செஞ்சி சிறுமி மாயம் வழக்கில் திருப்பம்.. மாஜி ஊராட்சி மன்ற தலைவர் விஷம் குடித்து தற்கொலை முயற்சி?ஏன்
விழுப்புரம்: விழுப்புரம் மாவட்டம் செஞ்சி அருகே உள்ள ஆலம்பூண்டி குளக்கரை தெருவைச் சேர்ந்த கூலித் தொழிலாளி வடிவேலு - பவானி தம்பதியின் 7 வயது மகள் ஹேமலதா (ஹேமாவதி) மாயமான வழக்கு, கடந்த இரண்டு வாரங்களுக்கு மேலாகத் தமிழகத்தையே உலுக்கிக் கொண்டிருக்கிறது. அக்டோபர் 11 அன்று இரவு தனது பிறந்தநாளைக் கொண்டாடிவிட்டு, தாய் மற்றும் பாட்டியின் அருகில் படுத்து உறங்கிய குழந்தை அதிகாலையில் மாயமானார். உள்ளூர் போலீசார் 10 நாட்கள் தேடியும் எந்தத் துப்பும் கிடைக்காததால் வழக்கு சிபிசிஐடி பிரிவுக்கு மாற்றப்பட்டது.
தாய் பவானி, பாட்டி, பழைய குற்றவாளி ராஜதுரை, 200 மீட்டர் தள்ளி கதவு தட்டப்பட்ட விவகாரம் எனப் பல கோணங்களில் விசாரணை நகர்ந்த நிலையில், தற்போது ஊரையே உலுக்கும் வகையில் ஒரு புதிய விபரீதத் திருப்பம் ஏற்பட்டுள்ளது.
ஊருக்குள் முன்விரோதமா? விசாரணையில் சிக்கிய மாஜி தலைவர்
சிறுமி மாயமானதன் பின்னணியில் கிராமத்திற்குள் யாருடனாவது முன்விரோதம் அல்லது கொடுக்கல் வாங்கல் தகராறு இருந்ததா என்ற கோணத்தில் சிபிசிஐடி தனிப்படையினர் தீவிர கள ஆய்வில் ஈடுபட்டனர். அப்போது, ஆலம்பூண்டியை அடுத்த நடுப்பட்டு கிராமத்தைச் சேர்ந்த 60 வயதான முன்னாள் ஊராட்சி மன்ற தலைவர் குறித்த தகவல் வெளிவந்தது.
இவர் சிறுமியின் தாயார் பவானியுடன் பழக்கத்தில் இருந்து வந்துள்ளார். பவானியின் குடும்பச் செலவுகளுக்காக அவ்வப்போது அவர் தனது செல்போனில் தொடர்பு கொண்டு, ஆயிரம் முதல் இரண்டாயிரம் ரூபாய் வரை பண உதவி செய்து வந்ததாகக் கூறப்படுகிறது. குறிப்பாக, சிறுமி காணாமல் போவதற்கு முன்பு நடந்த பிறந்தநாள் கொண்டாட்டத்திற்குச் சற்று முன்னதாகக் கூட, அவர் பவானிக்கு ₹2,000 பணம் கொடுத்துள்ளார்.
தந்தை வடிவேலுவுடன் தகராறு: வெளிவந்த குடும்பப் பூசல்
மனைவி பவானிக்கு அந்த முதியவர் தொடர்ந்து பணம் கொடுத்து வந்த விவகாரம், கணவர் வடிவேலுவுக்குக் கடும் ஆத்திரத்தை ஏற்படுத்தியுள்ளது. "எதற்காக அவரிடம் இருந்து பணம் வாங்க வேண்டும்?" என்று கூறி, வடிவேலுவுக்கும் அந்த முன்னாள் ஊராட்சி மன்ற தலைவருக்கும் இடையே அடிக்கடி தகராறும் வாக்குவாதங்களும் ஏற்பட்டு வந்துள்ளன.
இந்தத் தகவலைத் தொடர்ந்து, "குடும்பத்திற்குள் குழப்பம் ஏற்படுத்தவோ அல்லது முன்விரோதம் காரணமாகவோ குழந்தை கடத்தப்பட்டாரா?" என்ற சந்தேகத்தில் சிபிசிஐடி தனிப்படையினர் அந்த 60 வயது முன்னாள் ஊராட்சி மன்ற தலைவரை நேரில் வரவழைத்து மிகத் தீவிரமான விசாரணையை மேற்கொண்டனர்.
அவமானம் தாங்காமல் விஷம் குடித்த முதியவர்
சிபிசிஐடி நடத்திய கிடுக்கிப்பிடி விசாரணையும், பவானியின் குடும்பத்திற்கு அவர் ரகசியமாகப் பணம் கொடுத்து உதவிய விவகாரம் கிராம மக்கள் மற்றும் உறவினர்கள் மத்தியில் வெட்டவெளிச்சமாகப் பரவியதும் அவருக்குப் பெரும் அதிர்ச்சியையும் தலைகுனிவையும் ஏற்படுத்தியது.
ஊருக்குள் தனது பெயருக்கும் கௌரவத்திற்கும் பெரும் களங்கம் ஏற்பட்டுவிட்டதாகக் கூறி மிகுந்த மன உளைச்சலில் இருந்த அவர், தனது வீட்டில் பயிர்களுக்குப் பயன்படுத்தப்படும் பூச்சிக்கொல்லி விஷத்தைக் குடித்து தற்கொலைக்கு முயன்றார். வாயில் நுரை தள்ளிய நிலையில் மயங்கிக் கிடந்த அவரைக் கண்ட குடும்பத்தினர் உடனடியாக மீட்டு, செஞ்சி அரசு மருத்துவமனையில் சேர்த்தனர். பின்னர் மேல் சிகிச்சைக்காக தீவிர சிகிச்சைப் பிரிவுக்கு மாற்றப்பட்டு, அங்கு அவருக்கு மருத்துவர்கள் தீவிர சிகிச்சை அளித்து வருகின்றனர்.
கிராமத்தில் உச்சகட்ட பதற்றம்: எகிறும் மர்மம்
ஒருபுறம் மாயமான 7 வயது சிறுமி எங்கே இருக்கிறார் என்றே தெரியாமல் 18 நாட்களைக் கடந்து தேடுதல் வேட்டை நீடிக்கிறது. மறுபுறம், விசாரிக்கப்பட்ட முன்னாள் ஊராட்சி மன்ற தலைவர் விஷம் குடித்து உயிருக்கு ஆபத்தான நிலையில் மருத்துவமனையில் இருப்பது ஆலம்பூண்டி மற்றும் நடுப்பட்டு கிராம மக்களிடையே உச்சகட்ட பதற்றத்தையும் அச்சத்தையும் உருவாக்கியுள்ளது.
பிறந்தநாளுக்குக் கொடுக்கப்பட்ட பணம், கணவன் - மனைவிக்குள் வெடித்த தகராறு, அதைத் தொடர்ந்து நடந்த தற்கொலை முயற்சி என அடுத்தடுத்து உடையும் இந்த மர்ம முடிச்சுகள் வழக்கை மேலும் சிக்கலாக்கியுள்ளன. சிபிசிஐடி அதிகாரிகள் மருத்துவமனையில் சிகிச்சை பெற்று வரும் முன்னாள் தலைவரிடமும், குடும்பத்தினரிடமும் தொடர்ந்து கூடுதல் தகவல்களைத் திரட்டி வருகின்றனர்.
Click it and Unblock the Notifications
Sign in with Google
