தவெக சார்பாக இப்தார் நோன்பு.. 2,000 பேருக்கு தயாராகும் மட்டன் பிரியாணி.. வெளியாகிய உணவுப்பட்டியல்!
சென்னை: தமிழக வெற்றிக் கழகம் சார்பாக இன்று மாலை நடக்கவுள்ள இப்தார் நோன்பு திறக்கும் நிகழ்ச்சியில் 2 ஆயிரம் பேருக்கு மட்டன் பிரியாணி தயார் செய்யப்பட்டு வருவது தெரிய வந்துள்ளது. இதற்கான உணவுப் பட்டியல் என்ன என்பது குறித்து தகவல் வெளியாகியுள்ள நிலையில், தவெக தலைவர் விஜய் இன்று நோன்பு இருந்து இஸ்லாமிய முறைப்படி தொழுகையில் ஈடுபடவுள்ளதாக கூறப்பட்டுள்ளது.
நடிகர் விஜய் தொடங்கியுள்ள தமிழக வெற்றிக் கழகம் அரசியல் கட்சியின் செயல்பாடுகள் மீது மக்களின் கவனம் திரும்பியுள்ளது. அண்மையில் நடைபெற்ற தவெக 2ஆம் ஆண்டு தொடக்க விழாவில் நடிகர் விஜய் இந்தி திணிப்பு விவகாரம் குறித்து பேசி இருந்தார். தமிழ்நாட்டில் இருமொழிக் கொள்கையே பின்பற்றப்பட வேண்டும் என்று வலியுறுத்திய அவர், திமுக மற்றும் பாஜகவையும் கடுமையாக சாடினார்.
அதேபோல் தொகுதி மறுசீரமைப்பு விவகாரம் தொடர்பாக தமிழக அரசின் அனைத்து கட்சிக் கூட்டத்தில் பங்கேற்று தவெக ஆதரவு அளித்தது. இன்னும் ஓரிரு மாதங்களில் நடிகர் விஜய் தமிழ்நாடு முழுவதும் சுற்றுப்பயணம் மேற்கொள்ள உள்ள நிலையில், அக்கட்சியினர் அரசியல் செயல்பாடுகள் அடுத்த கட்டத்தை எட்டி இருக்கிறது.
அந்த வகையில் ரமலான் மாதத்தை முன்னிட்டு தமிழக வெற்றிக் கழகம் சார்பாக இன்று ஒய்எம்சிஏ மைதானத்தில் இப்தார் நோன்பு திறக்கும் நிகழ்ச்சிக்கு ஏற்பாடு செய்யப்பட்டுள்ளது. இந்த நிகழ்ச்சியில் பங்கேற்க மாவட்டத்திற்கு 5 நிர்வாகிகள் அழைக்கப்பட்டுள்ளனர். மொத்தமாக இந்த நோன்பு திறக்கும் நிகழ்ச்சியில் 2,000க்கும் மேற்பட்டோர் பங்கேற்க உள்ளதாக தெரிய வந்துள்ளது.
இந்த நிகழ்ச்சி மாலை 6 மணியளவில் தொடங்கி ஒரு மணி நேரம் நீடிக்கும் என்று கூறப்படுகிறது. அதுமட்டுமல்லாமல் தவெக தலைவர் விஜய் இன்று ஒருநாள் முழுதும் நோன்பு இருந்து இஸ்லாமியர்களின் முறைப்படி தொழுகை செய்து இப்தார் விருந்தை எடுத்து கொள்ளவுள்ளார். இந்த நிலையில் தவெக சார்பாக ஏற்பாடு செய்யப்பட்டுள்ள நோன்பு திறக்கும் நிகழ்ச்சியில் ஏற்பாடு செய்யப்பட்டுள்ள உணவுப் பட்டியல் வெளியாகி இருக்கிறது.
இதன்படி 2 ஆயிரம் பேருக்கு மட்டன் பிரியாணி, சிக்கன் 65, வெஜ் சமோசா மற்றும் நோன்பு கஞ்சி ஆகியவை தயாராகி வருகிறது. சமையல் பணிகள் தீவிரமாக நடந்து வரும் நிலையில், தவெக நிர்வாகிகள் ஒய்எம்சிஏ மைதானத்தில் ஆய்வு பணிகளில் ஈடுபட்டு வருகின்றனர். இந்த நிகழ்ச்சியில் விஜய் பங்கேற்க உள்ளதால், தவெக தொண்டர்களின் கவனமும் குவிந்துள்ளது.
மேலும் தவெக சார்பாக ஏற்பாடு செய்யப்பட்டுள்ள இப்தார் நோன்பு திறக்கும் நிகழ்ச்சிக்கு பல்வேறு அமைப்புகளுக்கும், அருகில் உள்ள பள்ளிவாசல் நிர்வாகிகளுக்கும், இஸ்லாமியர்களுக்கு அழைப்பு விடுக்கப்பட்டுள்ளது. இதனால் யார் யார் பங்கேற்கிறார்கள் என்ற எதிர்பார்ப்பும் அனைத்து தரப்பினர் மத்தியில் எழுந்துள்ளது.
Click it and Unblock the Notifications
Sign in with Google