125% அதிகமாகிடுச்சு.. தங்கத்தை கொத்து கொத்தாக கொண்டு போய்.. அடகு வைக்கும் மக்கள்.. ஏன்?

சென்னை: இந்தியாவில் தங்கக் கடன்கள் கடந்த ஓராண்டில் 125% அதிகரித்துள்ளன. தங்கத்தின் விலை கடுமையாக உயர்ந்ததே இந்த வளர்ச்சிக்கு முக்கிய காரணமாகும். இதன் விளைவாக, தங்கம் அதிக மதிப்புமிக்க பிணையப் பொருளாக மாறியுள்ளது.

ரிசர்வ் வங்கி தரவுகளின்படி, வங்கிகளின் தங்கக் கடன்கள் நவம்பர் மாத இறுதிக்குள் கணிசமாகப் பெருகின. 2025ஆம் ஆண்டில் தங்கத்தின் விலை சுமார் 64% உயர்ந்து, 10 கிராம் 24 காரட் தங்கத்திற்கு ₹1.35 லட்சத்தை எட்டியது. இது கடன் பெறுபவர்கள் அதிக கடன் பெற உதவியது.

தங்கக் கடன்கள்

தங்கக் கடன்கள் கடந்த ஆண்டில் வேகமாக வளர்ந்த கடன் பிரிவாக உருவெடுத்தன. நவம்பர் 2023ல் ₹898 கோடியாக இருந்த நிலுவைக் கடன்கள், 2024ல் ₹1.59 லட்சம் கோடியாகவும், 2025ல் ₹3.5 லட்சம் கோடியாகவும் உயர்ந்தன. வங்கிகள் 50.35% சந்தைப் பங்கை பிடித்து வங்கிசாரா நிதி நிறுவனங்களை (NBFCs) முதன்முறையாக விஞ்சின.

முத்தூட் ஃபைனான்ஸ், மணப்புரம் ஃபைனான்ஸ், ஐஐஎஃப்எல் ஃபைனான்ஸ் ஆகியவை முக்கிய தங்கக் கடன் வழங்குநர்களாகும். குறைந்த ஆவணங்களுடன் உடனடி நிதி கிடைப்பதால் தங்கக் கடன்கள் மக்கள் மத்தியில் பெரும் வரவேற்பைப் பெற்றுள்ளதாக நிபுணர்கள் தெரிவிக்கின்றனர்.

அதிகரிக்கும் கோல்டு லோன்

இதற்கிடையே, வாகனக் கடன்கள் 11% வளர்ச்சி கண்டன; தேவை அதிகரிப்பும் ஜிஎஸ்டி குறைப்பும் இதற்கு ஊக்கமளித்தன. அக்டோபருக்குப் பின் பண்டிகைக் காலத் தேவை குறைந்ததால், நுகர்வோர் உபகரணக் கடன்கள் சரிந்தன. ஊதிய வளர்ச்சி மேம்படாவிட்டால், நுகர்வு பலவீனமாகவே இருக்கும் என ரிசர்வ் வங்கி தரவுகள் சுட்டிக்காட்டுகின்றன.

ஏற்கனவே RBI தங்கக் கடன் வழிகாட்டுதல்கள் 2025ல் பல மாற்றங்கள் செய்யப்பட்டு உள்ளன. இந்திய ரிசர்வ் வங்கி (RBI), நேற்று தங்கக் கடன்களுக்கான புதிய வழிகாட்டுதல்களை வெளியிட்டது. தங்கக் கடன்களின் LTV (Loan-to-Value) விகிதங்கள், மதிப்பீடு, அடமான விதிகள், ஏல நடைமுறைகள் மற்றும் டிஜிட்டல் செயலாக்கம் என பல அம்சங்களிலும் இவை மாற்றங்களைக் கொண்டுவருகின்றன.

தங்கக் கடன்களின் LTV (Loan-to-Value) விகிதங்கள் - LTV வரம்புகள்: RBI, தங்கக் கடன்களுக்கான LTV வரம்புகளைப் படிநிலையாக மாற்றியுள்ளது. இனி, ₹2.5 லட்சம் வரையிலான கடன்களுக்கு 85% LTV, ₹2.5 லட்சம் முதல் ₹5 லட்சம் வரையிலான கடன்களுக்கு 80% LTV, மற்றும் ₹5 லட்சத்திற்கு மேற்பட்ட கடன்களுக்கு 75% LTV என நிர்ணயம் செய்யப்பட்டுள்ளது. இது சிறிய கடன்கள் எளிதில் கிடைக்க உதவுவதோடு, அதிக மதிப்புள்ள கடன்களுக்கு எச்சரிக்கையான அணுகுமுறையை உறுதி செய்யும்.

சீரான தங்க மதிப்பீடு: தங்கக் கடன்களுக்கான மதிப்பு நிர்ணயம் மற்றும் தூய்மைச் சோதனை முறைகள் சீரமைக்கப்பட்டுள்ளன. BIS சான்றளிக்கப்பட்ட தூய்மைச் சோதனை முறைகள் கட்டாயமாக்கப்பட்டுள்ளன. இது தங்கக் கடன் மதிப்பீட்டில் வெளிப்படைத்தன்மையையும் நியாயத்தையும் உறுதி செய்கிறது, இதனால் குறைவான மதிப்பீடு மற்றும் சர்ச்சைகள் தவிர்க்கப்படும்.

ஒரே மாதிரியான அடமானம் மற்றும் தகுதி விதிகள்: அடமானமாக ஏற்றுக்கொள்ளப்படும் தங்கத்தின் வகை மற்றும் தகுதி தொடர்பான விதிகள் சீரமைக்கப்பட்டுள்ளன. இனிமேல், தங்க நகைகள், ஆபரணங்கள் மற்றும் வங்கிகளால் அச்சிடப்பட்ட குறிப்பிட்ட தங்க நாணயங்கள் மட்டுமே அடமானமாக ஏற்கப்படும். தங்கம் கட்டிகள் (raw bullion) அல்லது கோல்ட் ETF-கள் லோன் எடுக்க அனுமதிக்கப்படாது. இந்த விதி ஊக வணிகத்திற்கான கடன்களைக் குறைத்து, கடன் வழங்குநர்கள் அபாயங்களை நிர்வகிக்க உதவும்.

வெளிப்படையான தங்க ஏல விதிகள்: கடன் தவணையைச் செலுத்தத் தவறினால், தங்கத்தை ஏலம் விடுவதற்கான நடைமுறைகள் வெளிப்படையானதாக இருக்க வேண்டும் என RBI வலியுறுத்தியுள்ளது. கடன் வழங்குநர்கள் முன்னறிவிப்பு வழங்கவதோடு, வெளிப்படையான ஏல நடைமுறைகளையும் பின்பற்ற வேண்டும். குறைந்தபட்ச ஏல விலையை நிர்ணயிக்கும் 'ரிசர்வ் விலை' விதிகளும் இதில் அடங்கும். ஏலத்தில் கிடைக்கும் கூடுதல் தொகை, கடன் பெற்றவர்களுக்கு விரைவாகத் திருப்பித் தரப்பட வேண்டும். இதன் மூலம் கடன் பெறுபவர்களின் பாதுகாப்பு உறுதி செய்யப்படுவதுடன், கட்டாய ஏலங்களால் ஏற்படும் இழப்புகளும் குறையும்.

English summary

Gold Loans Surge 125% as Rising Prices Push Banks Ahead of NBFCs