தமிழகத்தில் பிப்.23 ஆம் தேதி இறுதி வாக்காளர் பட்டியல் வெளியீடு! ஒரு வாரம் தள்ளி போக காரணம் என்ன?

சென்னை: தமிழகத்தில் நாளை மறுநாள் வெளியாகவிருந்த இறுதி வாக்காளர் பட்டியல் வரும் 23 ஆம் தேதி வெளியாகும் என தமிழக தலைமை தேர்தல் அதிகாரி அர்ச்சனா பட்நாயக் தெரிவித்துள்ளார்.

தமிழகம், புதுவை, கேரளா, மேற்கு வங்கம் உள்ளிட்ட மாநிலங்களுக்கு சட்டசபை தேர்தல் ஓரிரு மாதங்களில் நடைபெறுகிறது. இதற்கான அறிவிப்புகள் இந்த மாத இறுதியில் அல்லது அடுத்த மாத தொடக்கத்தில் வெளியாகும் என தெரிகிறது.

இதனிடையே வாக்காளர் சிறப்பு திருத்த பணிகள் நடந்து முடிந்தன. இந்த நிலையில் தமிழகத்தில் இறுதி வாக்காளர் பட்டியல் வரும் 17ஆம் தேதி வெளியாகும் என சொல்லப்பட்டது. இந்த நிலையில் தற்போது ஒரு வாரத்திற்கு தள்ளி போய், வரும் 23 ஆம் தேதிதான் வெளியாகும் என அறிவிக்கப்பட்டுள்ளது.

இதுகுறித்து அர்ச்சனா பட்நாயக் வெளியிட்டுள்ள செய்திக்குறிப்பில், இந்திய உச்சநீதிமன்றத்தால் WP(C) எண் 1072/ 2025 மற்றும் 1145/ 2025 ஆகிய வழக்குகளில் 29.01.2026 அன்று வழங்கப்பட்ட உத்தரவுகளின் அடிப்படையில், இந்தியத் தேர்தல் ஆணையமானது, 30.01.2026 அன்று வெளியிட்ட கடித எண் 23/ SIR/ 2026/ ERS -ல், "முரண்பாடுகள்" (Logical Discrepancies) என்ற பிரிவில் இடம்பெற்றுள்ள நபர்களின் பெயர் பட்டியலை கிராமப் பஞ்சாயத்து அலுவலகங்கள், பொது இடங்கள் மற்றும் தாலுக்கா/ துணை பிரிவு அலுவலகங்கள், நகரப் பகுதிகளில் உள்ள வார்டு அலுவலகங்கள் உள்ளிட்ட இடங்களில் வெளியிட வேண்டும் என்று அறிவுறுத்தியது.

மேலும், இம்முரண்பாடுகள் பிரிவில் பாதிக்கப்படக்கூடிய நபர்கள், முரண்பாடுகளின் பட்டியல் வெளியிடப்பட்ட நாளிலிருந்து 10 நாட்களுக்குள், உரிய விளக்கத்துடன் தங்களது ஆவணங்களை / மறுப்புரைகளை நேரில் அல்லது தங்களது அங்கீகரிக்கப்பட்ட பிரதிநிதி (வாக்குச்சாவடி முகவர்கள் உட்பட) மூலமாக சமர்ப்பிக்க அனுமதி வழங்கப்பட வேண்டும் என்றும் ஆணையம் அறிவுறுத்தியது.

இதற்கமைவாக, இந்திய உச்சநீதிமன்றத்தின் உத்தரவுப்படி முரண்பாடுகளின் பட்டியல் வெளியிடப்பட்டு, அடுத்த 10 நாட்களுக்குள் தொடர்புடைய நபர்கள் தங்களது ஆவணங்களை / மறுப்புரைகளை சமர்ப்பிக்க அனுமதிக்கப்பட்டனர்.

தற்போது, 01.01.2026-ஆம் தேதியை தகுதி நாளாகக் கொண்டு மேற்கொள்ளப்பட்டு வரும் சிறப்பு தீவிர திருத்தம் (Special Intensive Revision - SIR) தொடர்பான இறுதி வாக்காளர் பட்டியல் 23.02.2026 அன்று வெளியிடப்படும். இவ்வாறு குறிப்பிட்டுள்ளார்.

English summary

Tamil Nadu’s final electoral roll, which was earlier scheduled to be released the day after tomorrow, will now be published on the 23rd, Chief Electoral Officer Archana Patnaik announced. The revised date has been officially confirmed by the state election authorities.