறு தளர்வுகளை அறிவித்தார். மிக முக்கியமாக இபாஸ் ரத்து, போக்குவரத்துக்கு அனுமதி, வெளிமாநிலத்தில் இருந்து வருபவர்களுக்கு ஆட்டோ ஜென்ரேட்ஆக அப்ளை செய்த உடன் இபாஸ் போன்ற அறிவிப்பு கிட்டத்தட்ட இயல்பு நிலைக்கு தமிழகத்தை கொண்டு சென்றுள்ளது.

அத்துடன் வணிக வளாகங்கள் திறக்க அனுமதி அளித்துள்ளார். இதனால் இதுவரை செயல்படாமல் இருந்த மால்கள் உள்ளிட்ட பெரு வணிக வளாகங்களும் நாளை முதல் இயங்க போகின்றன. மெட்ரோ ரயில்களும் மத்திய அரசின் வழிகாட்டுதலின்படி வரும் செப்டம்பர் 7ம் தேதி முதல் ஓடப்போகிறது. விமான சேவைகள் எண்ணிக்கையும் அதிகரிக்கப்பட்டுள்ளது.

வழிபாட்டு தலங்கள்

கடைகளை 8 மணி வரை திறக்கலாம் என்று அனுமதி அளித்துள்ளார். ஓட்டல்கள் 9 மணி வரை பார்சல் வழங்கலாம் என்று அறிவித்துள்ளார். முதல்வர் அறிவிப்பில் மிக முக்கியமான இன்னொரு விஷயம் அனைத்து வழிபாட்டு தலங்களையும் திறக்க உத்தரவிட்டது தான். இதன் மூலம் மக்கள் இனி கோயில்கள் உள்ளிட்ட வழிபாட்டு தலங்களுக்கு எளிதாக செல்ல முடியும். இன்னொரு முக்கிய அறிவிப்பு அனைத்து நிறுவனங்களும் 100 சதவீத பணியாளர்களுடன் இயங்க அனுமதி அளித்துள்ளார். ரயில் போக்குவரத்தும், மாவட்டம் விட்டு மாவட்டத்திற்கு போக்குவரத்து மட்டுமே அறிவிக்கப்படவில்லை. முதல்வரின் தளர்வு அறிவிப்பு தமிழகத்தில் பெரும் வரவேற்பை பெற்றுள்ளது.

அரியர் ஆல்பாஸ்

இந்நிலையில் அண்மைக்காலமாக முதல்வர் எடப்பாடி பழனிசாமி வெளியிட்ட பல்வேறு அறிவிப்புகள் ஆச்சயர்த்தை ஏற்படுத்தி உள்ளது. குறிப்பாக 10ம் வகுப்பு தேர்வு ஆல் பாஸ், கல்லூரிகளில் தேர்வு ரத்து போன்றவை மிக முக்கியமானது. அதிலும் குறிப்பாக அரியர் வைத்த அனைவரையும் பாஸ் போட உத்தரவிட்டுள்ளார். இதை இதுவரை எந்த முதல்வரும் செய்தது கிடையாது.

உதயநிதி டுவிட்

முதல்வரின் அறிவிப்புகள் குறித்து கருத்து தெரிவித்துள்ள திமுக இளைஞரணி செயலாளர் உதயநிதி ஸ்டாலின், : 'இ-பாஸ் முறை ரத்து' என்பது உள்பட திமுக தலைவர் முக ஸ்டாலின் வலியுறுத்திய விஷயங்களை அச்சு பிசகாமல் தமிழக முதல்வர் எடப்பாடி பழனிசாமி அறிவித்திருப்பதாக குறிப்பிட்டுள்ளார்.

ஸ்டாலின் சொல்கிறார்

10ம் வகுப்பு மற்றும் கல்லூரி தேர்வு ரத்து என அனைத்திலும் தமிழகத்தின் அறிவிக்கப்படாத முதல்வராக திமுக தலைவர் முக ஸ்டாலின் சொல்கிறார் என்றும் அதை முதல்வர் ஈபிஎஸ் செய்கிறார் என்றும் உதயநிதி டுவிட்டரில் கருத்து பதிவிட்டுள்ளார்.