மாமாவுக்காக பெரும் பட்டாளத்தையே இறக்கிய மாப்பிள்ளை! புது தெம்புடன் எடப்பாடி பழனிசாமி!

சென்னை: அதிமுக இணை ஒருங்கிணைப்பாளர் எடப்பாடி பழனிசாமியை ஒரு பெரும் பட்டாளத்துடன் நேரில் சந்தித்து ஆதரவு கரம் நீட்டியுள்ளார் முன்னாள் அமைச்சர் சிவபதி.

எடப்பாடி பழனிசாமியும் முன்னாள் அமைச்சர் சிவபதியும் இன்று நேற்றல்ல ஆரம்பகால அறிமுகம் முதல் ''மாமா'' ''மாப்பிள்ளை'' என ஒருவருக்குக்கு ஒருவர் உரிமையுடன் அழைத்துக் கொள்ளக்கூடியவர்கள்.

கடந்த 2 நாட்களாக தமிழகமெங்கும் இருந்து முக்கிய நிர்வாகிகள் பலர் நேரில் வந்து சந்தித்து ஆதரவு தெரிவிப்பதால் எடப்பாடி பழனிசாமி புது தெம்பு பெற்றிருப்பதாக தெரிவிக்கப்படுகிறது.

எம்ஜிஆர் இளைஞரணி

முன்னாள் அமைச்சரும், எம்ஜிஆர் இளைஞரணி மாநிலச் செயலாளருமான சிவபதி சென்னை பசுமை வழிச்சாலையில் உள்ள எடப்பாடி பழனிசாமி வீட்டுக்கு பேரணியாக சென்று தனது ஆதரவை தெரிவித்துள்ளார். நூற்றுக்கணக்கான நிர்வாகிகளுடன் எடப்பாடி பழனிசாமி வீட்டை நோக்கி சிவபதி பேரணியாக சென்றது அங்கிருந்தவர்கள் மத்தியில் கவனம் ஈர்த்தது.

மாமா -மாப்பிள்ளை

90 களிலேயே எடப்பாடி பழனிசாமிக்கும் சிவபதிக்கும் அறிமுகம் ஏற்பட்டதால், ஆரம்பக்காலம் முதலே ''மாமா'' ''மாப்பிள்ளை'' என இருவரும் ஒருவரை ஒருவர் உரிமையுடன் அழைத்துக் கொள்ளக் கூடியவர்கள். சிவபதி தனக்கு தான் ஆதரவாக நிற்பார் என்பது எடப்பாடி பழனிசாமிக்கு தெரியும். ஆனால் அதற்கென்று இப்படி ஒரு பெரும் பட்டாளத்தையே அணிதிரட்டி வந்து மாஸ் காட்டுவார் என்பதை எடப்பாடி பழனிசாமி சற்றும் எதிர்பார்க்கவில்லையாம்.

சிவபதியை போல்

சிவபதியை போல் இன்னும் பல எடப்பாடி ஆதரவு முக்கிய நிர்வாகிகள் கடந்த இரண்டு நாட்களாக தங்கள் ஆதரவை தெரிவிக்க படையெடுத்த வண்ணம் உள்ளனர். இதனால் எடப்பாடி பழனிசாமி மிகுந்த உற்சாகம் அடைந்திருப்பதோடு புது தெம்பும் பெற்றிருப்பதாக தெரிவிக்கப்படுகிறது.

முழு ஆதரவு

எடப்பாடி பழனிசாமியை சந்தித்த பிறகு பேட்டியளித்த முன்னாள் அமைச்சர் சிவபதி, எம்ஜிஆர் இளைஞரணி மாநில மாவட்ட நிர்வாகிகள் அனைவரும் ஏக மனதாக எடப்பாடி பழனிசாமிக்கு தங்களது ஆதரவை தெரிவித்துள்ளதாகவும் ஒற்றைத் தலைமை விவகாரத்தில் எடப்பாடி பழனிசாமியுடன் ஓ.பன்னீர்செல்வம் ஒன்றிணைந்து செல்வதே அவருக்கு நல்லது எனவும் கூறினார். 4 ஆண்டுகாலம் அதிமுக ஆட்சியை கட்டிக்காத்தவர் என்ற பெருமைக்கு சொந்தக்காரர் இபிஎஸ் என புகழாரம் சூடினார்.

English summary

Ex minister Sivapathi has expressed support for EPS: அதிமுக இணை ஒருங்கிணைப்பாளர் எடப்பாடி பழனிசாமியை ஒரு பெரும் பட்டாளத்துடன் நேரில் சந்தித்து ஆதரவு கரம் நீட்டியுள்ளார் முன்னாள் அமைச்சர் சிவபதி.