திடீரென மூச்சுத்திணறல்.. மருத்துவமனையில் அனுமதிக்கப்பட்ட பாஜக முன்னாள் நிர்வாகி கே.டி.ராகவன்!

Updated: Friday, March 24, 2023, 7:41 [IST]

Subscribe to Oneindia Tamil

சென்னை: பாஜக முன்னாள் நிர்வாகி கே.டி ராகவனுக்கு திடீரென மூச்சுத்திணறல் ஏற்பட்டதை அடுத்து அப்பல்லோ மருத்துவமனையில் அனுமதிக்கப்பட்டு தீவிர சிகிச்சை பெற்று வருகிறார்.

தமிழ்நாடு பாஜகவின் பொதுச் செயலாளராக இருந்தவர் கே.டி.ராகவன். பல ஆண்டுகளாக தொலைக்காட்சி விவாதங்களில் பங்கேற்று பாஜக சார்பாக கட்சியின் கருத்துக்களை அழுத்தமாக எடுத்து வைத்து வந்தார்.

இதன் காரணமாக தமிழ்நாடு பாஜகவின் முக்கிய நிர்வாகிகளில் ஒருவராக கே.டி.ராகவன் இருந்து வந்தார். இதனிடையே தமிழ்நாடு பாஜக தலைவராக அண்ணாமலை பதவியேற்றார்.

இந்த நிலையில் தமிழ்நாடு பாஜக பொதுச்செயலாளர் கே.டி.ராகவன் கடந்த 2021ஆம் ஆண்டு ஆபாச வீடியோ விவகாரத்தில் சிக்கினார். இதில் ஏற்பட்ட சர்ச்சையில் தனது பொதுச்செயலாளர் பதவியில் இருந்து கே.டி.ராகவன் விலகினார். அதன்பின்னர் தீவிர அரசியலில் இருந்து கொஞ்சம் விலகியே இருந்து வருகிறார். அந்த விவகாரத்திற்கு பின் எந்த அரசியல் நிகழ்ச்சியிலும் கே.டி.ராகவன் பங்கேற்கவில்லை.

இந்த நிலையில் கே.டி.ராகவனுக்கு திடீரென்று மூச்சுத்திணறல் ஏற்பட்டு இருக்கிறது. இதை அடுத்து அவரை சென்னையில் உள்ள தனியார் மருத்துவமனையில் அனுமதிக்கப்பட்டுள்ளார். மருத்துவமனையில் கே.டி.ராகவன் தீவிர சிகிச்சை பிரிவில் அனுமதிக்கப்பட்டிருக்கிறார். மருத்துவர்கள் ராகவனுக்கு தொடர்ந்து சிகிச்சை அளித்து வருகின்றனர். கே.டி.ராகவனுக்கு நாளை இதய அறுவை சிகிச்சை நடைபெற இருப்பதாகவும் தகவல்கள் வெளியாகி இருக்கின்றன.

இதனிடையே மருத்துவமனையில் அனுமதிக்கப்பட்டுள்ள கே.டி.ராகவனை அவரது அரசியல் நண்பர்கள் சந்தித்து உடல்நலம் குறித்து கேட்டறிந்து வருவதாக தகவல் வெளியாகியுள்ளது. கே.டி.ராகவனுக்கு உதவியாக அவரது குடும்பத்தினர் மருத்துவமனையில் உள்ளனர். இதே மருத்துவமனை திமுக எம்பி கனிமொழியின் கணவர் அரவிந்தன் சிகிச்சைப் பெற்று வருவது குறிப்பிடத்தக்கது.