கையில் கறுப்பு-சிவப்பு கயிறு.. பாக்கெட்டில் ஸ்டாலின் படம்! தென்மாவட்டங்களில் அடித்து தூக்கும் ஓபிஎஸ்

சென்னை: அரசியலில் நிரந்தர எதிரியும் இல்லை, நிரந்தர நண்பனும் இல்லை என்பதற்கு ஓ.பன்னீர்செல்வம் ஒரு நடமாடும் சாட்சியமாகி நிற்கிறார். அண்ணா தி.மு.க-வின் 'பணிவு' அரசியலுக்குப் பெயர் போனவர், இப்போது தி.மு.க-வின் 'துணிவு' அரசியலுக்குப் பக்கபலமாக தென்மாவட்டங்களில் புயலெனச் சுழன்று கொண்டிருப்பதுதான் இன்றைய கோட்டை வட்டாரத்தின் ஹாட் டாபிக்.

கறுப்பு-சிவப்பு சென்டிமென்ட்!

சமீபகாலமாக ஓ.பி.எஸ்ஸைப் பார்ப்பவர்கள் ஆச்சரியத்தில் புருவம் உயர்த்துகிறார்கள். எப்போதும் கைகளில் ஆன்மிகக் கயிறுகளுடனும், நெற்றியில் திலகத்துடனும் வலம் வரும் ஓ.பி.எஸ், இப்போது கைகளில் பளிச்சென கறுப்பு-சிவப்பு நிறக் கயிறை அணிந்து வலம் வருகிறார்.

அதுமட்டுமல்ல, அவர் சட்டையிலுள்ள மேல் பாக்கெட்டை எட்டிப்பார்த்தால், முன்னால் ஜெயலலிதா படம் இருந்த இடத்தில் இப்போது புன்னகைக்கிறார் முதலமைச்சர் மு.க. ஸ்டாலின். "தலைவர் மேல பாசம் காட்டுறதுல பன்னீருக்கு நிகர் பன்னீர்தான்" என உடன்பிறப்புகளே சிலாகிக்கும் அளவுக்கு தி.மு.க-வின் ரத்தமும் சதையுமாக மாறிப்போயிருக்கிறார் அவர்.

தெற்கில் வீசும் 'பன்னீர்' காற்று

தனது சொந்தத் தொகுதியில் மட்டும் கவனம் செலுத்தாமல், தென்மாவட்டங்கள் முழுவதிலும் ஓ.பி.எஸ் மேற்கொள்ளும் களப்பணிகள் தி.மு.க-வுக்குப் பெரும் 'வேல்யூ ஆட்' ஆக அமைந்திருக்கிறது.

சமூக வாக்கு வங்கி: தென்மாவட்டங்களில் ஒரு குறிப்பிட்ட சமூகத்தின் வாக்குகள் சிதறாமல் தி.மு.க-வுக்கு வந்து சேர, ஓ.பி.எஸ்ஸின் பிரசாரம் ஒரு பெரிய பாலமாக இருக்கிறது.

நிதானமான பேச்சு: அ.தி.மு.க-வின் உட்கட்சி விவகாரங்களை விட, தி.மு.க அரசின் சாதனைகளை அவர் பட்டியலிடும் விதம் நடுநிலை வாக்காளர்களைக் கவர்கிறது.

மரியாதை நிமித்தமான அணுகுமுறை: தி.மு.க சீனியர் அமைச்சர்களுடன் ஈகோ பார்க்காமல் ஒருங்கிணைந்து செயல்படுவது அறிவாலயத் தலைமையையும் குஷிப்படுத்தியுள்ளது.

தொகுதியில் என்ன செய்கிறார்?

போடிநாயக்கனூர் தொகுதியைப் பொறுத்தவரை, ஓ.பி.எஸ்ஸின் வரவு இந்தத் தேர்தலை ஒரு மகா யுத்தமாக மாற்றியிருக்கிறது. கடந்த மூன்று தேர்தல்களில் அ.தி.மு.க-வின் 'பணிவு' முகமாக வெற்றிக் கனியைப் பறித்தவர், இந்த முறை உதயசூரியன் சின்னத்தில் களம் இறங்குவது தொகுதி மக்களிடையே பெரும் விவாதத்தையே ஏற்படுத்தியுள்ளது. அ.தி.மு.க-வின் கோட்டையாகக் கருதப்படும் போடியில், தன் சொந்த செல்வாக்கையும் தி.மு.க-வின் வாக்கு வங்கியையும் இணைத்து 'ஹாட்ரிக்' அடிக்கும் முனைப்பில் அவர் இருக்கிறார். குறிப்பாக, தொகுதியில் அவர் செய்துள்ள அடிப்படை வசதிகள் மற்றும் நலத்திட்டங்களை முன்வைத்து, "நான் எப்போதும் உங்கள் வீட்டுப் பிள்ளைதான், சின்னம் மாறினாலும் சேவை மாறாது" என்கிற பாணியில் அவர் பிரசாரத்தை முன்னெடுத்து வருகிறார்.

மறுபுறம், போடியில் களம் அனல் பறக்கிறது. அ.தி.மு.க தரப்பில் ஆர்.பி. உதயகுமார் போன்ற சீனியர்கள் முகாமிட்டு, "அம்மாவால் அடையாளம் காட்டப்பட்டு, இப்போது துரோகம் செய்துவிட்டு தி.மு.க-வுக்குச் சென்றவருக்கு மக்கள் பாடம் புகட்டுவார்கள்" என அனல் தெறிக்கப் பிரசாரம் செய்து வருகின்றனர். அ.தி.மு.க-வின் வேட்பாளர் வி.டி. நாராயணசாமி, ஓ.பி.எஸ்-ஐ 50,000 வாக்குகள் வித்தியாசத்தில் வீழ்த்துவோம் எனச் சபதமேற்றுள்ளார். பாக்கெட்டில் ஸ்டாலின் படம், கையில் கறுப்பு-சிவப்பு கயிறு என முழுமையாகத் தி.மு.க நிறத்தில் மாறியிருக்கும் ஓ.பி.எஸ்-ஐ, பழைய அ.தி.மு.க விசுவாசிகள் ஏற்பார்களா அல்லது தி.மு.க-வின் புதிய ரத்தம் அவருக்குப் பாய்ச்சப்படுமா என்பதுதான் மே 4-ம் தேதி வெளியாகும் தேர்தல் முடிவுகளின் மில்லியன் டாலர் கேள்வி!

தி.மு.க-வின் துருப்புச் சீட்டு?

தேர்தல் களத்தில் எடப்பாடி பழனிசாமிக்கு செக் வைக்கவும், தென்மண்டல வாக்குகளை ஒட்டுமொத்தமாக அறுவடை செய்யவும் ஓ.பி.எஸ்ஸை ஒரு முக்கியமான துருப்புச் சீட்டாகவே தி.மு.க கருதுகிறது.

"எங்கள் கூட்டணியில் அவர் இணைந்தது வெறும் அரசியல் கணக்கு மட்டுமல்ல, அது ஒரு பலமான சமூகக் கூட்டணி" என்கிறார் ஒரு சீனியர் தி.மு.க நிர்வாகி.

என்னதான் விமர்சனங்கள் வந்தாலும், "வாழு... வாழ விடு..." என்கிற பாணியில் பன்னீர்செல்வம் காட்டும் வேகம், எதிர்முகாமைச் சற்று யோசிக்க வைத்திருக்கிறது என்பது மட்டும் நிஜம். மே மாதம் தேர்தல் முடிவுகள் வரும்போது, இந்த 'கறுப்பு-சிவப்பு' கயிறு அவருக்கு எந்த அளவுக்குக் கைகொடுத்திருக்கிறது என்பது தெரிந்துவிடும்!

English summary

From Loyal Aide to Rising Sun: Analyzing O. Panneerselvam's Massive Value-Add to the DMK Campaign