ஊட்டி, கொடைக்கானல் போறவங்க கவனிங்க.. செப்டம்பர் 30 வரை இ-பாஸ் கட்டாயம்.. நீட்டித்து ஐகோர்ட் உத்தரவு!

சென்னை: ஊட்டி, கொடைக்கானல் செல்லும் சுற்றுலா பயணிகளுக்கான இ-பாஸ் வழங்கும் நடைமுறையை செப்டம்பர் 30 வரை நீட்டித்து சென்னை உயர் நீதிமன்ற சிறப்பு அமர்வு உத்தரவிட்டுள்ளது.

தமிழ்நாட்டில் உள்ள சுற்றுலா தலங்களான உதகை , கொடைக்கானலுக்கு ஏராளமான சுற்றுலாப் பயணிகள் செல்வது வழக்கம். இதன் காரணமாக சீசன் நேரங்களில் கடுமையான வாகன நெரிசல் , விடுதி அறைகள் பற்றாக்குறை, உணவு பெறுவதில் சிக்கல் உள்ளிட்ட பல்வேறு பிரச்சனைகள் எழுகின்றன.

ஊட்டியில் சுற்றுலா பயணிகள் வருகையை நெறிப்படுத்தும் வகையில் இ-பாஸ் முறையை அமல்படுத்த உயர்நீதிமன்றம் தமிழக அரசுக்கு உத்தரவிட்டது. மே 7 ஆம் தேதி முதல் ஜூன் 30 ஆம் தேதி வரை உதகை மற்றும் கொடைக்கானல் செல்வோர் இ-பாஸ் கட்டாயம் என அறிவிக்கப்பட்டது.

அதன்படி தமிழ்நாடு மின் ஆளுமை முகமையின் epass.tnega.org என்ற இணையதளம் வாயிலாக, இ-பாஸ் பெறும் நடைமுறை அமலுக்கு வந்தது. தமிழ்நாடு மற்றும் பிற மாநிலங்களை சேர்ந்த சுற்றுலாப் பயணிகள் தொலைபேசி எண்களை அடிப்படையாக வைத்து விண்ணப்பிக்கலாம் என்றும் தெரிவிக்கப்பட்டு இருந்தது.

கடந்த மே 7ஆம் தேதி முதல் அமலுக்கு வந்த இ - பாஸ் நடைமுறை வரும் 30 ஆம் தேதியுடன் நிறைவடைய இருந்த நிலையில், ஊட்டி, கொடைக்கானல் செல்லும் சுற்றுலா பயணிகளுக்கான இ-பாஸ் பெறும் நடைமுறையை வரும் செப்டம்பர் 30 ஆம் தேதி வரை நீட்டித்து சென்னை உயர் நீதிமன்ற சிறப்பு அமர்வு உத்தரவு பிறப்பித்துள்ளது.

இ- பாஸ் நடைமுறையை மேலும் மூன்று மாதங்களுக்கு நீட்டிக்கலாம் என்று அரசு தரப்பு வாதம் முன்வைத்தது. இ-பாஸ் முறை அமல்படுத்தப்பட்டது குறித்து நீலகிரி, திண்டுக்கல் மாவட்ட ஆட்சியர்கள் தரப்பில் அறிக்கை தாக்கல் செய்துள்ளனர்.

ஊட்டி, கொடைக்கானலுக்கு எத்தனை வாகனங்கள் செல்லலாம் என சென்னை ஐ.ஐ.டி., பெங்களூரு ஐ.ஐ.எம். நிறுவனங்கள் ஆய்வு செய்து வருவதாக தெரிவிக்கப்பட்டுள்ளது. இந்நிலையில், மேலும் இ பாஸ் நடைமுறையை மேலும் 3 மாதங்களுக்கு நீட்டித்து உயர்நீதிமன்றத்தில் சிறப்பு அமர்வு உத்தரவு அளித்துள்ளது.

English summary

A special bench of the Madras High Court has extended the process of issuing e-pass to tourists going to Ooty and Kodaikanal till September 30.