எடப்பாடி தான் கிங்கு.. கடும் போட்டியிலும் சுமார் 1 லட்சம் வாக்கு வித்தியாசத்தில் வெற்றி பெற்றவர்கள்!

சென்னை: தமிழக சட்டசபை தேர்தலில் கடுமையான மும்முனைப் போட்டி நிலவிய நிலையிலும் கிட்டத்தட்ட 1 லட்சம் வாக்குகள் வித்தியாசத்தில் 3 வேட்பாளர்கள் வெற்றி பெற்றுள்ளனர். கொளத்தூர் தொகுதியில் முதலமைச்சர் ஸ்டாலின் தோல்வியடைந்த நிலையில், அதிமுக பொதுச் செயலாளர் எடப்பாடி பழனிசாமி, தமிழ்நாட்டிலேயே மிக அதிக வாக்கு வித்தியாசத்தில் வென்றுள்ளார்.

திமுக vs அதிமுக vs தவெக என கடும் போட்டி நிலவியது. இதுபோக நாம் தமிழர் கட்சி, சசிகலா - ராமதாஸ் கூட்டணி என பல முனை போட்டி நிலவியது. கடும் போட்டியால் சொற்ப வாக்குகள் வித்தியாசத்தில் வெற்றி தோல்விகள் நிர்ணயிக்கப்படலாம் என எதிர்பார்க்கப்பட்டது. ஆனால், இந்தக் கடும் போட்டியிலும், பல்லாயிரக்கணக்கான வாக்குகள் வித்தியாசத்தில் தவெக வேட்பாளர்கள் பலர் வெற்றி பெற்றுள்ளனர்.

எடப்பாடி பழனிசாமி, தனது சொந்த தொகுதியான எடப்பாடியில் அவர் 98 ஆயிரத்து 110 வாக்குகள் வித்தியாசத்தில் வெற்றிவாகை சூடியுள்ளார். அதிமுக பொதுச்செயலாளர் எடப்பாடி பழனிசாமி, சேலம் மாவட்டம் எடப்பாடி தொகுதியில் போட்டியிட்டு 1 லட்சத்து 48 ஆயிரத்து 933 வாக்குகள் பெற்று, சுயேச்சை வேட்பாளர் பிரேம்குமாரை விட 98,110 வாக்குகள் வித்தியாசத்தில் வெற்றி பெற்றுள்ளார். தமிழகத்திலேயே அதிக வாக்குகள் வித்தியாசத்தில் வெற்றி பெற்றுள்ளார்.

அவரை தொடர்ந்து, சோழிங்கநல்லூர் தொகுதி தவெக வேட்பாளர் சரவணன் 96 ஆயிரத்து 780 வாக்குகள் வித்தியாசத்தில் வெற்றி பெற்றுள்ளார். செங்கல்பட்டு மாவட்டத்திற்கு உட்பட்ட சோழிங்கநல்லூர் சட்டப்பேரவை தொகுதியில் தவெக சார்பில் போட்டியிட்ட சரவணன் 2,20,382 வாக்குகள் பெற்று, திமுக வேட்பாளர் எஸ்.அரவிந்த் ரமேஷை விட 96,780 வாக்கு வித்தியாசத்தில் வெற்றி பெற்றுள்ளார்.

மாதவரம் தொகுதி தவெக வேட்பாளர் விஜய பிரபு 94 ஆயிரத்து 985 வாக்குகள் வித்தியாசத்திலும் வெற்றி பெற்றுள்ளார். மாதவரம் சட்டமன்ற தொகுதியில் தவெக வேட்பாளர் எம்.எல்.விஜய்பிரபு 1,91,140 வாக்குகள் பெற்று, திமுக வேட்பாளர் மாதவரம் எஸ்.சுதர்சனத்தை விட 94,968 வாக்குகள் வித்தியாசத்தில் வெற்றி பெற்றுள்ளார்.

அதேபோல், பூந்தமல்லி தொகுதி தவெக வேட்பாளர் பிரகாசம் 72 ஆயிரத்து 740 வாக்குகள் வித்தியாசத்தில் வெற்றி பெற்றுள்ளார்.

திருப்பூர் தொகுதியில் போட்டியிட்ட சத்தியபாமா 69,992 வாக்குகள் வித்தியாசத்தில் வெற்றி பெற்றுள்ளார்.

விராலிமலை தொகுதியில் அதிமுக வேட்பாளர் விஜயபாஸ்கர், 62,073 வாக்குகள் வித்தியாசத்தில் வெற்றி பெற்றுள்ளார்.

பெரம்பூர் தொகுதியில் போட்டியிட்ட தவெக தலைவர் விஜய் 53 ஆயிரத்து 715 வாக்குகள் வித்தியாசத்திலும் வெற்றியை பதிவு செய்துள்ளார்.

English summary

Despite the prevalence of a fierce three-way contest in the Tamil Nadu Assembly elections, three candidates secured victory by a margin of nearly 100,000 votes. While Chief Minister Stalin faced defeat in the Kolathur constituency, AIADMK General Secretary Edappadi Palaniswami achieved the largest victory margin in the entire state of Tamil Nadu.