தோளில் தட்டி நலம் விசாரித்த பிரதமர் மோடி! பூரித்துப்போன எடப்பாடி பழனிசாமி! ஏர்போர்ட் ருசிகரம்!

சென்னை: அரசு விழாவில் பங்கேற்பதற்காக சென்னை வந்துள்ள பிரதமர் மோடி, விமான நிலையத்தில் எதிர்க்கட்சித் தலைவர் எடப்பாடி பழனிசாமியை தோளில் தட்டி நலம் விசாரித்தார்.

இதேபோல் மாநிலங்களவை உறுப்பினரும், தமிழ் மாநில காங்கிரஸ் தலைவருமான ஜி.கே.வாசனையும் உரிமையுடன் தோளை தொட்டு வரவேற்பை ஏற்றுக்கொண்டார் பிரதமர் மோடி.

மற்றபடி அங்கு அவரை வரவேற்க வந்திருந்த மூத்த அமைச்சர்களான துரைமுருகன், பொன்முடி, மேயர் பிரியா ராஜன் உள்ளிட்ட அனைவரிடமும் வணக்கம் வைத்துவிட்டு விறுவிறுவென ஹெலிகாப்டரை நோக்கிச் சென்றார்.

மோடி வருகை

பல்லாயிரம் கோடி ரூபாய் மதிப்பீட்டில் தேசிய நெடுஞ்சாலைத் துறை திட்டங்கள் மற்றும் ரயில்வே திட்டங்களை தொடங்கி வைப்பதற்காக பிரதமர் மோடி இன்று மாலை சென்னை வந்தடைந்தார். விமான நிலையத்தில் அவரை வரவேற்பதற்காக மூத்த அமைச்சர்கள் துரைமுருகன், பொன்முடி, எதிர்க்கட்சித் தலைவர் எடப்பாடி பழனிசாமி, மத்திய இணை அமைச்சர் எல்.முருகன், மேயர் பிரியா ராஜன், ஜிகே.வாசன், மற்றும் பாஜகவின் முக்கிய நிர்வாகிகள் ஓரிருவர் மட்டும் சென்றிருந்தனர்.

நலம் விசாரிப்பு

விமானத்தை விட்டு இறங்கியதும் ஆளுநர் ரவி பொன்னாடை அணிவித்து மோடியை வரவேற்றார். அவரைத் தொடர்ந்து மத்திய இணை அமைச்சர் முருகன், அமைச்சர்கள் துரைமுருகன், பொன்முடி ஆகியோருக்கு வணக்கம் வைத்த பிரதமர் மோடி, எதிர்க்கட்சித் தலைவர் எடப்பாடி பழனிசாமியை கண்டதும் அவரது தோளில் தட்டி நலம் விசாரித்தார். இதனை சற்றும் எதிர்ப்பார்க்காத எடப்பாடி பழனிசாமி அப்படியே பூரித்துப்போனார்.

முகமெல்லாம் சிரிப்பு

ஆளும்கட்சி அமைச்சர்களை காட்டிலும் தன்னிடம் பிரதமர் மோடி நின்று பேசியதாலும் தனது கரங்களை பற்றி தோளில் தட்டிக் கொடுத்ததாலும் எடப்பாடி பழனிசாமியின் முகமெல்லாம் சிரிப்பாக இருந்தது. அவரைத் தொடர்ந்து தலைமைச் செயலாளர் இறையன்புவிடம் ஏதோ சைகை செய்த பிரதமர் மோடி, தமிழக டிஜிபி சைலேந்திரபாபு, மாநகராட்சி மேயர் பிரியா ராஜன் ஆகியோருக்கும் பாஜக முக்கிய நிர்வாகி ஓரிருவருக்கும் வணக்கம் வைத்துவிட்டு விறுவிறுவென சென்றார்.

ஜி.கே.வாசன்

இதனிடையே முன்னதாக ஜி.கே.வாசனிடமும் பிரதமர் மோடி உரிமையுடன் தோளில் தட்டி ஏதோ பேசினார். பிரதமர் மோடியை வரவேற்க சென்னை விமான நிலையத்திற்கு முதல்வர் ஸ்டாலின் வரவில்லை என்பது குறிப்பிடத்தக்கது.

English summary

Edappadi Palaniswami to welcome Modi :அரசு விழாவில் பங்கேற்பதற்காக சென்னை வந்துள்ள பிரதமர் மோடி, விமான நிலையத்தில் எதிர்க்கட்சித் தலைவர் எடப்பாடி பழனிசாமியை தோளில் தட்டி நலம் விசாரித்தார்.