இளையராஜா வீட்டில் அஞ்சலிக்கு வைக்கப்பட்ட பவதாரிணி உடல்.. இரவு தேனிக்கு எடுத்துச்செல்ல உள்ளதாக தகவல்!

சென்னை: இளையராஜாவின் மகள் பவதாரிணியின் உடல் இலங்கையில் இருந்து சென்னைக்கு கொண்டு வரப்பட்டு, தி.நகரில் உள்ள இளையராஜா இல்லத்தில் அஞ்சலிக்காக வைக்கப்பட்டுள்ளது. இன்று இரவு 10 மணிக்கு மேல், அவரது உடல் தேனி மாவட்டம் பண்ணைப்புரத்திற்கு கொண்டு செல்ல உள்ளதாக தகவல் வெளியாகியுள்ளது.

உடல்நலக்குறைவால் உயிரிழந்த பின்னணி பாடகி பவதாரிணி உடல் சென்னை கொண்டுவரப்பட்டது. இளையராஜாவின் மகளும், பிரபல பாடகியுமான பவதாரிணி நேற்று ஜனவரி 25ஆம் தேதி காலமானார். கடந்த சில ஆண்டுகளாக இவர் புற்றுநோயால் பாதிக்கப்பட்டிருந்த நிலையில், இலங்கையில் சமீபத்தில் புற்றுநோய்க்கு ஆயுர்வேத மருத்துவ சிகிச்சை பெற்று வந்தார்.

சிகிச்சை பலனின்றி நேற்று ஆம் தேதி இலங்கையில் காலமானார் பவதாரிணி. இவருடைய திடீர் மறைவு திரைத்துறையில் பெரும் சோகத்தையும், அதிர்ச்சியையும் ஏற்படுத்தியுள்ளது. முதலமைச்சர் மு.க.ஸ்டாலின், இசையமைப்பாளர்கள் ஏ.ஆர்.ரஹ்மான், சந்தோஷ் நாராயணன், நடிகர் கமல்ஹாசன் உள்ளிட்ட பிரபலங்கள் இரங்கல் தெரிவித்துள்ளனர்.

இதனையடுத்து, பாடகி பவதாரிணியின் உடலை இலங்கையில் இருந்து இந்தியாவுக்கு கொண்டு வருவதற்காக சகோதரர் யுவன் சங்கர் ராஜா இலங்கை இன்று காலை புறப்பட்டார். இந்த நிலையில், பவதாரிணி உடல் விமானம் மூலம் சென்னை கொண்டுவரப்பட்டது.

இலங்கையில் இருந்து ஸ்ரீலங்கா ஏர்லைன்ஸ் UL 127 என்ற விமானம் மூலம் பவதாரிணியின் உடல் சென்னைக்கு கொண்டு வரப்பட்டது. கொழும்புவில் உள்ள தனியார் மருத்துவமனையில் பிரேத பரிசோதனை முடித்து, இன்று பவதாரிணி உடல் சென்னை வந்தது.

பவதாரிணியின் உடலை பெறுவதற்காக அவரது சகோதரர் கார்த்திக் ராஜா, இயக்குநர் வெங்கட் பிரபு, நடிகர் சுப்பு பஞ்சு அருணாச்சலம் ஆகியோர் சென்னை விமான நிலைய கார்கோ பிரிவிற்கு வந்திருந்தனர். அவர்கள், அங்கிருந்து பவதாரிணி உடலை பெற்றுக்கொண்டனர்.

பவதாரிணி உடல் தியாகராய நகரில் உள்ள இளையராஜா இல்லத்திற்கு கொண்டு செல்லப்பட்டது. அங்கு அஞ்சலிக்காக வைக்கப்பட உள்ளது. 5 மணிக்கு மேல் பிரபலங்கள் மற்றும் அரசியல் தலைவர்கள் நேரில் வந்து அஞ்சலி செலுத்துவார்கள் எனத் தெரிகிறது. தற்போது இளையராஜா இல்லத்திற்கு கங்கை அமரன் மகன் பிரேம்ஜி, பாரதிராஜா மகன் மனோஜ் ஆகியோர் வருகை தந்துள்ளனர்.

பாடகி பவதாரிணி உடலுக்கு அஞ்சலி செலுத்த நடிகர் விஜய்யின் தாயார் ஷோபா சந்திரசேகர், பின்னணி பாடகர் மனோ, இயக்குநர் சுதா கொங்கரா உள்ளிட்டோர் வருகை தந்துள்ளனர். அஞ்சலிக்கு பிறகு பவதாரிணியின் உடல் தேனிக்கு எடுத்துச் செல்லப்பட்டு நல்லடக்கம் செய்யப்பட உள்ளதாக தகவல் வெளியாகியுள்ளது.

English summary

The body of Ilayaraja's daughter Bhavatharini was brought from Sri Lanka to Chennai by a Sri Lanka Airlines flight.