இத்தனை இடங்களா.. சூப்பர்.. சென்னையில் திறக்கப்படும் புதிய பேருந்து நிலையங்கள்! எங்கெல்லாம் தெரியுமா?

Updated: Thursday, September 18, 2025, 9:42 [IST]

Subscribe to Oneindia Tamil

சென்னை: சென்னையின் பொதுப் போக்குவரத்து மையங்களை தனியார் வசம் ஒப்படைத்து, புனரமைக்கும் திட்டம் தொடங்கப்பட்டுள்ளது. பொது-தனியார் கூட்டாண்மை (PPP) மாதிரியின் கீழ், பேருந்து நிலையங்களின் பராமரிப்புப் பணிகளை அடுத்த மூன்று ஆண்டுகளுக்கு தனியார் நிறுவனங்கள் மேற்கொள்ளவுள்ளன.

17.34 கோடி ரூபாய் செலவில் கட்டப்பட்ட அம்பத்தூர் பேருந்து நிலையம் அடுத்த மாத தொடக்கத்தில் முதலமைச்சர் மு.க. ஸ்டாலினால் திறந்து வைக்கப்படவுள்ளது. 1.6 ஏக்கர் பரப்பளவில் அமைந்துள்ள இந்த நிலையத்தில், 20க்கும் மேற்பட்ட பேருந்து நிறுத்தங்களும், 26,000 சதுர அடியில் மாநகரப் போக்குவரத்துக் கழகத்தின் நிர்வாக அலுவலகமும் அமையவுள்ளன.

சென்னை பேருந்து நிலையம்

கடந்த ஆகஸ்ட் 25 அன்று திரு.வி.க. நகர் மற்றும் பெரியார் நகரில் இரண்டு புதிய பேருந்து நிலையங்கள் திறக்கப்பட்டன. சுமார் 18 கோடி ரூபாய் செலவில் கட்டப்பட்ட இந்த நிலையங்களில் 24 பேருந்து நிறுத்தங்கள், 20 கடைகள், கழிப்பறைகள் மற்றும் காத்திருப்புப் பகுதிகள் அமைந்துள்ளன.

இந்த ஆண்டு மேலும் பல திட்டங்கள் வரிசையில் உள்ளன. இதில் அக்டோபரில் 97 கோடி ரூபாய் மதிப்பிலான செங்கல்பட்டு பேருந்து நிலையம், பெரம்பூரில் 8.1 கோடி ரூபாய் மதிப்பிலான முல்லை நகர் நிலையம் ஆகியவை அடங்கும். நவம்பரில் 14.36 கோடி ரூபாய் செலவில் கண்ணதாசன் நகர் நிலையமும், டிசம்பரில் 31.42 கோடி ரூபாய் செலவில் தண்டையார்பேட்டை பணிமனையின் நவீனமயமாக்கலும் திட்டமிடப்பட்டுள்ளன.

பெரம்பூர், ராயபுரம், கொளத்தூர், துறைமுகம் ஆகிய இடங்களில் தலா 2 கோடி ரூபாய் செலவில் அமைக்கப்படும் நான்கு சிறிய பேருந்து நிறுத்தங்களும் டிசம்பர் மாதத்திற்குள் தயாராகிவிடும். பெரிய திட்டங்கள் 2026-ஆம் ஆண்டுக்காகக் காத்திருக்கின்றன.

புதிய பேருந்து நிலையம்

2026 பிப்ரவரியில் 90.5 கோடி ரூபாய் மதிப்பிலான மாமல்லபுரம் பேருந்து நிலையம், அக்டோபரில் 414 கோடி ரூபாய் மதிப்பிலான குத்தம்பாக்கம் புறநகர் பேருந்து நிலையம் ஆகியவை திறக்கப்படும். அய்யப்பன்தாங்கல், திருவான்மியூர், ஆவடி, பாடியநல்லூர், வள்ளலார் நகர் ஆகிய இடங்களில் ஏப்ரல் முதல் மே 2026 வரை மறுசீரமைப்புப் பணிகள் மேற்கொள்ளப்படும்.

PPP மாதிரியின் கீழ், தனியார் நிறுவனங்கள் தூய்மைப் பணிகள், பழுது நீக்குதல், வர்ணம் பூசுதல் மற்றும் கழிப்பறைப் பராமரிப்பு போன்றவற்றை மேற்கொள்ளும். கடைகள், வாகன நிறுத்தம் மற்றும் விளம்பரங்கள் மூலம் வருவாய் ஈட்டும். இந்த அமைப்பு, மாநகராட்சியால் நடத்தப்படும் நிலையங்களில் காணப்படும் பராமரிப்பின்மையைத் தடுக்கும் என அதிகாரிகள் கூறுகின்றனர்.

பிராட்வே பேருந்து நிலையம்

அதேபோல் ராயபுரம் ரயில் நிலையம் அருகே 3.45 ஏக்கர் பரப்பளவில் அனைத்து வசதிகளுடன் அமைக்கப்பட்டிருக்கும் தற்காலிக பேருந்து நிலையம் விரைவில் திறக்கப்படும் என்று அறிவிக்கப்பட்டு உள்ளது.

பிராட்வே பல்நோக்கு ஒருங்கிணைந்த போக்குவரத்து வளாகம் அமைக்கும் பணிகள் நடைபெறுவதால், மாற்றாக, புதிய தற்காலிக பேருந்து நிலையம்
📍 இப்ராஹிம் தெருவுக்கும், ராயபுரம் ரயில் நிலையத்துக்கும் இடையில்
✅ நிழற்குடை, அமர்விடம்
✅ கழிப்பறை வசதி
✅ மாற்றுத் திறனாளிகளுக்கான சாய்தளம் ஆகிய வசதிகளுடன் அமைக்கப்பட்டிருக்கிறது.

சென்னை பிராட்வே பேருந்து நிலையத்தை புனரமைக்கும் பணி ஆகஸ்ட் மாதத்தில் துவங்க உள்ளது. இதையொட்டி, ராயபுரம் பகுதியில் இப்ராஹிம் சாலையின் அருகில் தற்காலிக பேருந்து நிலையம் அமைக்கப்பட்டுள்ளது. இப்பணி வெகு விரைவில் தொடங்கப்படும் என எதிர்பார்க்கப்படுகிறது.

பிராட்வேயை மாற்றியமைக்கும் வகையில் பல்நோக்கு ஒருங்கிணைந்த பேருந்து முனையம், போக்குவரத்து வளாகம் மற்றும் குறளகம் கட்டிடம் கட்டப்படும் என்று அறிவிக்கப்பட்டு உள்ளது.

திட்டத்தின் சிறப்பம்சங்கள்;

• இந்த வளாகம், நகரத்தின் பல பகுதிகளிலிருந்து எளிதாக அணுகக்கூடிய வகையில் அமைக்கப்பட்டுள்ளது. இது உயர் நீதிமன்றம் மெட்ரோ நிலையத்துடன் தடையில்லா ஒருங்கிணைப்பை வழங்கும் வகையில், நடைமேம்பாலம் (Foot Overbridges) மற்றும் சுரங்கப்பாதை வசதிகளுடன் அமைக்கப்படும்.
• இந்த திட்டத்திற்கான மொத்த பரப்பளவு 6.484 ஏக்கர். பல்நோக்கு ஒருங்கிணைந்த போக்குவரத்து பேருந்து வளாக கட்டிடம் மொத்தம் 1,08,290.01 சதுர மீட்டர் பரப்பளவைக் கொண்டிருக்கும். இதில் இரண்டு அடித்தள நிலைகள், ஒரு தரைத்தளம் மற்றும் எட்டு மேல் தளங்கள் அடங்கும்.
• புதுப்பிக்கப்படும் குறளகம் கட்டடம் மொத்தமாக 22,794 சதுர மீட்டர் கட்டிட பரப்பளவைக் கொண்டதாக இருக்கும். இதில் இரண்டு அடித்தள நிலைகள், தரைத்தளம் மற்றும் 9 மேல் தளங்கள் உள்ளன.
• இந்த திட்டத்தில், போக்குவரத்து வசதிகள் (Paratransit Facilities), சுரங்கபாதைகள், வெளிப்புற நடைபாதைகள் (External Foot Overbridges) மற்றும் உட்புற மூடப்பட்ட நடைபாதைகள் (Internal Covered Pathways) ஆகிய பிரத்யேக இடங்களும் அடங்கும், முழுத் திட்டத்திற்கும் மொத்தமாக 1,36,580.37 சதுர மீட்டர் பரப்பளவைக் கொண்டிருக்கும்.