தங்கம் இப்போ வாங்கலாமா? 2 மாத சரிவில் தத்தளிக்கும் கோல்டு ரேட்.. மக்கள் என்ன செய்ய வேண்டும்?

சென்னை: சர்வதேச சந்தையில் தங்கத்தின் விலை கடந்த இரண்டு மாதங்களில் இல்லாத அளவுக்கு வியாழக்கிழமை குறைந்துள்ளது. அமெரிக்காவில் ஈரான் மீதான புதிய தாக்குதல், டாலர் மதிப்பில் ஏற்பட்ட உயர்வு, கச்சா எண்ணெய் விலை உயர்வு உள்ளிட்ட காரணங்களால் சர்வதேச சந்தையில் தங்கம் விலை ஒரு அவுன்ஸுக்கு 1.1 சதவீதம் வீழ்ச்சி அடைந்து 4,406.81 டாலராக பதிவாகியுள்ளது.

இதேபோல் ஸ்பாட் சந்தையிலும் தங்கம் விலை ஒரு அவுன்ஸ் 1.5 சதவீதம் குறைந்து 4,366.82 டாலர் வரையில் குறைந்துள்ளது. இந்த நிலையில் இந்தியாவில் தங்கம் வாங்கும் மக்களுக்கு இது ஒரு வாய்ப்பாக அமைகிறதா அல்லது இன்னும் காத்திருக்க வேண்டுமா என்பதே இப்போது பெரிய கேள்வியாக உள்ளது.

ஏன் தங்க விலை திடீரென சரிந்தது?

ஹார்முஸ் ஜலசந்தி வழியாகச் செல்லும் சர்வதேச வணிகக் கப்பல்கள் மற்றும் அமெரிக்கப் படைகளுக்கு அச்சுறுத்தல் ஏற்படுத்தும் வகையில், ஈரான் ராணுவம் தொடர்ச்சியாக ட்ரோன் விமானங்களை ஏவி வந்தது. இந்த அச்சுறுத்தலை முறியடிக்கும் நோக்கில் களமிறங்கிய அமெரிக்கப் படைகள், ஈரானின் ட்ரோன்களை நடுவானில் சுட்டு வீழ்த்தின. இதோடு ட்ரோன் கட்டுப்பாட்டு மையத்தை (Drone-Control Station) குண்டுகள் வீசி முற்றிலுமாக அழித்துள்ளன.

ஈரான் ராணுவ உடனடியாக பதிலடி கொடுத்துள்ளது, தெற்கு ஈரானின் பந்தர் அப்பாஸ் (Bandar Abbas) துறைமுக நகருக்கு அருகே அமெரிக்கா நடத்திய தாக்குதலுக்கு பதிலடியாக குவைத்தில் அமைந்துள்ள அமெரிக்காவின் முக்கிய ராணுவ விமானத்தளத்தைக் குறிவைத்துத் தாக்குதல் நடத்தியுள்ளது. இதன் கச்சா எண்ணெய் விலை உயர்ந்தது. டாலரும் வலுப்பெற்றது. டாலரில் விற்கப்படும் தங்கம் பிற நாட்டு மக்களுக்கு அதிக விலைக்கு செல்லும் நிலை உருவானதால் தங்கத்தின் தேவை குறைந்தது.

இதனால் அமெரிக்க சந்தையில் கோல்டு ஃபியூச்சர்ஸ் 0.9 சதவீதம் சரிந்து 4,404.90 டாலருக்கு வந்துள்ளது. வெள்ளி 1.6 சதவீதம், பிளாட்டினம் 0.8 சதவீதம், பல்லாடியம் 1 சதவீதம் என பிற உலோகங்களும் வீழ்ச்சியடைந்தன.

பெடரல் ரிசர்வ் என்ன சொல்கிறது?

அமெரிக்க பெடரல் ரிசர்வ் அதிகாரிகள் தற்போது வட்டி விகிதங்களை மாற்ற வேண்டாம் என்ற நிலைப்பாட்டில் உள்ளனர். ஆனால், டிரம்ப் நிர்வாகத்தின் வரி திட்டங்கள், ஈரான் பிரச்னை, செயற்கை நுண்ணறிவு தொழில்நுட்ப முதலீடுகள் ஆகியவை பணவீக்கத்தை அதிகரிக்கும் என எச்சரித்துள்ளனர். இதனால் வட்டி விகிதம் உயர வாய்ப்பு உள்ளது.

இன்று வெளியாகவுள்ள அமெரிக்க பர்சனல் கன்ஸம்ப்ஷன் எக்ஸ்பென்டிச்சர் (PCE) தரவுகள் முக்கியமானவை. இந்த தரவுகள் பணவீக்கத்தை எப்படி காட்டுகின்றன என்பதைப் பொறுத்து தங்க விலையில் மாற்றம் ஏற்படலாம்.

தொழில்நுட்ப ரீதியாக தங்கத்தின் நிலை

தங்க விலை தற்போது 4,500 முதல் 4,540 டாலர் வரையில் ஊசலாடி வருகிறது. தங்கத்திற்கு உடனடி எதிர்ப்பு நிலை 4,560-4,600 டாலரில் உள்ளது. இந்த அளவைத் தாண்டினால் 4,660-4,700 டாலர் வரை செல்ல வாய்ப்பு இருப்பதாக சந்தை நிபுணர்கள் கூறுகின்றனர். மேலும் கீழ்நோக்கிய ஆதரவு 4,500-4,460 டாலரில் உள்ளது. இந்த அளவை உடைத்தால் 4,400-4,350 டாலர் வரை வீழ்ச்சி ஏற்படலாம் என எச்சரிக்கப்படுகிறது.

என்ரிச் மணி நிறுவனத்தின் சிஇஓ பொன்முடி கூறுகையில், "தங்கம் தற்போது எச்சரிக்கையான போக்கில் உள்ளது. 4,500 டாலர் ஆதரவைத் தக்க வைத்தால் மேலே செல்லும் வாய்ப்பு உள்ளது. ஆனால் அதன் கீழ் போனால் இன்னும் வீழ்ச்சி ஏற்படலாம்" என்றார்.

பொதுமக்கள் தங்கம் வாங்கலாமா?

இப்போது தங்கம் விலை குறைந்துள்ள நிலையில் பலர் "வாங்கலாமா?" என்று யோசிக்கிறார்கள். தங்கம் எப்போதும் பாதுகாப்பான முதலீடாகக் கருதப்படுகிறது. ஆனால் தற்போதைய சூழல் சற்று சிக்கலானது.

நன்மைகள்:
- விலை தற்போது இரண்டு மாத அளவிற்கு குறைந்துள்ளது. நீண்ட காலத்துக்கு (5-10 ஆண்டுகள்) முதலீடு செய்பவர்களுக்கு இது நல்ல வாய்ப்பாக இருக்கலாம்.
- பணவீக்கம் அதிகரிக்கும் அபாயம் இருப்பதால் தங்கம் பாதுகாப்பு அளிக்கும்.

எச்சரிக்கைகள்:
- ஈரான் பிரச்னை, அமெரிக்க வட்டி விகிதம் உள்ளிட்டவை இன்னும் தெளிவாகவில்லை. விலை மேலும் சரிய வாய்ப்பு உள்ளது.
- குறுகிய காலத்தில் (சில மாதங்கள்) லாபம் எதிர்பார்ப்பவர்கள் காத்திருப்பது நல்லது.

சென்னை தங்கம் விலை

தங்கம் விலை:
24 காரட் தங்கம் (1 கிராம்): ரூ.15,818 (-ரூ.164)
22 காரட் தங்கம் (1 கிராம்): ரூ.14,500 (-ரூ.150)
18 காரட் தங்கம் (1 கிராம்): ரூ.12,160 (-ரூ.130)

வெள்ளி விலை:
வெள்ளி (1 கிராம்): ரூ.285 (-ரூ.5)
வெள்ளி (1 கிலோ): ரூ.2,85,000 (-ரூ.5,000)

பிளாட்டினம் விலை:
பிளாட்டினம் (1 கிராம்): ரூ.5,810 (-ரூ.85)
பிளாட்டினம் (10 கிராம்): ரூ.58,100 (-ரூ.850)

என்ன செய்யலாம்?

சிறு முதலீட்டாளர்கள் மாதா மாதம் சிறு தொகையை (SIP அல்லது கோல்டு ஈடிஎப்) தங்கத்தில் முதலீடு செய்யலாம். முழு தொகையையும் ஒரே நேரத்தில் போடுவதைத் தவிர்க்கவும். உங்கள் நிதி இலக்கு, ஆபத்து தாங்கும் திறன் ஆகியவற்றைப் பொறுத்து முடிவு எடுக்கவும். நிபுணர்களின் ஆலோசனையைப் பெறுவது எப்போதும் நல்லது.

தங்கம் என்றும் மதிப்பு மிக்கது. ஆனால் தற்போதைய சர்வதேச பதற்றத்தை உன்னிப்பாக கவனித்து, அவசரப்படாமல் முடிவு எடுப்பதே பொதுமக்களுக்கு புத்திசாலித்தனமான அணுகுமுறையாக இருக்கும்.

English summary

Gold prices slipped sharply to a two-month low following US military strikes on Iran, rising dollar, and oil price surge, creating uncertainty in the global market. Investors are now wondering whether this dip is a good opportunity to buy gold or if they should wait for further clarity on Fed rate decisions and geopolitical tensions.