தவெகவுக்கு ‘டபுள் டிஜிட்’ தொகுதிகள் கன்பார்ம்? எக்சிட் போல் கணிப்புகள் சொல்வது என்ன?

சென்னை: தமிழக சட்டசபை தேர்தல் களத்தில் தவெக எந்த மாதிரியான விளைவுகளை ஏற்படுத்தப் போகிறது என்பதே அனைவரும் அறியக் காத்திருக்கும் செய்தி. இன்று எக்சிட் போல் முடிவுகள் வெளியிடப்பட்டுள்ள நிலையில், பல்வேறு கருத்துக்கணிப்புகள், தவெக டபுள் டிஜிட்டில் சீட்களைக் கைப்பற்றும் எனத் தெரிவித்துள்ளன.

தமிழக சட்டமன்ற தேர்தல் ஒரே கட்டமாக கடந்த ஏப்ரல் 23 ஆம் தேதி நிறைவடைந்த நிலையில், தேர்தலுக்கு பிந்தைய கருத்துக்கணிப்பு முடிவுகள் இன்று வெளியாகியுள்ளன. இந்தியாவின் பல்வேறு முன்னணி தேர்தல் கருத்துக்கணிப்பு நிறுவனங்களும் வெளியிட்டுள்ள முடிவுகளின்படி, தமிழ்நாட்டில் திமுகவே மீண்டும் ஆட்சியைப் பிடிக்கும் என்று தெரிவிக்கப்பட்டுள்ளது.

முதல் முறையாக விஜய்

சினிமா புகழ் மூலமாக தவெக-வைத் தொடங்கிய விஜய் முதல் முறையாக இந்த தேர்தல் களத்தில் இறங்கியுள்ளார். விஜய், தான் போட்டியிடும் முதல் தேர்தலில் என்ன தாக்கத்தை ஏற்படுத்துவார்? அவர் அரசியல் வாழ்வு எப்படி அமையப்போகிறது? என்ற பல்வேறு எதிர்பார்ப்புகள் அவர் மீது இருந்து வருகிறது.

அனைத்துத் தொகுதிகளிலும் தனித்துப் போட்டியிட்ட விஜய் இந்த தேர்தலில் ஆட்சியைத் தீர்மானிக்கும் சக்தியாக இருப்பார் என்று கணிக்கப்பட்டது. தற்போது தேர்தலுக்கு பிந்தைய கருத்துக்கணிப்புகளும் அதையே உறுதி செய்துள்ளது. இந்த தேர்தலில் தவெக இரட்டை இலக்கத்தில் வெற்றி பெறக்கூடும் என்று சில கருத்துக்கணிப்புகள் தெரிவிக்கின்றன.

தவெக எவ்வளவு சீட் ஜெயிக்கும்?

என்டிடிவி - பீப்பிள்ஸ் பல்ஸ் கருத்துக்கணிப்பின்படி, தமிழக வெற்றிக் கழகம் 18 முதல் 24 தொகுதிகளை தமிழ்நாட்டில் கைப்பற்றும், மேட்ரிஸ் தவெக 12 முதல் 16 தொகுதிகளை கைப்பற்றும் என்றும், ரிபப்ளிக் - பி மார்க் தவெக 16 முதல் 26 தொகுதிகளை கைப்பற்றும் என்றும், சாணக்யா ஸ்ட்ராட்டஜிஸ்ட் 13 முதல் 18 தொகுதிகளை கைப்பற்றும் என்றும் கணித்துள்ளனர். டைம்ஸ் நவ் மற்றும் ஜேவிசி தவெக 8 முதல் 15 இடங்களை கைப்பற்றும் என்று கணித்துள்ளது.

அக்னி நியூஸ் சர்வீசஸ், தவெக ஒரு இடத்தில் வெற்றி பெறும் என்றும், வோட் வைப் (vote vibe) தவெக 4 - 10 தொகுதிகளில் வெற்றி பெறக்கூடும் என்றும், மின்னம்பலம் எக்சிட் போல் தவெக 5 இடங்களில் வெற்றி பெறக்கூடும் என்றும் கணித்துள்ளது.

தவெக ஆட்சி?

உச்சபட்சமாக, ஆக்சிஸ் மை இந்தியா எக்சிட் போல், தவெக ஆட்சி அமைக்கக்கூடும் என்ற கணிப்பை வெளியிட்டுள்ளது. தமிழ்நாட்டில் தவெக 98 முதல் 120 இடங்கள் வரை வெல்லக்கூடும் என்றும், திமுக 92 - 110 இடங்களில் வெல்லக்கூடும் என்றும், அதிமுக வெறும் 22 - 33 சீட்களில் வெல்ல வாய்ப்புள்ளது என்றும் ஆக்சிஸ் மை இந்தியா எக்சிட் போல் தெரிவித்துள்ளது.

விஜய்க்கு பெரும்பாலான முதல் தலைமுறை வாக்காளர்கள் மற்றும் பெண்கள் வாக்களித்துள்ளனர் என்று கருத்துக்கணிப்பில் தெரியவந்துள்ளது. மேலும், முதியவர்கள் ஆகியோரின் வாக்குகளும் கிடைத்துள்ளதாக கூறப்படுகிறது. விஜய் இந்த தேர்தலில் பெறும் வாக்கு சதவீதம் ஆட்சியை அமைக்கப்போவது யார் என்பதையும் தீர்மானிக்கும் சக்தியாக மாறியுள்ளது.

English summary

The question everyone is waiting to see answered is what kind of impact the TVK will create in the Tamil Nadu Assembly election arena. With the exit poll results released today, various surveys indicate that the TVK is poised to secure a double-digit seat tally.