திமுகவிலிருந்து அடுத்த விக்கெட்.. பாஜகவில் இணைந்தார் முன்னாள் எம்பி கே.பி. ராமலிங்கம்..!

பாஜகவில் இணைந்தார் கே பி ராமலிங்கம்

சென்னை: திமுக முன்னாள் எம்பி. கே.பி. ராமலிங்கம் இன்று பாஜகவில் தன்னை இணைத்து கொண்டார்.. பாஜக தலைமை அலுவலகத்தில் நடந்த நிகழ்ச்சியில், கேபி ராமலிங்கம் பாஜகவில் இணைந்தார்.

முக அழகிரியின் ஆதரவாளரும், திமுகவின் முன்னாள் எம்பியுமான கே.பி. ராமலிங்கம் கடந்த ஏப்ரல் மாதம் திமுகவிலிருந்து நீக்கப்பட்டார்... கருணாநிதியின் மறைவுக்கு பிறகு திமுக தலைவராக பொறுப்பேற்ற ஸ்டாலின், கருணாநிதி போன்று திறமையாக கட்சியை வழிநடத்தவில்லை என்று பகிரங்கமாகவே ராமலிங்கம் குற்றஞ்சாட்டி இருந்தார்.

மேலும், திமுக மீது பல்வேறு குற்றச்சாட்டுகளை முன்வைத்தபடியே இருந்த நிலையில், தமிழக பாஜக தலைவர்களையும் சந்தித்து பேசினார்.. இதையடுத்து கே.பி. ராமலிங்கம் திமுகவின் அடிப்படை உறுப்பினர் உள்ளிட்ட அனைத்து பதவிகளிலிருந்தும் அதிரடியாக நீக்கப்பட்டார்.

எனினும், பாஜகவில் ராமலிங்கம் இணையாமலேயே இருந்தார்.. அதேசமயம் பாஜகவின் எல்லா நிகழ்ச்சிகளிலும் கலந்து கொண்டு வந்தார்.. இந்நிலையில்தான், அமித்ஷாவின் சென்னை வருகையின்போது, ராமலிங்கம் பாஜகவில் இணைவார் என்ற செய்தி கசிந்து வந்தது.. அதற்கேற்றபடி, இன்று ராமலிங்கம் பாஜகவில் இணைவார் என்பதையும் அக்கட்சி நேற்று அதிகாரப்பூர்வமாக உறுதிப்படுத்தி இருந்தது.

அதன்படியே, திமுகவில் இருந்து நீக்கப்பட்ட கே.பி. ராமலிங்கம் தமிழக பாஜக பொறுப்பாளர் சி.டி. ரவி, இணை பொறுப்பாளர் சுதாகர் ரெட்டி முன்னிலையில் இன்று பாஜகவில் இணைந்தார்.. ராமலிங்கத்துக்கு அடிப்படை உறுப்பினர் அட்டையை பாஜக பொறுப்பாளர் சிடி ரவி வழங்கினார்.. சென்னையில் உள்ள பாஜக தலைமை அலுவலகமான கமலாலயத்தில் நடந்த நிகழ்ச்சியில் இந்த இணைப்பு நடந்தது.

ஏற்கனவே திமுக தலைமையுடனான பிரச்சினையில் எம்எல்ஏ குகசெல்வம் பாஜகவில் இணைந்த நிலையில், ராமலிங்கத்தின் இந்த ஐக்கியம் பெரிதும் முக்கியத்துவம் வாய்ந்ததாக கருதப்படுகிறது.. திமுகவின் சீனியர்கள் அதிருப்தி காரணமாக ஒவ்வொருவராக விலகுவதும், விலகுபவர்கள் பாஜகவில் இணைவதும், பாஜகவை பலப்படுத்துகிறதோ இல்லையோ, ஆனால், திமுகவை பலவீனப்படுத்தி வருகிறது என்பதையும் மறுக்க முடியாது.

English summary

Former MP KP Ramalingam joins in BJP today