விஜய் கட்சியில் காயத்ரி ரகுராம் இணைகிறாரா? காட்டுத்தீபோல் வரும் தகவல் - அவரே கொடுத்த விளக்கம்

சென்னை: விஜய் தொடங்கி இருக்கும் தமிழக வெற்றி கழகத்தில் நடிகை காயத்ரி ரகுராம் இணைய இருப்பதாக சமூக வலைதளங்களில் தகவல் வெளியான நிலையில் அது குறித்து அவர் விளக்கம் அளித்து இருக்கிறார்.

கடந்த ஆண்டு பாஜகவில் இருந்து வெளியேறிய நடிகையும் நடன இயக்குநருமான காயத்ரி ரகுராம், தமிழ்நாடு பாஜக தலைவர் அண்ணாமலையையும், பாஜகவையும் கடுமையாக சமூக வலைதளங்களில் விமர்சித்து பதிவுகளை வெளியிட்டு வருகிறார். திமுகவையும், தமிழக அரசையும், திமுக கூட்டணி கட்சிகளையும் ஆதரித்து பதிவுகளை வெளியிட்டு வந்த அவர் திமுகவில் இணைய முனைப்பு காட்டி வருவதாக கூறப்பட்டது.

இந்த நிலையில் அண்மையில் அதிமுக பொதுச்செயலாளர் எடப்பாடி பழனிசாமியை அவர் சந்தித்து அக்கட்சியில் இணைந்தார். தொடர்ந்து சமூக வலைதளங்களில் அதிமுகவுக்கு ஆதரவாக அவர் பதிவிட்டும் வருகிறார். இந்த நிலையில் கடந்த சில நாட்களுக்கு முன் நடிகர் விஜய் தன்னுடைய அரசியல் கட்சியின் பெயரை அறிவித்தார். 'தமிழக வெற்றி கழகம்' என்ற பெயரில் யார் யாரெல்லாம் இணையப் போகிறார்கள் என்று சமூக வலைதளங்களில் பலர் கணிப்புகளை வெளியிட்டு வந்தனர். தமிழருவி மணியன், பழ கருப்பையா தொடங்கிய நடிகையும் நடன இயக்குநருமான காயத்ரி ரகுராம் என பலரது பெயர்களை குறிப்பிட்டு இருந்தனர்.

குறிப்பாக காயத்ரி ரகுராம் அதிமுகவில் இணைந்தும் அவருக்கு பதவிகள் வழங்கப்படாததால் அதிருப்தி இருப்பதாகவும், எப்போது வேண்டுமானாலும் அவர் விஜய்யின் அரசியல் கட்சியில் இணைவார் என்றும் கூறப்பட்டது. இந்த நிலையில் தான் எக்ஸ் தளத்தில், "கட்சி தாவ தயாராகும் நடிகை காயத்ரி ரகுராம்! சமீபத்தில் அதிமுகவில் இணைந்த காயத்ரி தனக்கு எந்த பதவியும் இப்போதைக்கு தரப்படாது என்றபோதிலும் அரசியல் அடைக்கலம் தேடி அங்கு இணைந்துள்ளார். நடிகர் விஜய் அவர்கள் ஆரம்பித்த TVK Party யில் இணைய புஸ்சி ஆனந்த் உடன் பேச்சுவார்த்தை என்ற தகவல்." என்ற பதிவு வளம் வருகிறது.

இதை ரீட்வீட் செய்து இருக்கும் காயத்ரி ரகுராம், "இந்த விரக்தியடைந்த ஆன்மாவிற்கு நான் வருந்துகிறேன். தீவிர லூசுதனம் எப்போதும் என்னை குறிவைக்கிறது. எப்போதும் இந்த கோமாளி அண்ணாமலையின் டயபர் தூக்கிகள். என்னை பற்றி தவறான தகவல்களை பரப்புகிறார்கள். நான் சுதந்திரமாகவும் மகிழ்ச்சியாகவும் பாதுகாப்பாக பணியாற்றக்கூடிய இடம் அதிமுக. நிர்வாகம் தெரிந்த அ.தி.மு.க மட்டுமே ஆட்சி செய்ய மக்கள் விரும்புவார்கள்.

தமிழ்நாட்டு மக்களின் தேவைகளை அதிமுக மட்டுமே புரிந்து கொண்டுள்ளது. நான் எப்போதும் அ.தி.மு.க மூலம் சேவை செய்வேன் மக்களுக்காக. பதவிக்கு ஒதுக்கப்பட்ட வேலை, நான் அது இல்லாமல் வேலை செய்வேன். 6 நாட்கள் நான் குடும்ப திருமணத்தில் பிஸியாக இருந்தேன். அதுக்காக உங்களுக்கெல்லாம் ஏன் இப்படி குழப்பம். எப்போதும் குழப்பமான பைத்தியக்காரர்கள் அண்ணாமலையின் வார்ரூமில் மட்டுமே இருக்க முடியும்." என்று குறிப்பிட்டு உள்ளார்.

English summary

Gayatri Raghuram has given an explanation about the news that she will join Tamil Nadu Vetri Kazhagam, which is started by Vijay, on social media.