நெருங்கிய கெடு.. ‛கேஷ் ஆன் டெலிவரி’க்கு இனி ரூ.2000 நோட்டு வாங்கமாட்டோம்! அமேசான் அறிவிப்பு! ஏன்?

சென்னை: அமேசான் நிறுவனத்தில் கேஷ் ஆன் டெலிவரியில் பொருட்கள் வாங்குவோரிடம் இருந்து ரூ.2,000 நோட்டுகளை இனி வாங்கமாட்டோம் என குறிப்பிட்ட தேதியை சொல்லி அந்த நிறுவனம் புதிய அறிவிப்பை வெளியிட்டுள்ளது.

இந்தியாவில் கடந்த 2016 நவம்பர் மாதம் ரூ.1000, ரூ.500 நோட்டுகள் செல்லாது என அறிவிக்கப்பட்டது. அன்றைய தினம் பிரதமர் மோடி தொலைக்காட்சியில் தோன்றி இந்த அறிவிப்பை வெளியிட்டார். இதையடுத்து புதிதாக ரூ.500, ரூ.2000 நோட்டுகள் அச்சிடப்பட்டு மக்கள் பயன்பாட்டுக்கு புழக்கத்தில் விடப்பட்டது.

இந்நிலையில் தான் கடந்த மே மாதம் இந்திய ரிசர்வ் வங்கி சார்பில் ரூ.2000 நோட்டுகள் வாபஸ் பெறப்படுவதாக அறிவிக்கப்பட்டது. அதோடு ரூ.2 ஆயிரம் நோட்டுகளை வங்கிகள் மூலம் மாற்றலாம் என செப்டம்பர் மாதம் 30ம் தேதி வரை காலஅவகாசம் வழங்கியது.

இதையடுத்து பொதுமக்கள் தங்களிடம் உள்ள ரூ.2 ஆயிரம் நோட்டுகளை வங்கிகளில் வழங்கி மாற்றி வருகின்றனர். அதோடு பலரும் ரூ.2 ஆயிரம் நோட்டுகளை வங்கிகளில் டெபாசிட் செய்து வருகின்றனர். இன்னும் சிலர் கடைகள், ஆன்லைன் வர்த்தக நிறுவனங்களில் பொருட்கள் வாங்கும்போது வழங்கி மாற்றி கொள்கின்றனர்.

இந்நிலையில் தான் அமேசான் நிறுவனம் இன்று முக்கிய அறிவிப்பை வெளியிட்டுள்ளது. அதன்படி, ‛‛வரும் செப்டம்பர் மாதம் 19ம் தேதி முதல் ரூ.2000 நோட்டுகளை அமேசான் நிறுவனம் கேஷ் ஆன் டெலிவரி முறையில் வாங்கி கொள்ளாது'' என தெரிவித்துள்ளது. அதேநேரத்தில் ‛‛மூன்றாவவது தரப்பு கூரியர் நிறுவனம் மூலம் அமேசான் பொருட்களை வாங்கினால் ஏற்றுக்கொள்ளப்படலாம்'' எனவும் தெரிவித்துள்ளது.

தற்போதைய சூழலில் ரிசர்வ் வங்கி ரூ.2000 நோட்டுகளை வாபஸ் பெறுவதாக அறிவித்து அதனை திரும்ப பெற்று வருகிறது. அந்த வகையில் செப்டம்பர் மாதம் 1ம் தேதி நிலவரப்படி 93 சதவீதத்துக்கும் அதிகமான ரூ.2000 நோட்டுகள் புழக்கத்தில் இருந்து திரும்ப பெறப்பட்டு விட்டதாக ரிசர்வ் வங்கி அறிவித்து இருந்தது. இன்னும் 7 சதவீத அளவிலான ரூ.2000 நோட்டுகள் திரும்ப வர வேண்டி இருப்பதாக கூறியது.

மேலும் கடந்த ஆகஸ்ட் 31ம் தேதி வரை திரும்ப பெறப்பட்ட ரூ.2000 நோட்டுகளின் மதிப்பு என்பது ரூ.3.32 லட்சம் கோடியாக இருக்கிறது என ரிசர்வ் வங்கி தெரிவித்து இருந்தது. அதோடு வங்கிகள் மூலம் திரும்ப பெறப்பட்டுள்ள நோட்டுகளில் 87 சதவீதம் வரை டெபாசிட்டாகவும், 13 சதவீத நோட்டுகள் ரூ.2000க்கு நிகரான பிற நோட்டுகளை வழங்கும் வகையில் மாற்றம் செய்யப்பட்டுள்ளதாகவும் தெரிவிக்கப்பட்டுள்ளது.

இத்தகைய சூழலில் தான் அமேசான் நிறுவனம் கேஷ் ஆன் டெலிவரி முறையில் செப்டம்பர் மாதம் 19ம் தேதியில் இருந்து ரூ.2000 நோட்டுகளை வாங்க மாட்டோம் என தெரிவித்துள்ளது. இதனால் அமேசானில் பொருட்கள் வாங்குவோர் விழிப்போடு இருக்க வேண்டும் என்பது குறிப்பிடத்தக்கது.

English summary

The Amazon company has issued a new notification that from the 19th, they will not buy Rs.2,000 notes from the cash on delivery customers.