ரீல்ஸ் போடுங்கப்பா..ஆட்சியை பிடிக்கலாம்! அதிமுக கூட்டத்தில் அள்ளி விட்ட எடப்பாடி! ஆடிப்போன ஐடி விங்!

Updated: Sunday, June 14, 2026, 13:51 [IST]

Subscribe to Oneindia Tamil

சென்னை: சட்டப்பேரவைத் தேர்தலில் கடும் பின்னடைவை சந்தித்துள்ள அதிமுக, கட்சியை மீண்டும் கட்டமைக்கும் பணிகளில் தீவிரமாக இறங்கியுள்ளது. இந்த சூழலில் நடைபெற்ற மாவட்ட செயலாளர்கள் மற்றும் முக்கிய நிர்வாகிகள் ஆலோசனைக் கூட்டத்தில், அதிமுக பொதுச்செயலாளர் எடப்பாடி பழனிசாமி பேசிய தகவல்கள் சமூக வலைதளங்களில் கேலிக்குள்ளாகியுள்ளது.

குறிப்பாக, "இன்ஸ்டாகிராம் ரீல்ஸ் மூலமாகவே தவெக வளர்ந்தது. அதே சமூக வலைதளங்களை பயன்படுத்தி நாமும் மீண்டும் வெற்றி பெற முடியும்" என்று அவர் கூறியதாக தகவல்கள் வெளியாகியுள்ளன. இந்த கருத்து, அதிமுகவின் அணுகுமுறை குறித்து பல்வேறு கேள்விகளை எழுப்பியுள்ளது.

2026 சட்டப்பேரவைத் தேர்தல் முடிவுகள் தமிழக அரசியலில் பெரிய மாற்றத்தை ஏற்படுத்தின. பல ஆண்டுகளாக திமுக - அதிமுக என்ற இருமுனைப் போட்டியாக இருந்த அரசியல் களம், தமிழக வெற்றிக் கழகத்தின் எழுச்சியால் முற்றிலும் மாறியது.

அதிமுக ஆலோசனை கூட்டம்

நடிகர் விஜய் தலைமையிலான தவெக, பெரும்பான்மை தொகுதிகளில் வெற்றி பெற்று ஆட்சியை கைப்பற்றியது. திமுக எதிர்க்கட்சியாக மாறிய நிலையில், அதிமுக மூன்றாவது இடத்துக்கு தள்ளப்பட்டது.
இதன் காரணமாக அதிமுகவுக்குள் கடும் அதிருப்தி நிலவுகிறது. தேர்தல் தோல்விக்குப் பிறகு பல முன்னாள் அமைச்சர்கள், முன்னாள் எம்.எல்.ஏக்கள் மற்றும் மாவட்ட நிர்வாகிகள் தவெகவில் இணைந்து வருவது கட்சித் தலைமையை மேலும் கவலைக்குள்ளாக்கியுள்ளது.

இன்ஸ்டாகிராம்

இந்த நிலையில் நடைபெற்ற ஆலோசனைக் கூட்டத்தில், சமூக வலைதளங்களை வலுவாக பயன்படுத்த வேண்டும் என்று எடப்பாடி பழனிசாமி வலியுறுத்தியதாக கூறப்படுகிறது. குறிப்பாக இன்ஸ்டாகிராம், யூடியூப், குறும்பட வீடியோக்கள் போன்ற தளங்கள் மூலமாக இளைஞர்களை மீண்டும் அதிமுக பக்கம் ஈர்க்க வேண்டும் என அவர் அறிவுறுத்தியதாக தகவல்கள் தெரிவிக்கின்றன. அதேநேரத்தில், "தவெக நம்முடைய பிரதான எதிரி அல்ல. திமுகதான் எப்போதும் நமது அரசியல் எதிரி" என்றும் எடப்பாடி பழனிசாமி பேசியதாக கூறப்படுகிறது.

தவெக

ஏனெனில், கடந்த சில மாதங்களாக அதிமுகவில் இருந்து விலகி தவெகவில் இணையும் தலைவர்களின் எண்ணிக்கை அதிகரித்து வருகிறது. அதிமுகவின் முன்னாள் அமைச்சர்கள், முன்னாள் எம்.பிக்கள், மாவட்ட நிர்வாகிகள் உள்ளிட்ட பலர் தவெக பக்கம் சென்றுள்ளனர். இந்நிலையில், தவெகவை எதிரியாகவே பார்க்க மறுப்பது சரியான அரசியல் கணக்கா என்ற கேள்வி எழுந்துள்ளது.

இன்ஸ்டா ரீல்ஸ்

அரசியல் விமர்சகர்களின் கருத்துப்படி, தவெகவின் வெற்றியை வெறும் சமூக வலைதள தாக்கமாக மட்டும் பார்க்க முடியாது. விஜய்க்கு இருந்த ரசிகர் அடித்தளம், பெண்கள் மற்றும் முதல் முறையாக வாக்களித்த இளைஞர்களின் ஆதரவு, மாற்று அரசியலுக்கான மக்கள் விருப்பம் உள்ளிட்ட பல காரணிகள் அந்த வெற்றிக்கு பின்னணியாக இருந்தன. எனவே அதை இன்ஸ்டா ரீல்ஸ் வெற்றி என்று மட்டும் சுருக்குவது முழுமையான அரசியல் மதிப்பீடாக இருக்காது என கூறப்படுகிறது.

ஆதவ் அர்ஜுனா

மறுபுறம், அதிமுக நிர்வாகிகள் சிலர், சமூக வலைதளங்களில் கட்சி மிகவும் பின்தங்கியிருந்தது உண்மைதான் என்றும், அந்த குறையை சரிசெய்ய வேண்டிய அவசியத்தை எடப்பாடி பழனிசாமி சுட்டிக் காட்டியிருப்பதாகவும் விளக்கம் அளிக்கின்றனர். இதே நேரத்தில், தவெக தரப்பில் இருந்து தொடர்ந்து அதிமுக மீது தாக்குதல் நடத்தப்பட்டு வருகிறது. குறிப்பாக அமைச்சர் ஆதவ் அர்ஜுனா உள்ளிட்டோர், "கட்சித் தலைமையின் பலவீனம்தான் அதிமுகவில் இருந்து நிர்வாகிகள் வெளியேற காரணம்" என்று விமர்சித்து வருகின்றனர். மேலும் எதிர்காலத்தில் அதிமுகவின் பல முக்கிய நிர்வாகிகளும் தவெகவில் இணைய வாய்ப்பு இருப்பதாகவும் அவர்கள் கூறி வருகின்றனர்.

சமூக வலைதள பிரசாரம்

இந்த சூழலில், அதிமுக மீண்டும் எழுச்சி பெற வேண்டுமெனில் சமூக வலைதள பிரசாரம் மட்டும் போதாது என்பதே அரசியல் பார்வையாளர்களின் கருத்தாக உள்ளது. அடிமட்ட தொண்டர்களை உற்சாகப்படுத்துவது, இளைஞர்களுக்கு புதிய பொறுப்புகள் வழங்குவது, கட்சிக்குள் நிலவும் அதிருப்தியை சரிசெய்வது, மக்களிடையே மீண்டும் நம்பிக்கையை உருவாக்குவது போன்ற பணிகளும் அவசியம் என அவர்கள் சுட்டிக்காட்டுகின்றனர்.

வியூகம் தொடருமா?

அதிமுக எதிர்காலத்தில் தவெகவை எப்படி அணுகப்போகிறது? திமுகவை மட்டுமே எதிரியாக பார்க்கும் அரசியல் வியூகம் தொடருமா? அல்லது அரசியல் யதார்த்தத்திற்கு ஏற்ப தனது வியூகத்தை மாற்றிக்கொள்ளுமா? என பல கேள்விகள் எழுகின்றன.