இந்தியில் தகவல்கள்.. தேர்தல் ஆணைய இணையதளத்தில் தமிழ் மொழி புறக்கணிப்பு! கடும் எதிர்ப்பு

சென்னை: இந்திய தேர்தல் ஆணையத்தின் வெப்சைட்டில், தமிழக வேட்பாளர்கள் தொடர்பான விவரங்கள் பதிவேற்றப்பட்டிருக்கின்றன. ஆனால், இந்த தகவல்கள் ஆங்கிலத்திலும், இந்தியிலும் மட்டும் இருப்பதால், கடும் எதிர்ப்புகள் எழுந்திருக்கின்றன.

தமிழ்நாட்டில் நடைபெறும் தேர்தல் தொடர்பான விவரங்கள் தமிழில் இல்லை என்பதால், அரசியல் தலைவர்கள் இது குறித்த கேள்வி எழுப்ப தொடங்கியிருக்கின்றனர்.

தமிழ்நாடு சட்டமன்ற தேர்தல்

தமிழகத்திற்கு ஏப்.23ம் தேதி ஒரே கட்டமாக தேர்தல் நடைபெறுகிறது. வேட்பாளர்கள் தங்கள் வேட்பு மனுக்களை தாக்கல் செய்ய தொடங்கியிருக்கின்றனர். இன்று காலை 7.30 மணி நிலவரப்படி மொத்தம் 573 வேட்பாளர்களின் தகவல்கள் https://affidavit.eci.gov.in எனும் தேர்தல் ஆணையத்தின் வெப்சைட்டில் பதிவேற்றப்பட்டிருக்கின்றன.

வேட்பாளர்களின் விவரம்

ஆனால், வேட்பாளர்களின் பெயர், தொகுதி உள்ளிட்ட விவரங்கள் ஆங்கிலத்தில்தான் இருக்கின்றன. மாற்று மொழியாக இந்தி இருக்கிறது. தமிழ்நாட்டில் நடைபெறும் தேர்தல் தொடர்பான விவரங்களை மக்கள் அறிந்துக்கொள்ள வேண்டும் எனில், தமிழில் விவரங்கள் இருப்பது முக்கியம். ஆனால், தமிழ் தவிர்த்து மற்ற மொழிகளில் விவரங்கள் இடம்பெற்றிருப்பது அதிருப்தியை ஏற்படுத்தியிருக்கிறது.

தமிழுக்கு இடமில்லை

ஏற்கனவே கொளத்தூரில் முதலமைச்சர் மு.க.ஸ்டாலின், பெரம்பூரில் தவெக விஜய், வில்லிவாக்கத்தில் ஆதவ் அர்ஜுனா என முக்கிய நபர்கள் வேட்புமனுக்களை தாக்கல் செய்திருக்கின்றனர். இவர்களின் தகவல்கள் வெப்சைட்டில் பதிவேற்றப்பட்டிருக்கின்றன. தகவல்கள் தமிழில் இருந்தாலும், அதை தேடி கண்டுபிடிக்க ஆங்கிலம் மற்றும் இந்தி மொழிகள்தான் இருக்கின்றன. எனவே தமிழ் மொழியில் வெப்சைட் இருப்பதை உறுதி செய்ய வேண்டும் என்று பல்வேறு தரப்பினரும் வலியுறுத்த தொடங்கியுள்ளனர்.

English summary

ECI: Details regarding candidates from Tamil Nadu have been uploaded to the website of the Election Commission of India. However, this has sparked strong protests, as the information is available only in English and Hindi.