எவ்வளவு காசு கொடுத்தாலும் இறப்பு சீனில் நடிக்கவே மாட்டேன்.. மரணம் பற்றி டெல்லி கணேஷ் சொன்ன விஷயம்

Updated: Sunday, November 10, 2024, 9:40 [IST]

Subscribe to Oneindia Tamil

சென்னை: எவ்வளவு பணம் கொடுத்தாலும் இறந்து போகிற மாதிரி சீன் எல்லாம் வைத்தால் நடிக்க மாட்டேன் என்று சொல்லிவிடுவேன். யாரையோ படுக்க வைத்து மாலை போட்டுக்கொள்ளுங்கள்.. என்னை படுக்க வைத்து மாலையை போடுவது, அழுவது எல்லாம் ஒத்துக்கொள்ள மாட்டேன் என்று டெல்லி கணேஷ் முன்பு கூறியுள்ளார்.

பழம்பெரும் நடிகர் டெல்லி கணேஷ் நேற்று இரவு வயது முதிர்வு, உடல் நலக்குறைவால் காலமானார். கலைத்துறையில் தனக்கென தனி முத்திரை பதித்து காமெடி, வில்லன், குணச்சித்திர கேரக்டர் என எல்லா கதாபாத்திரத்திலும் அற்புதமாக நடிக்கும் அசாத்திய திறன் பெற்றவர். நேற்று இரவு 11.30 மணியளவில் காலமானார். அவருக்கு வயது 80.

டெல்லி கணேஷின் சொந்த ஊர் தூத்துக்குடி மாவட்டம் வல்லநாடு (முன்பு திருநெல்வேலி) ஆகும். உடன்பிறந்தோர் மொத்தம் 11 பேர். 9 பேர் ஆண்கள். 2 பெண்கள். முதலில் இந்திய விமானப்படையில் தான் டெல்லி கணேஷ் பணி செய்து வந்தார். அதாவது 1964 முதல் 1974 வரை டெல்லி கணேஷ் விமானப்படையில் பணியாற்றினார். இதன்பிறகு திரைப்படங்களில் நடிக்க வேண்டும் என்று அப்பணியில் இருந்து விலகினார்.

இயக்குனர் கே பாலச்சந்தரால் டெல்லி கணேஷ் என்ற பெயர் கிடைத்தது. பட்டின பிரவேசம் என்ற படத்தில் இயக்குனர் கே பாலச்சந்தர் டெல்லி கணேஷை திரைத்துறையில் அறிமுகம் செய்தார். இதனை தொடர்ந்து நடிகர், வில்லன், காமெடியன், குணச்சித்திர வேடம் என எல்லா கதாப்பாத்திரத்திலும் நடிக்க ஆரம்பித்தார். சுமார் 400க்கு மேற்பட்ட படங்களில் நடித்துள்ளார்.

எல்லாவித கேரக்டர்களிலும் நடித்த டெல்லி கணேஷ் எவ்வளவும் பணம் கொடுத்தாலும் இறந்து போனது போன்ற சீனில் மட்டும் நடிக்க மாட்டேன் என்று சொல்லியிருக்கிறார். படுக்க வைத்து மாலையை போட்டு அழுவது எல்லாம் ஒத்துவராது என்று கூறியிருக்கிறார். இது தொடர்பாக டெல்லி கணேஷ் கூறியிருப்பதாவது:-

எவ்வளவு பணம் கொடுத்தாலும் இறந்து போகிற மாதிரி சீன் எல்லாம் வைத்தால் நடிக்க மாட்டேன் என்று சொல்லிவிடுவேன். யாரையோ படுக்க வைத்து மாலை போட்டுக்கொள்ளுங்கள்.. என்னை படுக்க வைத்து மாலையை போடுவது, அழுவது எல்லாம் ஒத்துக்கொள்ள மாட்டேன்.. நீங்க கொடுக்கிற காசுக்கு அதெல்லாம் பண்ண முடியாது என சொல்லிவிடுவேன்.

நிறைய காசு கொடுத்தால் பண்ணுவீர்களா என்று கேட்பார்கள்.. எவ்வளவு கொடுத்தாலும் செய்ய மாட்டேன் என்று சொல்லிவிடுவேன். இறப்பு மேலே யாருக்கு பயம் இல்லை. இந்த தேதியில் இறந்துவிடுவேன் என சொன்னால் பயப்படாதவர்களே இருக்க மாட்டார்கள். இறப்பு என்பது திடீரென்று வருவதுதான்.. மரணம் என்பது நிரந்தரம். அது தெரியாத வரைக்கும் நாம ராஜா" என்றார்.

பட்டின பிரவேசம் படத்தில் அறிமுகமான டெல்லி கணேஷ், 1981ல் எங்கம்மா மகாராணி படத்தில் ஹீரோவாக நடித்தார். கமல்ஹாசனின் அபூர்வ சகோதரர்கள் (1989) படத்தில் வில்லன் கதாபாத்திரம் ஏற்றார். இதுவும் பெரிய ஹிட் அடித்தது. 1979 இல் பாசி படத்தில் நடித்ததற்காக தமிழ்நாடு மாநில திரைப்பட விருதின் சிறப்புப் பரிசைப் பெற்றார். 1994 ஆம் ஆண்டு அப்போதைய முதல்வர் ஜெ.ஜெயலலிதா வழங்கிய கலைமாமணி போன்ற மாநில விருதுகளையும் டெல்லி கணேஷ் பெற்றுள்ளார்.