கிருஷ்ணகிரி குஷி.. தர்மபுரி துள்ளுது, சேலம் ஹேப்பி.. இன்று நலத்திட்ட உதவி.. முதல்வர் ஸ்டாலின் அதிரடி

சென்னை: தருமபுரி, சேலம், கிருஷ்ணகிரி என 3 மாவட்டங்களை சேர்ந்த 8,736 பயனாளிகளுக்கு நலத்திட்ட உதவிகளை முதல்வர் ஸ்டாலின் இன்று வழங்குகிறார். மேலும், புதிய வளர்ச்சித் திட்டங்களை அறிவித்தலுக்கான அரசு விழாவும் இன்று நடைபெறுகிறது.

தமிழக முதல்வர் ஸ்டாலின் தர்மபுரியில் இன்று காலை 10 மணிக்கு நடைபெறும் அரசு விழாவில் பங்கேற்கிறார்.. இதற்காக சென்னையிலிருந்து விமானம் மூலம் இன்று காலை சேலம் விமான நிலையத்திற்கு வரும் முதல்வர், அங்கிருந்து கார் மூலம் தர்மபுரி அரசு கலைக்கல்லூரிக்கு 11 மணிக்கு வந்து அரசு விழாவில் பங்கேற்கிறார்.

குறும்படம்: இந்த விழாவில் தர்மபுரி, சேலம், கிருஷ்ணகிரி மாவட்டங்கள் குறித்த குறும்படம் திரையிடப்படுகிறது... இதையடுத்து முதல்வர் ஸ்டாலின் தர்மபுரி, சேலம் மற்றும் கிருஷ்ணகிரி மாவட்டங்களில் முடிவுற்ற 993 திட்டப்பணிகளை திறந்து வைக்கிறார்.

பின்னர், ரூ.560 கோடி மதிப்பீட்டில் 75 புதிய திட்டப்பணிகளுக்கு அடிக்கல் நாட்ட உள்ளார்.. இதற்குபிறகு, முதல்வர் ஸ்டாலின் விழா பேருரையாற்றுகிறார்

தொடர்ந்து தர்மபுரி, கிருஷ்ணகிரி, சேலம் மாவட்டங்களை சேர்ந்த 8,736 பயனாளிகளுக்கு அரசு நலத்திட்ட உதவிகளை முதல்வர் வழங்க உள்ளார்..

நலத்திட்ட உதவிகள்: 560 கோடி ரூபாய் மதிப்பீட்டில், வருவாய்த்துறை, ஊரக வளர்ச்சித்துறை, வேளாண் துறை, பழங்குடியினர் நலத்தறை, கூட்டுறவுத்துறை, சமூகநலத்துறை, நகர்ப்புற வாழ்விட மேம்பாட்டு வாரியம் உள்ளிட்ட துறைகளின் சார்பில், தருமபுரிகி கிருஷ்ணகிரி சேலம் என 3 மாவட்டங்களை சேர்ந்த 8736 பயனாளிகளுக்கு நலத்திட்ட உதவிகளை வழங்குகிறார் முதல்வர்.

இந்த விழாவில் அமைச்சர்கள் கேஎன் நேரு, எம்ஆர்கே பன்னீர்செல்வம், சக்கரபாணி, தர்மபுரி மாவட்ட கலெக்டர் சாந்தி, உள்ளிட்ட அதிகாரிகள், எம்பி, எம்எல்ஏக்கள், உள்ளாட்சி அமைப்புகளின் பிரதிநிதிகள், பொதுமக்கள் கலந்து கொள்கின்றனர்.

வரவேற்பு: முன்னதாக விமானம் மூலம் சேலம் மாவட்டம் காமலாபுரம் விமான நிலையத்தை அடையும் முதல்வர், அங்கிருந்து சாலை மார்க்கமாக காரில் தருமபுரி அரசு கலைக் கல்லூரிக்கு செல்கிறார். அவரது வருகையையொட்டி கடந்த 8-ம் தேதியிலிருந்தே பல்வேறு ஏற்பாடுகளில் அரசு இயந்திரமும், திமுக-வினரும் பம்பரமாக சுழன்று கொண்டிருக்கிறார்கள்.

தர்மபுரி, கிருஷ்ணகிரி, சேலம் என 3 மாவட்டங்களிலும் முதல்வரின் வருகையையொட்டி, பலத்த பாதுகாப்பு ஏற்பாடுகள் செய்யப்பட்டுள்ளன.. அதேபோல, சேலம் விமான நிலையத்திலிருந்து, தருமபுரிக்கு வருகை தரும் முதல்வருக்கு சேலம், தருமபுரி திமுக சார்பில் வரவேற்பு அளிக்கப்பட உள்ளது.

English summary

Happy News for Krishnagiri, Dharmapuri Salem and CM MK Stalin to visit 3 districts to attend state function