நீங்களே கூட நாளைக்கு போராட்டம் நடத்தலாம்! உங்க பேட்டியை பார்த்தேன்! வானதியை கலாய்த்த கே.என்.நேரு!
சென்னை: கோயம்புத்தூரில் சாலை சரியில்லாமல் இருப்பதாக நீங்க பேட்டி கொடுத்ததை நானும் பார்த்தேன் என சட்டசபையில் பாஜக உறுப்பினர் வானதி சீனிவாசனுக்கு பதிலளித்து பேசும் போது அமைச்சர் கே.என்.நேரு கூறினார்.
மேலும், கால்வாய் ஆக்கிரமிப்பு எனக் கூறும் நீங்கள், ஆக்கிரமிப்பாளர்களை அகற்றினால் போராட்டம் நடத்தினாலும் நடத்துவீர்கள் என கலாய்த்தார்.
பாஜக எம்.எல்.ஏ. வானதி சீனிவாசனுக்கு அமைச்சர் கே.என்.நேரு பதிலளித்து பேசும் போது அவையில் சிரிப்பலை எழுந்தது.
சட்டசபைக் கூட்டம்
தமிழக சட்டசபையின் 5ஆம் நாள் கூட்டம் இன்று நடைபெற்ற நிலையில், கோவை தெற்கு தொகுதிக்குட்பட்ட கால்வாய் ஒன்று ஆக்கிரமிப்பு செய்யப்பட்டுள்ளதாகவும் இதனால் முறையாக தூர்வார முடியாத நிலை இருப்பதாகவும் பாஜக சட்டமன்ற உறுப்பினர் வானதி சீனிசாவன் தெரிவித்தார். மேலும், கேள்வி நேரத்தின் போது இது தொடர்பாக கேள்வி எழுப்பிய வானதி சீனிவாசனுக்கு நகராட்சி நிர்வாகத்துறை அமைச்சர் கே.என்.நேரு பதிலளித்தார்.
கலாய்த்த நேரு
அப்போது கோவையில் சாலை சரியில்லாமல் இருப்பதாக நீங்க பேட்டி கொடுத்ததை நானும் பார்த்தேன் என வானதியிடம் கூறிய அமைச்சர் நேரு, கோவையில் சாலைகளை செப்பனிடுவதற்காக ரூ.72கோடி விடுவிக்கப்பட்டு அரசாணை வெளியிடப்பட்ட தகவலை பேரவையில் தெரிவித்தார். மேலும், கால்வாய் ஆக்கிரமிப்பு எனக் கூறுகிறீர்கள் நாளைக்கே அவர்களை காலி செய்ய வைத்தால் நீங்களே போராட்டம் நடத்தினாலும் நடத்துவீர்கள் என கலாய்த்தார்.
எல்லா நகரங்களிலும்
கோவையில் மட்டுமல்ல எல்லா பெரிய நகரங்களிலும் கழிவுநீர் கால்வாய் தூர்வாரும் பிரச்சனைகள் இருக்கிறது என்றும் கோவையில் புதிய சாலைகள் அமைக்க ரூ.200 கோடி விரைவில் விடுவிக்கப்பட இருக்கிறது எனவும் கூறினார். இதனிடையே வானதி சீனிவாசன் பேரவையில் முன்வைத்த கோரிக்கை குறித்து ஆணையரிடம் கலந்து பேசி விரைவில் தீர்வு வழங்கப்படும் என்ற உறுதியை அமைச்சர் கே.என்.நேரு அளித்தார்.
நேரடியாக கேள்வி
திமுக, அதிமுக சட்டமன்ற உறுப்பினர்களை பொறுத்தவரை சட்டசபையில் பேச எழுந்தவுடன் தங்கள் கட்சியின் தலைமையை புகழாமால் கேள்விக்கு செல்ல மாட்டார்கள். இதனிடையே பாஜக சட்டமன்ற உறுப்பினரான வானதி சீனிவாசன் யாரையும் புகழாமல் நேரடியாக கேள்விக்கு வந்ததால் சபாநாயகர் அவர் பேசும் போது எந்த குறுக்கீடும் செய்யவில்லை.
Click it and Unblock the Notifications
Sign in with Google