ஒரே நாளில் ஏகப்பட்ட ஆர்டர்கள்.. ஜிஎஸ்டி குறைந்ததும்.. கார், பைக் வாங்க குவிந்த மக்கள்.. என்னாச்சு?

சென்னை: புதிய சரக்கு மற்றும் சேவை வரி (ஜிஎஸ்டி) விதிமுறைகள் திங்கள்கிழமை அமலுக்கு வந்த நிலையில், வாகன டீலர்ஷிப்களில் கூட்டம் அலைமோதியது. மளிகை பொருட்கள், எலக்ட்ரானிக்ஸ், ஆடைகள் மற்றும் பிற தினசரி நுகர்வுப் பொருட்களின் விலை குறைப்பை எதிர்பார்த்திருந்த வாடிக்கையாளர்கள் ஆர்வத்துடன் பொருட்களை வாங்கத் தொடங்கினர்.

குறிப்பாக, ஜிஎஸ்டி 2.0 மாற்றத்தின் கீழ் அதிக விலை குறைப்பு பெற்ற சிறிய கார்கள் மீது வாங்குபவர்கள் பெரும் ஆர்வம் காட்டினர். நேற்று முதல் நாளிலேயே (செப்டம்பர் 22) 80,000 பேர் டீலர்ஷிப்களுக்கு வந்து கார் புக்கிங் செய்ய முயன்று உள்ளனர். பல மாநிலங்களில் 25,000 கார்களுக்கு மேல் டெலிவரி செய்யப்பட்டுள்ளன. விரைவில் இது 30,000ஐ எட்டும் என்று எதிர்பார்க்கப்படுகிறது

மத்திய அரசின் சரக்கு மற்றும் சேவை வரி (ஜிஎஸ்டி) கவுன்சில், இனி இரண்டு வரி விகிதங்களை மட்டுமே அமல்படுத்தப் போவதாக அறிவித்துள்ளது. இந்த மாற்றத்தின்படி, 5 சதவீதம் மற்றும் 18 சதவீதம் ஆகிய இரு விகிதங்கள் மட்டுமே முக்கிய வரிகளாகச் செயல்படும். இதனால், பல கார் மற்றும் பைக் உள்ளிட்ட வாகனங்களின் விலைகள் குறைய வாய்ப்புள்ளது. நேற்று முதல் இந்த மாற்றங்கள் அமலுக்கு வருகின்றன.

ஜிஎஸ்டி மாற்றங்கள்

குறிப்பிட்ட சில பொருட்களுக்கு மட்டும் 40 சதவீத சிறப்பு வரி விதிக்கப்படும். இதில் பான் மசாலா, சிகரெட், சர்க்கரை சேர்க்கப்பட்ட காற்றூட்டப்பட்ட மற்றும் கார்பனேட்டட் பானங்கள் ஆகியவை அடங்கும். நடுத்தர வர்க்கத்தினர் பயன்படுத்தும் பல பொருட்கள் 18 சதவீத வரி வரம்பிற்குள் கொண்டுவரப்பட்டுள்ளன.

தொலைக்காட்சிகள், ஏர் கண்டிஷனர்கள், மற்றும் 350 சிசி-க்கு குறைவான மோட்டார் சைக்கிள்கள் போன்றவையும் இந்த வரி விகிதத்தில் சேர்க்கப்பட்டுள்ளன. மத்திய நிதி அமைச்சர் நிர்மலா சீதாராமன் அலுவலகம் 'எக்ஸ்' தளத்தில் வெளியிட்ட பதிவில், "இந்த சீர்திருத்தங்கள் பல துறைகளையும், பல்வேறு அம்சங்களையும் மையமாகக் கொண்டுள்ளன," எனக் குறிப்பிட்டது.

ஆட்டோமொபைல் GST மாற்றம்

ஜிஎஸ்டி குழு கூட்டத்திற்குப் பிறகு வெளியான விரிவான விளக்கத்தின்படி, சில வாகனங்களுக்கு வரி குறைக்கப்பட்டுள்ளது. 1,200 சிசி-க்கு குறைவான பெட்ரோல், எல்பிஜி, சிஎன்ஜி வாகனங்கள் (4,000 மிமீ-க்கு மிகாத நீளம் கொண்டவை) மற்றும் 1,500 சிசி-க்கு குறைவான டீசல் வாகனங்கள் (4,000 மிமீ நீளம் கொண்டவை) ஆகியவற்றுக்கான வரி 28 சதவீதத்திலிருந்து 18 சதவீதமாகக் குறைக்கப்பட்டுள்ளது.

ஆனால், சில வாகனங்களுக்கு ஜிஎஸ்டி வரி அதிகம் விதிக்கப்படும். 1,200 சிசி-க்கு மேற்பட்ட பெட்ரோல் கார்களுக்கும், 1,500 சிசி-க்கு மேற்பட்ட டீசல் கார்களுக்கும் 40 சதவீத வரி விதிக்கப்படும் என நிதி அமைச்சர் தெரிவித்துள்ளார். மேலும், 1,200 சிசி-க்கு மேற்பட்ட மற்றும் 4,000 மிமீ-க்கு அதிகமான நீளம் கொண்ட அனைத்து தானியங்கி வாகனங்கள், 350 சிசி-க்கு மேற்பட்ட மோட்டார் சைக்கிள்கள், தனிப்பட்ட பயன்பாட்டிற்கான படகுகள், விமானங்கள், மற்றும் பந்தய கார்கள் ஆகியவற்றுக்கும் 40 சதவீத வரி பொருந்தும்.

கார் வாகனங்களுக்கான GST

மின்சார வாகனங்களுக்கான (EVs) ஜிஎஸ்டி வரி தொடர்ந்து 5 சதவீதமாகவே உள்ளது. டிஷ்வாஷர்கள், மானிட்டர்கள், மற்றும் புரொஜெக்டர்கள் போன்ற பிற ஆடம்பரப் பொருட்கள் 18 சதவீத வரி வரம்பிற்குள் கொண்டுவரப்பட்டுள்ளன. சிமெண்டுக்கான ஜிஎஸ்டி 28 சதவீதத்திலிருந்து 18 சதவீதமாகக் குறைக்கப்பட்டுள்ளது. இதேபோல, மூன்று சக்கர வாகனங்களுக்கும் வரி 28 சதவீதத்திலிருந்து 18 சதவீதமாகக் குறைக்கப்பட்டுள்ளது.

இருப்பினும், ரூ. 20 லட்சம் முதல் ரூ. 40 லட்சம் வரையிலான மின்சார கார்களுக்கு 18% ஜிஎஸ்டி-யும், அதைவிட அதிக விலையுள்ள கார்களுக்கு 28% ஜிஎஸ்டி-யும் விதிக்கப் பரிந்துரைக்கப்பட்டுள்ளது. இது அந்த கார்களின் விலையை கணிசமாக உயர்த்தக்கூடும்.

20% எத்தனால் கலப்பு காரணமாக பெட்ரோல் வாகனங்களைப் பயன்படுத்தும் பலர் மின்சார வாகனங்கள் குறித்து யோசித்து வருகின்றனர். தற்போது 5% ஆக உள்ள மின்சார வாகனங்களுக்கான ஜிஎஸ்டி, 18% ஆக உயர்த்தப்பட வாய்ப்புள்ளது. சுமார் $46,000 (சுமார் ரூ. 40 லட்சம்) க்கும் மேல் விலையுள்ள ஆடம்பர மின்சார கார்களுக்கு ஜிஎஸ்டியை கணிசமாக உயர்த்த வரி குழுமம் பரிந்துரைத்துள்ளது. இது அமெரிக்காவின் டெஸ்லா முதல் சீனாவின் BYD வரையிலான பல நிறுவனங்களுக்கு ஒரு பின்னடைவாக அமையும்.

English summary

GST rate for Automobile: People went in line to buy new cars and bike after new rate cut