சனாதன ஒழிப்பு, மத வெறுப்பு, கோயில்கள் இடிப்பு வேண்டாமே! முதல்வர் ஸ்டாலினுக்கு இந்து முன்னணி கோரிக்கை

சென்னை: அரசியல் சுயலாபத்துக்காக வெறுப்பு அரசியல் போக்கை கைவிட வேண்டும் என தமிழக முதல்வர் ஸ்டாலினுக்கு, இந்து முன்னணி அமைப்பின் மாநில தலைவர் காடேஸ்வரா சுப்பிரமணியம் கோரிக்கை விடுத்துள்ளார்.

இதுகுறித்து காடேஸ்வரா சுப்ரமணியம் அறிக்கை: காங்கிரஸ் தேர்தல் அறிக்கையில், முஸ்லிம் மாணவர்கள் வெளிநாடுகளில் கல்வி பயில அரசே கட்டணம் செலுத்தும் என தெரிவித்துள்ளது. பெரும்பான்மை ஹிந்துக்களை புறக்கணித்து சிறுபான்மையினருக்கு முன்னுரிமை அளித்து, பிரிவினைவாதத்தை ஏற்படுத்தி, ஓட்டு வங்கி அரசியலை காங்கிரஸ் செய்கிறது.

உலகத்தரம் வாய்ந்த கல்வி நிறுவனங்களை அமைப்பதை விடுத்து, வெளிநாட்டில் படிக்க, அரசு கட்டணம் செலுத்தும் என்று அக்கட்சி அறிவிக்கிறது. குறிப்பிட்ட பிரிவினருக்காக நம் நாட்டு கல்வி நிறுவனங்களை சிறுமைப்படுத்தி, வெளிநாட்டு நிறுவனங்களை உயர்த்திப் பிடிக்கிறது.

ஹிந்து பண்டிகை புறக்கணிப்பு, சனாதனம் ஒழிப்பு, கோவில்கள் இடிப்பு, மத சடங்குகளை புறக்கணிப்பது, கேலி செய்வது போன்ற தி.மு.க.,வினரின் செயல்கள் அன்றாட நிகழ்வாகி விட்டன. தமிழர்கள், ஹிந்துக்கள் அடையாளங்களை அழிக்கும் விதமான செயல்கள், நாளுக்கு நாள் அதிகரித்து வருகின்றன.

இதுபோன்ற மத வெறுப்பு அரசியல் தான் ஒழிக்கப்பட வேண்டுமே தவிர, தேச ஒற்றுமையை நிலைநிறுத்தும், 'அனைவரும் இணைந்து அனைவருக்குமான வளர்ச்சி' என்ற தேச ஒற்றுமை வாதம் ஒழிக்கப்பட வேண்டியதல்ல.

திருமாவளவன், ஜவாஹிருல்லா போன்றோர், முஸ்லிமாக மாறிய பட்டியல் சமூக மக்களுக்கும், ஹிந்துவாக உள்ள பட்டியல் சமூக மக்களுக்கு வழங்கும் சலுகைகளை வழங்க வேண்டும் என்கின்றனர். அது, ஹிந்துவாக உள்ள பட்டியல் சமூக மக்களின் உரிமையை பறிக்கும் செயல். தேச ஒற்றுமை, வளர்ச்சி, தேசிய உணர்வுக்கு எதிரான அக்கட்சிகளின் நாடகத்தை மக்கள் புறக்கணிக்க வேண்டும். இவ்வாறு அவர் கூறியுள்ளார்.

English summary

Hindu Front organisation State President Kadeswara Subramanian demands CM Stalin to stop caste politics.