போதை பொருள் கடத்தல்! கனிமவள சுரண்டல்! திமுக அரசை கண்டித்து போராட இந்து முன்னணி அழைப்பு

சென்னை: போதை பொருள் நடமாட்டத்திற்கு எதிராக அரசை கண்டித்து போராட்டம் நடத்த வருமாறு இந்து முன்னணி அமைப்பின் மாநில தலைவர் காடேஸ்வரா சுப்பிரமணியம் அழைப்பு விடுத்துள்ளார்.

தமிழகத்தில் போதை பொருட்களின் புழக்கம் அதிகரித்து வருவதாக சொல்லப்படுகிறது. தமிழக இளைஞர்கள் கஞ்சா உள்ளிட்ட போதை வஸ்துகளுக்கு அடிமையாகி வருகிறார்கள். இதை தமிழக அரசு தடுக்க வேண்டும் என்ற கோரிக்கை எழுந்துள்ளது.

மேலும் தமிழகத்தில் டாஸ்மாக் கடைகளை மூடுமாறும் கோரிக்கைகள் எழுந்துள்ளது. இதுகுறித்து ஹிந்து முன்னணி மாநில தலைவர் காடேஸ்வரா சுப்ரமணியம் அறிக்கை:

தி.மு.க.,வைச் சேர்ந்த ஆலங்குளம் ஒன்றிய கவுன்சிலர் சுபாஷ் சந்திரபோஸ் தனது காரில், 600 கிலோ குட்கா கடத்தியது சிவகிரி செக்போஸ்ட்டில் கண்டறியப்பட்டு கைது செய்யப்பட்டார். அவரது மனைவி தென்காசி மாவட்ட கவுன்சிலர்.

தடை செய்யப்பட்ட குட்கா மற்றும் போதை பொருள் கடத்தலில், தி.மு.க.,வைச் சேர்ந்த முக்கிய பிரமுகர்கள் கைது செய்யப்படுவது இது முதன்முறை அல்ல.

வேலுார் மாவட்டத்தில், ஒரே நாளில், 2,500 லிட்டர் கள்ளச்சாராயம், ஊறல் கண்டுபிடிக்கப்பட்டு அழிக்கப்பட்டு உள்ளது.

தொடர்ச்சியான கைதுகள், சட்ட விரோத போதை பொருள் விவகாரத்தில் தி.மு.க.,வினர் தொடர்ச்சியாக ஈடுபடுகின்றனரோ... இதை முதல்வரும் கண்டும் காணாமல் இருக்கிறாரோ என்ற ஐயத்தை ஏற்படுத்துகிறது.

போதை கடத்தல் மட்டுமல்லாமல், கனிமவள சுரண்டல்களிலும், தி.மு.க.,வினர் சம்பந்தப்பட்டிருப்பது அமலாக்கத்துறை விசாரணையில் தெரிய வருகிறது.

எனவே, அரசை அழுத்தம் கொடுத்து செயல்பட வைக்க, மக்கள் போராட்டம் தவிர வேறு வழியில்லை. எனவே, மக்கள் பகிரங்கமாக போதை பொருட்களுக்கு எதிராக, செயலற்ற அரசுக்கு எதிராக போராட முன்வர வேண்டும். இவ்வாறு அவர் கூறியுள்ளார்.

English summary

Hindu front state president Kadeswara Subramaniam calls to protest against tamilnadu government for drugs.