மார்ச் 27 இல் தமிழ் பெண்ணை மணக்கிறார் கிளென் மேக்ஸ்வெல்.. டிரென்டாகும் திருமண பத்திரிகை!
மெல்போர்ன்: ஆஸ்திரேலியா அணியின் நட்சத்திர சுழற்பந்து வீச்சு ஆல்ரவுண்டர் கிளென் மேக்ஸ்வெல் தமிழ் பெண்ணான வினி ராமனை வரும் மார்ச் மாதம் 27ஆம் தேதி மணக்கிறார்.
Recommended Video
ஆஸ்திரேலியா அணியின் நட்சத்திர சுழற்பந்து வீச்சு ஆல்ரவுண்டர் கிளென் மேக்ஸ்வெல். அதிரடி பேட்டிங்கிற்கு சொந்தக்காரர், சிறப்பான ஸ்பின் பவுலரான இவர் கடந்த முறை ஐபிஎல்லில் பெங்களூர் ராயல் சேலஞ்சர்ஸ் அணியில் சிறப்பாக விளையாடினார். இதையடுத்து இந்த முறை ஐபிஎல் ஏல போட்டியில் பெங்களூர் ராயல் சேலஞ்சரஸ் அணி இவரை 11 கோடிக்கு ஏலம் எடுத்து தக்க வைத்து கொண்டது.
ஆஸ்திரேலியாவில் வளர்ந்த தமிழ் பெண்
இந்த நிலையில் கிளென் மேக்ஸ்வெல்லும் ஆஸ்திரேலியாவில் வளர்ந்த தமிழ் பெண்ணான வினிராமனும் நீண்டகாலமாக காதலித்து வந்ததாக கூறப்படுகிறது. இதையடுத்து இருவர் வீட்டிலும் இதற்கு சம்மதம் தெரிவித்ததால் கடந்த 2020 ஆம் ஆண்டு இந்திய முறைப்படி நிச்சயதார்த்தம் நடைபெற்றது.
ஊரடங்கு உத்தரவு
இதையடுத்து கொரோனா பரவல், ஊரடங்கு உத்தரவு உள்ளிட்டவைகளால் இவர்களுடைய திருமணம் தள்ளி போனது. இந்த நிலையில் கொரோனா கட்டுப்பாடுகளில் தளர்வுகள் அறிவிக்கப்பட்டதை அடுத்து இருவருக்கும் மார்ச் 27ஆம் தேதி திருமணம் காலை 11.35 மணிக்கு மேல் 12.35 மணிக்குள்ளாக (ஆஸ்திரேலிய நேரப்படி) ரிஷப லக்கினத்தில் திருமணம் நடைபெறும் என அறிவிக்கப்பட்டுள்ளது.
சென்னை மாம்பலம்
இந்த திருமணத்திற்காக மஞ்சள் பத்திரிகை அடிக்கப்பட்டுள்ளது. அதில் சிரஞ்சீவி கிளென் மேக்ஸ்வெல் என போடப்பட்டுள்ளது. வினிராமன் சென்னை மேற்கு மாம்பலத்தை சேர்ந்தவர் ஆவார். இவர் ஆஸ்திரேலியாவில் பார்மஸி படித்து வந்தார். அப்போது இருவருக்கும் காதல் மலர்ந்து தற்போது கல்யாணம் வரை வந்துவிட்டது. இவர்களது திருமணத்தை காட்டிலும் தமிழில் அச்சடிக்கப்பட்ட இவர்களது திருமண பத்திரிகை வைரலாகி வருகிறது.
வினிராமன்
இவர்களுக்கு மெல்போர்னில் திருமணம் நடத்தப்படுகிறது. வினிராமனின் பெற்றோர் வெங்கட்ராம ராமானுஜ தாஸன், ஸ்ரீமதி விஜயலட்சுமி ராமன் என்றும் அது போல் மேக்ஸ்வெல்லின் பெற்றோர் நீல் மேக்ஸ்வெல்- ஜாய் என்றும் அந்த பத்திரிகையில் போடப்பட்டுள்ளது. இவர்களது திருமணம் கன்னிகாதானம் செய்து கொடுக்கப்படுகிறது. அதாவது முழுக்க முழுக்க பெண் வீட்டார் ஏற்பாட்டில் இந்த திருமணம் நடைபெறும்.