"தங்கம் விலை.. கவலை வேண்டாம்!" ஒரு வழியாக நிம்மதி கொடுத்த ஆனந்த் சீனிவாசன்! என்ன சொன்னார்
சென்னை: தங்கம் விலை கடந்த சில நாட்களாகப் பெரியளவில் ஏற்ற இறக்கம் இல்லாமல் இருந்த நிலையில், நேற்று திடீரென விலை அதிகரித்தது. இதனால் பொதுமக்கள் பலரும் விலை இன்னும் வேகமாக உயருமோ என அச்சமடைந்துள்ளனர்.. இதற்கிடையே தங்கம் விலை அடுத்த ஓரிரு மாதங்களுக்கு எப்படி இருக்கும் என்பது தொடர்பாகப் பிரபலப் பொருளாதார வல்லுநர் ஆனந்த் சீனிவாசன் சில முக்கிய கருத்துகளைக் கூறியுள்ளார்.
தங்கம் விலை கடந்த சில வாரங்களாகவே பெரியளவில் ஏற்ற இறக்கம் இல்லாமல் இருந்தது. ஒரு நாள் உயர்வு, மறுநாள் சரிவு என மாறி மறியே இருந்து வந்தது. இந்தச் சூழலில் தான் கடந்த இரு நாட்களாகத் தங்கம் விலை சட்டென உயர்ந்தது. இரு நாட்களில் மட்டும் 22 கேரட் ஆபரணத் தங்கம் கிராமுக்கு ரூ.400 உயர்ந்தது. இதனால் எங்கு மீண்டும் தங்கம் விலை மீண்டும் மின்னல் வேகத்தில் அதிகரிக்குமோ எனப் பொதுமக்கள் கவலையடைந்துள்ளனர்.
ஆனந்த் சீனிவாசன்
இதற்கிடையே தங்கம் விலை உயர்வு தொடர்பாகப் பிரபலப் பொருளாதார வல்லுநர் ஆனந்த் சீனிவாசன் சில முக்கிய கருத்துகளைக் கூறியுள்ளார். தங்கம் விலை சட்டென உயரப் போவதாகச் சிலர் சொல்லி வரும் நிலையில், அதற்கு வாய்ப்பு குறைவு என அவர் கூறியுள்ளார். தங்கம் விலை அடுத்த மாதம் வரை பெரியளவில் ஏற்ற இறக்கங்களைச் சந்திக்காது என்றும் அவர் குறிப்பிட்டார்.
என்ன நடந்தது
இது தொடர்பாக அவர் தனது யூடியூப் சேனலில், "நேற்று ரொம்ப நாள் கழித்து தங்கம் விலை 2% வரை உயர்ந்தது. 22 கேரட் தங்கம் 11,700 ரூபாயைத் தொட்டுவிட்டது. 18 கேரட் தங்கம் ரூ.9750க்கு வந்துவிட்டது. தங்கம் விலையில் நான் ஃப்ளோர் (குறைந்தபட்ச விலை என சொல்லலாம்) வலிமையாகக் கொண்டே இருக்கிறது. தங்கம் மட்டுமின்றி அமெரிக்கப் பங்குச்சந்தையும் பயங்கரமாக உயர்ந்தது. ஏனென்றால் அமெரிக்கா அரசு ஷட் டவுன் நிலையில் இருந்து மீண்டு வரும் சூழல் தெரிகிறது.
அங்கு எதிர்க்கட்சியான ஜனநாயகக் கட்சியைச் சேர்ந்த எட்டு எம்பிக்கள் கட்சி மாறி, ஆளும் குடியரசுக் கட்சிக்காக வாக்களித்துள்ளனர். எனவே, சீக்கிரம் அமெரிக்க ஷட் டவுன் முடிவுக்கு வந்துவிடும். அந்த மகிழ்ச்சியில் அமெரிக்கப் பங்குச்சந்தை, தங்கம் என எல்லாமே உயர்ந்துவிட்டது. அதன் எதிரொலியாக இந்தியாவிலும் தங்கம் விலை உயர்ந்து ₹11,700க்கு போய்விட்டது.
குப்புனு ஏறுமா?
இப்போது பலரும் தங்கத்தை இப்போதே வாங்கிவிடுங்கள்.. மொத்தமாக வாங்குவது சிறந்தது இல்லை என்றால் தங்கம் விலை குப்புனு ஏறிவிடும் எனப் பலரும் சொல்லி வருகிறார்கள். ஆனால், தங்கம் விலை இப்போது குப்புனு எல்லாம் உயராது. அமெரிக்க பெடரல் வங்கி என்ன சொல்கிறது என்பதைப் பொறுத்தே தங்கம் விலை இருக்கும். அமெரிக்க பெடரல் வங்கியை டிரம்ப் தாக்கிப் பேசி, எதிராக நடவடிக்கை எடுத்தால் மட்டுமே தங்கம் விலை வேகமாக உயரும். இல்லையென்றால் உயராது.
அடுத்த மாதம் என்னவாகும்?
அதேபோல டிசம்பரில் அமெரிக்க பெடரல் வங்கி கூட்டம் நடக்கிறது. அதில் வட்டி குறைப்பு தொடர்பாக நெகடிவ் ஆக பேசினால் தங்கம் விலை சரியும். எனவே, டிசம்பர் வரை தங்கம் விலை இப்படியே ஏற்ற இறக்கத்தோடு தான் இருக்கும். எனவே, தங்கம் விலையைப் பற்றி நாம் பெரிதாகக் கவலைப்படத் தேவையில்லை. உங்களுக்குத் தேவை என்றால் மட்டும் தங்கத்தை மொத்தமாக வாங்குங்கள். இல்லையென்றால் கொஞ்சம் கொஞ்சமாக வாங்குவதே சிறந்ததாக இருக்கும்" என்றார்.
இது ஒரு செய்தி மட்டுமே. இதை நிச்சயமாக முதலீட்டு ஆலோசனையாக எடுத்துக் கொள்ளக் கூடாது. முதலீடு சார்ந்த முடிவுகளை எடுக்கும் முன்பு உங்கள் பொருளாதார ஆலோசகரிடம் உரிய ஆலோசனை கேட்ட பிறகு, உங்களுக்கு ஏற்ற முடிவை எடுக்க வேண்டும்.
Click it and Unblock the Notifications
Sign in with Google