ஓபிஎஸ் கூடாரம் காலி.. அதிமுக முன்னாள் அமைச்சர் கு.ப கிருஷ்ணன் விஜய்யின் தவெகவில் இணைந்தார்

சென்னை: அதிமுக முன்னாள் அமைச்சரும், ஓ பன்னீர் செல்வம் ஆதரவாளரான கு.ப கிருஷ்ணன் சற்று முன் தவெகவில் இணைந்துள்ளார். கடந்த 1991 முதல் 1996 வரை விவசாயத்துறை அமைச்சராக இருந்த இவர் தற்போது தவெகவில் விஜய் முன்னிலையில் இணைந்துள்ளார். ஓ பன்னீர் செல்வத்தின் ஆதரவாளர்கள் ஒவ்வொருவராக மாற்று கட்சியில் சேர்ந்து வரும் நிலையில் அமைச்சர், எம்.எல்.ஏ, பல்வேறு கட்சி அனுபவங்கள் கொண்ட இவர் தவெகவில் இணைந்தது கவனம் பெற்றுள்ளது.

தமிழக வெற்றிக் கழகத்தின் செயல் வீரர்கள் கூட்டம் இன்று சென்னை மாமல்லப்புரத்தில் நடந்தது. இதில் தவெக தலைவர் விஜய் கலந்துகொண்டு பேசினார். தனித்து நின்றாலும் நாம் தான் வெற்றி பெறுவோம் என்று விஜய் பேசினார்.

தவெகவில் இணைந்த கு.ப கிருஷ்ணன்

விஜய்யின் செயல்வீரர்கள் கூட்டம் முடிந்த நிலையில் ஓ பன்னீர் செல்வம் ஆதரவாளரான கு.ப கிருஷ்ணன் தவெகவில் இணைந்தார். விஜய்யின் முன்னிலையில் சென்னை மாமல்லப்புரத்தில் கு.ப கிருஷ்ணன் தன்னை தவெகவில் இணைத்துக் கொண்டார். ஓ பன்னீர் செல்வத்தின் ஆதரவாளர்கள் ஒவ்வொருவராக விலகி வரும் நிலையில் தற்போது கு ப கிருஷ்ணன் விஜய் கட்சியில் இணைந்து இருப்பது அரசியல் ரீதியாக கவனம் பெற்றுள்ளது.

எந்த பெரிய கட்சிகளும் தவெகவுடன் கூட்டணி வைக்காத நிலையில், ஜெயலலிதாவின் அமைச்சரவையில் பணியாற்றிய அனுபவம் உள்ள கு.ப கிருஷ்ணன் தவெகவில் இணைந்து இருப்பது தவெகவினருக்கு சற்று குஷியை கொடுத்துள்ளது. ஓ பன்னீர் செல்வம் ஆதரவாளரான மனோஜ் பாண்டியன் திமுகவில் இணைந்தார். இவரை தொடர்ந்து மருது அழகுராஜ் திமுகவில் இணைந்தார். பின்னர் வைத்தியலிங்கம், சுப்புரத்தினம் என அடுத்தடுத்து ஓ பன்னீர் செல்வம் ஆதரவாளர்கள் திமுகவில் இணைந்தனர்.

காலியாகும் ஓபிஎஸ் கூடாரம்

தேர்தலுக்கு இன்னும் சில காலங்களே உள்ள நிலையில் அடுத்தக் கட்ட நடவடிக்கை குறித்து எதுவும் சொல்லாமல் மவுனமாக இருந்ததாலும், யாருடன் கூட்டணி என்பதையும் சொல்லாமல் இருந்து வந்ததாலும் ஓ பன்னீர் செல்வத்தின் ஆதரவாளர்கள் ஒருவர் பின் ஒருவராக மாற்று கட்சியில் இணைந்து வருவதாக சொல்லப்படுகிறது. இதேபோன்று ஓ பிஎஸ் ஆதரவாளர் தர்மரும் அதிமுக பக்கம் தாவியுள்ளார்.

ஓபிஎஸ் அணியிலிருந்து முக்கிய நிர்வாகிகள் அனைவரும் வெளியேறியுள்ள நிலையில் அவரது கூடாரம் கிட்டத்தட்ட காலியாகிவிட்டதாகவே பார்க்கப்படுகிறது. ஓ பன்னீர் செல்வமும் அடுத்ததாக திமுகவில் இணைய உள்ளதாகவும் பரவலாக பேசப்படுகிறது. நேற்று திமுக அமைச்சர் சேகர்பாபுவுடன் ஓ பன்னீர் செல்வம் சந்திப்பு நடந்ததாகவும் கூறப்படுகிறது.

யார் இந்த கு.ப கிருஷ்ணன்?

விஜய்யின் தவெகவில் இணைந்துள்ள கு.ப கிருஷ்ணன் திருச்சி மாவட்டத்தைச் சேர்ந்தவர். தனது அரசியல் வாழ்க்கையை முதன் முதலாக அதிமுகவில்தான் ஆரம்பித்தார். அதிமுக சார்பில் போட்டியிட்டு வெற்றி பெற்ற அவர், ஜெயலலிதா ஆட்சியில் 1991 - 1996 வரை விவசாயத்துறை அமைச்சராக பதவி வகித்தார். பின்னர் அரசியல் கருத்து வேறுபாடு காரணமாக அதிமுகவில் இருந்து விலகினார்.

பின்னர் தமிழர் பூமி கட்சியை ஆரம்பித்தார். பின்னர் கட்சியை கலைத்துவிட்டு மீண்டும் அதிமுகவில் இணைந்தார். இதன் பிறகு விஜயகாந்த் கட்சி ஆரம்பித்தபோது அவருடன் இணைந்தார். பின்னர் அங்கிருந்து விலகி ஓ பன்னீர் செல்வத்தின் அதிமுகவில் இணைந்தார். ஆனால் சமீப ஆண்டுகளாக அரசியைல் இருந்து ஒதுங்கியே இருந்தார்.

இந்த நிலையில் 2026 சட்டசபை தேர்தல் களம் சூடுபிடிக்க தொடங்கிய நிலையில் விஜய் கட்சியில் இணைந்து உள்ளார். இவர் மீது ரூ.3.73 கோடி ஊழல் புகாரை லஞ்ச ஒழிப்பு போலீசார் தொடர்ந்தது. ஆனால் இந்த வழக்கில் போதிய ஆதாரங்கள் இல்லை என நீதிமன்றத்தால் விடுவிக்கப்பட்டார்.

English summary

K.P. Krishnan, a former AIADMK minister and supporter of O. Panneerselvam, has joined Tamilaga Vettri Kazhagam (TVK). He served as Agriculture Minister from 1991 to 1996. His move comes amid reports of several OPS supporters shifting to other parties. The development followed TVK’s functionaries’ meeting in Mamallapuram, where party leader Vijay expressed confidence in winning even if the party contests alone.