‛‛12 நாட்கள்’’.. 2024ல் ரேஷன் கடைகளுக்கான பொது விடுமுறை நாள் லிஸ்ட் இதோ! வெளியான முக்கிய அறிவிப்பு
சென்னை: தமிழ்நாட்டில் உள்ள ரேஷன் கடைகளுக்கு 2024ம் ஆண்டில் 12 நாட்கள் பொதுவிடுமுறை தினம் என அறிவிக்கப்பட்டுள்ளது.
ஒவ்வொரு வருடமும் தமிழக அரசு சார்பில் பொது விடுமுறை நாட்கள் குறித்த பட்டியல் ஆண்டு இறுதியில் வெளியிடப்பட்டு வருகிறது. அந்த வகையில் 2024ம் ஆண்டிற்கான தமிழக அரசின் பொது விடுமுறை நாட்கள் 24 நாட்கள் என அறிவிக்கப்பட்டுள்ளன.
அதன்படி இந்த 24 பொது விடுமுறை நாட்களில் தமிழக அரசின் கட்டுப்பாட்டில் வரும் அனைத்து அலுவலகங்கள், நிறுவனங்களுக்கும் விடுமுறை என்பது வழங்கப்படும் என தமிழக தலைமை செயலாளர் சிவ்தாஸ் மீனா உத்தரவு பிறப்பித்துள்ளார்.
இது அனைத்து அரசு அலுவலகங்கள், பள்ளி, கல்லூரிகளுக்கு பொருந்தினாலும் கூட ரேஷன் கடைகளுக்கு ஆண்டுதோறும் தனியே பொது விடுமுறை தினம் என்பது அறிவிக்கப்படும். அதன்படி 2024ம் ஆண்டில் தமிழ்நாட்டில் இயங்கி வரும் அனைத்து ரேஷன் கடைகளுக்கும் பொதுவிடுமுறை விடப்படும் நாட்களின் பட்டியல் வெளியிடப்பட்டுள்ளது.
இந்த பட்டியலை தமிழ்நாடு உணவு பொருள் வழங்கல் மற்றும் நுகர்வோர் பாதுகாப்பு துறை ஆணையாளர் வெளியிட்டுள்ளார். அதில், பொங்கல், தீபாவளி, விநாயகர் சதுர்த்தி, கிறிஸ்துமஸ் உள்பட 12 நாட்கள் பொது விடுமுறை தினமாக அறிவிக்கப்பட்டுள்ளது. இதில் ஒரு ஞாயிற்றுக்கிழமை வருகிறது.
அதன்படி பொங்கல் (ஜனவரி15 -திங்கட்கிழமை), தைப்பூசம் (ஜனவரி 25 -வியாழக்கிழமை), குடியரசு தினம் (ஜனவரி 26 -வெள்ளிக்கிழமை), ரம்ஜான் (ஏப்ரல் 11 -வியாழக்கிழமை), தமிழ் புத்தாண்டு/டாக்டர் பிஆர் அம்பேத்கர் பிறந்த தினம் (ஏப்ரல் 14, ஞாயிற்றுக்கிழமை) ஆகியவை பொது விடுமுறை தினமாக அறிவிக்கப்பட்டுள்ளது.
இதுதவிர மே தினம் (மே 1 -புதன்கிழமை), சுதந்திர தினம் (ஆகஸ்ட் 15 -வியாழக்கிழமை), விநாயகர் சதுர்த்தி (செப்டம்பர் 7 -சனிக்கிழமை), காந்தி ஜெயந்தி (அக்டோபர் 2 - புதன் கிழமை), விஜயதசமி (அக்டோபர் 12 -சனிக்கிழமை), தீபாவளி (அக்டோபர் 31 -வியாழக்கிழமை), கிறிஸ்துமஸ் (டிசம்பர் 25 -புதன்கிழமை) என மொத்தம் 12 நாட்கள் ரேஷன் கடைகளுக்கு பொது விடுமுறை தினம் அறிவிக்கப்பட்டுள்ளது.
Click it and Unblock the Notifications
Sign in with Google