விநாயகர் சதுர்த்தி.. இயற்கை சாயங்களே போதும்.. செயற்கை வேண்டாம்.. வழிகாட்டு நெறிமுறைகள் ரிலீஸ்

சென்னை: விநாயகர் சதுர்த்தி பண்டிகையை முன்னிட்டு விநாயகர் சிலைகளை கரைப்பது தொடர்பான வழிகாட்டு நெறிமுறைகள் வெளியாகியுள்ளன. விநாயகர் சதுர்த்தி விழாவினை கொண்டாடும் போது, விநாயகர் சிலைகளை நீர் நிலைகளில் கரைப்பதற்கான வழிமுறைகளை மத்திய மாசு கட்டுப்பாடு வாரிய வழிகாட்டுதல்களின்படி கடைப்பிடிக்க வேண்டும்.

விநாயகர் சதுர்த்தி உலகம் முழுவதும் செப்டம்பர் 18ம் தேதி திங்கட்கிழமை கொண்டாடப்பட உள்ளது. விநாயகர் சதுர்த்தியை பாதுகாப்புடன் கொண்டாடவும், மாசில்லா பண்டிகையாக வழிபடவும் தமிழக அரசு அறிவுறுத்தியுள்ளது. இது குறித்து தமிழ்நாடு மாசுக் கட்டுப்பாட்டு வாரியம் வெளியிட்டுள்ள செய்திக் குறிப்பில், நீர் நிலைகளை பாதுகாக்கும் வகையில் "விநாயகர் சதுர்த்தி விழாவினை கொண்டாடும் போது, விநாயகர் சிலைகளை நீர் நிலைகளில் கரைப்பதற்கான வழிமுறைகளை மத்திய மாசு கட்டுப்பாடு வாரிய வழிகாட்டுதல்களின்படி கடைப்பிடிக்க வேண்டும்.

அதிகாரப்பூர்வ இணையதளமான www.tnpcb.gov.in ல் மாவட்ட நிர்வாகத்தினால் குறிப்பிடப்பட்டுள்ள இடங்களில் மட்டும் கரைக்க வேண்டும். சுற்றுச்சூழலை பாதுகாக்க ஒத்துழைப்பு வழங்க வேண்டும் என அறிவுறுத்தப்பட்டுள்ளது.

இது குறித்து வெளியிட்ட செய்திக்குறிப்பில் "களிமண்ணால் செய்யப்பட்டதும் மற்றும் பிளாஸ்டர் ஆஃப் பாரிஸ் (PoP), பிளாஸ்டிக் மற்றும் தெர்மாகோல் (பாலிஸ்டிரின்) கலவையற்றதுமான, சுற்றுச்சூழலை பாதிக்காத மூலப்பொருள்களால் மட்டுமே செய்யப்பட்டதுமான விநாயகர் சிலைகளை நீர்நிலைகளில் பாதுகாப்பான முறையில் மட்டுமே கரைக்க அனுமதி வழங்கப்படுகிறது.

சிலைகளின் ஆபரணங்கள் தயாரித்தலில் உலர்ந்த மலர் கூறுகள், வைக்கோல் இவைகளை பயன்படுத்திக் கொள்ளலாம். மேலும், சிலைகளை பளபளப்பாக மாற்ற மரங்களின் இயற்கை பிசின்கள் பயன்படுத்திக் கொள்ளலாம். ஒரு முறை பயன்படுத்தும் பிளாஸ்டிக் மற்றும் தொர்மாக்கோல் பொருட்களை பயன்படுத்த கண்டிப்பாக அனுமதிக்கப்படாது.

நீர் நிலைகள் மாசுபடுவதை தடுக்கும் பொருட்டு, வைக்கோல் போன்ற சுற்றுச்சூழலுக்கு உகந்த பொருட்கள் மட்டுமே சிலைகள் தயாரிக்க அல்லது சிலைகள், பந்தல்களை அலங்கரிக்க பயன்படுத்த வேண்டும். சிலைகளுக்கு வர்ணம் பூசுவதற்கு நச்சு மற்றும் மக்காத ரசாயண சாயம், எண்ணெய் வண்ணப்பூச்சுகளை கண்டிப்பாக பயன்படுத்தக்கூடாது.

சிலைகளின் மீது எனாமல் மற்றும் செயற்கை சாயத்தை அடிப்படையாக கொண்ட வண்ணப்பூச்சுகளை பயன்படுத்தக்கூடாது. சுற்றுச்சூழலுக்கு உகந்த நீர் சார்ந்த, மக்கக் கூடிய, நச்சு கலப்பற்ற இயற்கை சாயங்கள் மட்டுமே பயன்படுத்தப்பட வேண்டும்.சிலைகளை அழகுபடுத்த வண்ணப்பூச்சுகள் மற்றும் பிற நச்சு ரசாயனங்கள் கொண்ட பொருட்களுக்கு பதிலாக, இயற்கை பொருட்கள் மற்றும் இயற்கை சாயங்களால் செய்யப்பட்ட அலங்கார ஆடைகள் மட்டுமே பயன்படுத்தப்படவேண்டும்.

விநாயகர் சிலைகளை மாவட்ட நிர்வாகத்தினால் குறிப்பிடப்பட்டுள்ள இடங்களில் மட்டும் தமிழ்நாடு மாசுக் கட்டுப்பாடு வாரியத்தின் விதிமுறைகளின்படி கரைக்க அனுமதிக்கப்படுகிறது. விநாயகர் சதுர்த்தி விழாவினை சுற்றுச்சூழலை பாதிக்காதவாறு கொண்டாட வேண்டும் என பொதுமக்கள் கேட்டுக் கொள்கிறார்கள். கூடுதல் தகவல்களுக்கு மாவட்ட ஆட்சியர், காவல் துறை கண்காணிப்பாளர் மற்றும் மாவட்ட சுற்றுச்சூழல் பொறியாளர் இவர்களை அணுகலாம்'' என தெரிவிக்கப்பட்டுள்ளது.

English summary

Vinayagar chaturthi 2023: The guidelines regarding the Visarjanam of Ganesha idols on the occasion of Vinayagar Chaturthi festival have been released. During the celebration of Ganesha Chaturthi festival, procedures for dissolving Ganesha idols in water bodies should be followed as per Central Pollution Control Board guidelines.