தவெக-வில் சேர்ந்த 3 நாளில் எம்.எல்.ஏ சீட் கொடுத்த விஜய்.. உதயநிதி தொகுதியில் களமிறங்கும் செல்வம்!
சென்னை: கடந்த மார்ச் 25 ஆம் தேதி காங்கிரஸ் கட்சியில் இருந்து சஸ்பெண்ட் செய்யப்பட்ட செல்வம், அடுத்த நாளே விஜய்யை சந்தித்து தவெகவில் இணைந்தார். இந்நிலையில், செல்வம் தற்போது சேப்பாக்கம் - திருவல்லிக்கேணி தொகுதியில் துணை முதல்வர் உதயநிதி ஸ்டாலினை எதிர்த்துப் போட்டியிடும் தவெக வேட்பாளராக செல்வம் அறிவிக்கப்பட்டுள்ளார்.
தமிழகத்தில் வரும் ஏப்ரல் 23 ஆம் தேதி வாக்குப்பதிவு நடைபெறுகிறது. தேர்தல் நாள் நெருங்கி வரும் நிலையில், அரசியல் கட்சிகள் தொகுதி பங்கீடு, வேட்பாளர்கள் அறிவிப்பு, பிரச்சாரம் என பம்பரமாக சுழலத் தொடங்கியுள்ளன. இந்த முறை தமிழகத்தில் 5 முனை போட்டி ஏற்பட்டுள்ளது. விஜய்யின் தமிழக வெற்றிக் கழகம் தனித்து தேர்தலை சந்திக்கிறது.
நடிகர் விஜய் தலைமையிலான தமிழக வெற்றிக் கழகத்தின் வேட்பாளர்கள் அறிமுக கூட்டம் சென்னையில் இன்று நடைபெற்றது. சென்னை நுங்கம்பாக்கத்தில் உள்ள நட்சத்திர விடுதியில் நடைபெற்ற நிகழ்ச்சியில் 234 தொகுதிகளிலும் போட்டியிடும் வேட்பாளர்களை விஜய் அறிமுகம் செய்து வைத்தார்.
அதன்படி, சென்னை சேப்பாக்கம் - திருவல்லிக்கேணி தொகுதியில் செல்வம் வேட்பாளராக அறிவிக்கப்பட்டுள்ளார். சேப்பாக்கம் - திருவல்லிக்கேணி தொகுதி, துணை முதலமைச்சர் உதயநிதி ஸ்டாலின் மீண்டும் போட்டியிடும் தொகுதி என்பதால் ஸ்டார் அந்தஸ்தைப் பெற்றுள்ளது. இங்கு அதிமுக சார்பில் ஆதிராஜாராம் போட்டியிடுகிறார். இந்நிலையில் தவெக சார்பில் செல்வம் போட்டியிடுவார் என அறிவித்துள்ளார் விஜய்.
இந்த செல்வம் வேறு யாரும் அல்ல. கடந்த 25 ஆம் தேதி காங்கிரஸ் கட்சியில் இருந்து சஸ்பெண்ட் செய்யப்பட்டவர் தான் இந்த செல்வம். அடுத்த நாளே தவெக தலைவர் விஜய்யை பனையூரில் சந்தித்து தவெகவில் தன்னை இணைத்துக் கொண்டார் செல்வம். காங்கிரஸ் கட்சியின் மாநில பொதுச் செயலாளராக இருந்த டி செல்வம் தன்னை தவெகவில் இணைத்துக் கொண்டார்.
இந்நிலையில், காங்கிரஸ் கட்சியில் இருந்து விலகி தவெகவில் இணைந்த அடுத்த 3 நாட்களில் பி.டி.செல்வத்தை வேட்பாளராக அறிவித்துள்ளார் விஜய். அதுவும், உதயநிதி ஸ்டாலின் போட்டியிடும் தொகுதியில் டி.செல்வம் வேட்பாளர் ஆகியுள்ளது கவனம் பெற்றுள்ளது.
Click it and Unblock the Notifications
Sign in with Google