75 ஆண்டுகளில் 445 கி.மீ. மட்டுமே புதிய ரயில் பாதைகள் அமைப்பு! திடுக் தகவல்

சென்னை: சுதந்திரத்திற்குப் பிறகு தமிழகத்தில் கடந்த 75 ஆண்டுகளில் வெறும் 445 கி.மீ மட்டுமே புதிய ரயில் பாதைகள் அமைக்கப்பட்டுள்ளன என தகவல்கள் வெளியாகியுள்ளன.

இதுகுறித்து ரயில் தகவல் எனும் ட்விட்டர் பக்கத்தில் கூறியிருப்பதாவது: இந்தியச் சுதந்திரத்திற்குப் பிறகு தமிழகத்தில் ஆங்கிலேயர் காலத்து வழித்தடங்கள் அல்லாத, முற்றிலும் புதிதாக நிலம் கையகப்படுத்தப்பட்டு உருவாக்கப்பட்ட முக்கிய ரயில் பாதைகள் (மீட்டர் கேஜ் பாதையிலிருந்து அகலப்பாதையாக மாற்றப்பட்ட பழைய தடங்கள் நீங்கலாக):

திருவனந்தபுரம் - கன்னியாகுமரி & நாகர்கோவில் - திருநெல்வேலி (161 கி.மீ): 1979 மற்றும் 1981-ல் திறக்கப்பட்டவை. ரயில் வசதி இல்லாதிருந்த இந்தியாவின் தென்கோடியான கன்னியாகுமரியை தேசிய அகலப் பாதை (Broad Gauge) நெட்வொர்க்குடன் இணைப்பதற்காகச் சுதந்திர இந்தியாவில் உருவாக்கப்பட்ட பிரம்மாண்டமான புதிய வழித்தடம்.

சேலம் - நாமக்கல் - கரூர் (85 கி.மீ): 2013-ல் மக்கள் பயன்பாட்டிற்கு வந்தது. சேலத்தில் இருந்து தென் மாவட்டங்களுக்குச் செல்லும் பயண தூரத்தையும் நேரத்தையும் கணிசமாகக் குறைத்த முக்கிய அகலப் பாதை.

கரூர் - திண்டுக்கல் (74 கி.மீ): சுதந்திரத்திற்குப் பிறகு தமிழகத்தில் அமைக்கப்பட்ட முதல் முக்கியப் புதிய அகலப் பாதை இதுவாகும். திருச்சி வழியாகச் சுற்றிச் செல்வதைத் தவிர்த்து, நேரடியாகக் கரூரிலிருந்து திண்டுக்கல்லை இணைக்கும் வகையில் 1980களின் இறுதியில் இது பயன்பாட்டிற்கு வந்தது.

மானாமதுரை - விருதுநகர் (அருப்புக்கோட்டை வழியாக) (67 கி.மீ): 1963-1964 காலக்கட்டத்தில் திறக்கப்பட்டது. தென் தமிழகத்தின் முக்கிய வணிக நகரங்களை இணைப்பதற்காகச் சுதந்திரத்திற்குப் பிறகு அமைக்கப்பட்ட புதிய இணைப்புப் பாதை (Chord Line). ஆரம்பத்தில் முற்றிலும் புதிய மீட்டர் கேஜ் பாதையாக அமைக்கப்பட்டு, பின்னர் அகலப் பாதையாகத் தரம் உயர்த்தப்பட்டது.

சென்னை பறக்கும் ரயில் திட்டம் (MRTS) (19 கி.மீ): சென்னை கடற்கரை முதல் வேளச்சேரி வரை அமைக்கப்பட்ட இந்தியாவின் முதல் உயர்த்தப்பட்ட (Elevated) நகர்ப்புற ரயில் பாதை. போக்குவரத்து நெரிசலைக் குறைப்பதற்காக உருவாக்கப்பட்ட புதிய தடம்.

மீளவிட்டான் - மேல்மருதூர் (18 கி.மீ): மதுரை - தூத்துக்குடி இடையே அருப்புக்கோட்டை வழியாக அமைக்கப்பட்டு வரும் புதிய ரயில் பாதை திட்டத்தில், தூத்துக்குடி (மீளவிட்டான்) முதல் மேல்மருதூர் வரையிலான 18 கி.மீ தூரப் பணிகள் முடிக்கப்பட்டு சமீபத்தில் பயன்பாட்டிற்கு வந்துள்ளன.

நாகூர் - காரைக்கால் (11 கி.மீ): 2011 ஆம் ஆண்டு இந்தப் புதிய அகலப் பாதை திறக்கப்பட்டு மக்கள் பயன்பாட்டிற்கு வந்தது. இதன் மூலம் காரைக்கால் துறைமுகம் மற்றும் முக்கிய ஆன்மீகத் தலங்கள் இந்திய ரயில்வே வலையமைப்போடு இணைக்கப்பட்டன.

நாகப்பட்டினம் - வேளாங்கண்ணி (10 கி.மீ): உலகப் புகழ்பெற்ற வேளாங்கண்ணி மாதா பேராலயத்திற்கு வரும் லட்சக்கணக்கான பக்தர்களின் வசதிக்காக, 2010 ஆம் ஆண்டு இந்தப் புதிய 10 கி.மீ ரயில் பாதை இணைக்கப்பட்டது.

ஆயிரக்கணக்கான கிலோமீட்டர் தூரப் பழைய பாதைகள் வெற்றிகரமாக அகலப் பாதைகளாக மாற்றப்பட்டிருந்தாலும், திண்டிவனம் - நகரி, திண்டிவனம் - திருவண்ணாமலை, மற்றும் ஈரோடு - பழனி போன்ற பல புதிய ரயில் பாதை திட்டங்கள் முழுமையான நிதி ஒதுக்கீடின்றி இன்னும் நிலுவையிலேயே உள்ளன. இவ்வாறு அந்த ட்வீட்டில குறிப்பிடப்பட்டுள்ளது.

English summary

In 75 years of Independence, only 445 kilometers new train path was formed, says Tamil nadu rail info.