“தவெகவுக்கு திமுக மட்டுமே எதிரி.. அதிமுக ஒரு கட்சியே இல்லை” - செங்கோட்டையன் பேட்டி

சென்னை: தவெகவை பொறுத்தவரை திமுக மட்டுமே எதிரி என்றும், அதிமுக என்பது என்.டி.ஏ கூட்டணியில் இருக்கும் 10-ல் ஒரு கட்சி என்றும், அதிமுக என்பது கட்சியே இல்லை என்றும் கோபிச்செட்டிபாளையத்தில் தவெக நிர்வாகக் குழு தலைமை ஒருங்கிணைப்பாளர் செங்கோட்டையன் தெரிவித்துள்ளார்.

தமிழக சட்டசபை தேர்தல் விரைவில் நடைபெற உள்ளது. தேர்தலுக்கு இன்னும் ஓரிரு மாதங்களே உள்ள நிலையில் அரசியல் கட்சிகள் தேர்தல் நடவடிக்கைகளை தீவிரப்படுத்தி வருகின்றன. பிரச்சாரம், கூட்டணி பேச்சுவார்த்தை, தொகுதி பங்கீடு, கட்சி நிர்வாகிகளுடன் ஆலோசனை என பல்வேறு நடவடிக்கைகளை அரசியல் கட்சிகள் மேற்கொண்டு வருகின்றன.

விஜய் தலைமையிலான தவெகவில், விருப்ப மனுக்கள் பெறப்பட்டு வருகின்றன. கட்சியில் தேர்தல் அறிக்கை தயாரிப்புக் குழு உள்ளிட்ட பல்வேறு குழுக்கள் அமைக்கப்பட்டுள்ளன. தவெக தலைவர் விஜய், தேர்தல் பிரச்சார பணிகளை தீவிரப்படுத்தி வருகிறார். சேலத்தில் வரும் 13 ஆம் தேதி பிரச்சாரக் கூட்டத்தில் பங்கேற்கிறார் விஜய்.

இந்நிலையில், ஈரோட்டில் இன்று தவெக நிர்வாகிகள் ஆலோசனை கூட்டம் நடைபெற்றது. இதில் தவெக மாநில நிர்வாகக் குழு தலைமை ஒருங்கிணைப்பாளர் செங்கோட்டையன் கலந்துகொண்டார். அதன்பின் செய்தியாளர்களைச் சந்தித்த செங்கோட்டையன், "தவெகவை பொறுத்தவரை எங்களுக்கு திமுகதான் எதிரி.

தேசிய ஜனநாயக கூட்டணியில் 10 கட்சிகளில் ஒன்று அதிமுக. அதிமுக ஒரு கட்சியே அல்ல. தவெக சார்பில் போட்டியிட நேற்று ஒரே நாளில் 10 ஆயிரம் பேர் விருப்ப மனு கொடுத்துள்ளனர். விருப்ப மனுவை ஆன்லைன் மூலம் பதிவு செய்யும் நிலை உருவாக்கப்பட்டுள்ளது.

ஏனென்றால் தலைமை அலுவலகம் அமைந்துள்ள பனையூர் பகுதியில் நிறைய பேர் குடியிருக்கிறார்கள். குடியிருப்புவாசிகளுக்கு இடையூறு ஏற்படுத்தக்கூடாது என்பதற்காக ஆன்லைன் மூலம் விருப்ப மனுவை பதிவு செய்ய ஏற்பாடுகள் நடைபெற்று வருகிறது" எனத் தெரிவித்துள்ளார்.

English summary

Regarding the TVK, only the DMK is the enemy, and the AIADMK is not even a proper party, said Sengottaiyan, the chief coordinator of the TVK executive committee.