ஹஜ் புனித யாத்திரை! ஆன்லைனில் 20ஆம் தேதி வரை விண்ணப்பிக்கலாம்! கால நீட்டிப்பு தந்த ஹஜ் கமிட்டி!

ஹஜ் யாத்திரைக்கு ஆன்லைனில் 20ஆம் தேதி வரை விண்ணப்பிக்கலாம்

சென்னை: ஹஜ் புனித யாத்திரை மேற்கொள்வோர் வரும் 20ஆம் தேதி வரை ஆன்லைனில் விண்ணப்பிக்கலாம் என கால நீட்டிப்பு வழங்கியுள்ளது ஹஜ் கமிட்டி.

இது தொடர்பாக தமிழக அரசின் சிறுபான்மையினர் நலத்துறை முதன்மைச் செயலாளர் விடுத்துள்ள அறிவிப்பின் விவரம் வருமாறு;

இந்திய ஹஜ் குழுவானது, புனித ஹஜ் பயணிகள் ஆன்லைன் மூலம் விண்ணப்பிக்கும் கடைசி தேதியினை 20.03.2023 வரை நீட்டித்துள்ளது.

ஆன்லைன் விண்ணப்பத்தை இந்திய ஹஜ் குழு இணையதளம் மூலம் அதாவது www.hajcommittee.gov.in என்ற இணையம் வழியாக (அல்லது) மும்பை இந்திய ஹஜ் குழுவின் "HCol" செயலியினை கைபேசியில் பதிவிறக்கம் செய்வதன் மூலம் விண்ணப்பத்தை பூர்த்தி செய்யலாம்.

இதனைத் தொடர்ந்து விண்ணப்பதாரர்கள் 20.03.2023 அன்று அல்லது அதற்கு முன்னர் வழங்கப்பட்டு குறைந்தது 03.02.2024 வரையில் செல்லத் தக்க இயந்திரம் மூலம் படிக்கத்தக்க பாஸ்போர்டின் முதல் மற்றும் கடைசி பக்கம், வெள்ளை பின்னணியுடன் கூடிய சமீபத்திய பாஸ்போர்ட் அளவு புகைப்படம், உள்ளிட்டவற்றை பதிவேற்றம் செய்ய வேண்டும்.

குழுத் தலைவரின் ரத்து செய்யப்பட்ட காசோலை நகல் அல்லது IFSC குறியீட்டுடன் கூடிய சேமிப்பு வங்கிக் கணக்கு புத்தக நகல் மற்றும் முகவரிச் சான்றின் நகல் ஆகியவற்றை பதிவேற்றம் செய்யவேண்டும்.

கூடுதல் விவரங்கள் அறிய விண்ணப்பதாரர்கள் இந்திய ஹஜ் குழு இணையதள முகவரி (www.hajcommittee.gov.in)-ஐ தொடர்பு கொள்ளலாம்.

English summary

The Hajj committee has extended the deadline to apply online till the 20th for Hajj pilgrims.