தொட்டால் தூக்கிரும்..போரை வைத்து வீசப்படும் ’சைபர்’ வலை! மக்களே கவனமாக இருக்கணும்! போலீஸ் வார்னிங்!

சென்னை: இந்தியா பாகிஸ்தான் நாடுகளிடையே வளர்ந்து வரும் மோதல்களின் விளைவாக சைபர் தாக்குதல்களுக்கு அதிக வாய்ப்புகள் உள்ளன, குறிப்பாக பிறநாடுகளின் அரசு ஆதரவு பெற்ற மேம்பட்ட தொடர்ச்சியான அச்சுறுத்தல்கள் இதில் அடங்கும் என்பதால் பொதுமக்கள் மிக கவனமாக இருக்க வேண்டுமென சைபர் கிரைம் போலீசார் எச்சரித்துள்ளனர்.

இதுதொடர்பாக தமிழ்நாடு காவல்துறை வெளியிட்டுள்ள அறிவிப்பில்,"பொது நலன் மற்றும் பாதுகாப்பைக் கருத்தில் கொண்டு, தமிழ்நாடு காவல் துறையின் இணைய வழி குற்றப் பிரிவானது இந்தியா-பாகிஸ்தான் மோதல் தொடர்பாக வாட்ஸ்அப், மின்னஞ்சல் மற்றும் சமூக வலைதளங்கள் மூலம் விரைவாக பரப்பப்படும் தீங்கிழைக்கும் உள்ளடக்கங்களின் சமீபத்திய அதிகரிப்பு குறித்து பொதுமக்களை எச்சரிக்கிறது.

இந்த உள்ளடக்கத்தில் தவறாக வழிநடத்தும் வீடியோக்கள் மற்றும் படங்கள், '.exe/.apk' போன்ற இணைப்புகள் மற்றும் இந்தியா-பாகிஸ்தான் மோதல் தொடர்பான செய்திகள் பெரும்பான்மையாக போலியான செய்திகளாக மட்டுமல்லாமல் தீங்கிழைக்கும் செயலிகளாகவும் உள்ளன.

அச்சுறுத்தல் செய்பவர்கள் தற்போது உள்ள பதற்றத்தைப் பயன்படுத்தி மால்வேர் போன்றவற்றை போலி செய்திகள் மூலம் பரப்புகின்றனர். இந்த சைபர் குற்றவாளிகள் பிரத்யேக புதுப்பிப்புகள், மோதல் தொடர்பான காட்சிகள் அல்லது வெளியான போர் காட்சிகள் என்ற சாக்குப் போக்கில் தீங்கிழைக்கும் உள்ளடக்கத்தை பரப்புகின்றனர். இதில் பல தீம்பொருள், உளவு மென்பொருள் அல்லது ஃபிஷிங் வலைத்தளங்களுக்கான இணைப்புகள் இருக்கும். இந்த இணைப்புகள் அல்லது புகைப்படங்கள் அறியப்படாத எண்களிலிருந்தும் அல்லது வாட்ஸ்அப்/டெலிகிராம்/பிற சமூக வலைப்பின்னல்களின் குழுக்களிலும் அனுப்பப்படலாம்.

சைபர் தாக்குதல்கள் எப்படி நிகழ்கின்றன?

தீங்கிழைக்கும் .apk கோப்பு, .exe கோப்பு மற்றும் வாட்ஸ்அப்/மின்னஞ்சல்கள்/பிற சமூக ஊடக தளங்களில் பகிரப்படும் வீடியோ கோப்புகள்/இணைப்புகள் பின்வருமாறு பயன்படுத்தப்படுகின்றன:

* 'டான்ஸ் ஆஃப் தி ஹிலாரி', "ஆர்மி_ஜாப்_அப்ளிகேஷன்_ஃபார்ம்.பி.டி.எஃப்" மற்றும் 'tasksche.exe' என்ற இயங்கக்கூடிய கோப்பு என தலைப்புகள் கொண்ட வீடியோக்கள் அல்லது படங்களாக தீம்பொருளை மறைத்து பகிர்கின்றனர்.

* செய்தி அல்லது முறையான அரசாங்கங்கவலைத்தளங்கள் போல தோன்றும் வகையில் வடிவமைக்கப்பட்ட ஃபிஷிங் லிங்க் மூலம் தனிப்பட்ட தரவைத் திருட அனுப்பப்படுகின்றன.

* APK (Android Package) கோப்புகளைப் பரப்புதல், செயலிகள் அல்லது கருவிகள் (எ.கா., "நேரடி போர் புதுப்பிப்புகள் பயன்பாடு") என்ற பெயரில் தரவைத் திருடுவது, அல்லது ரான்சம்வேர் மூலம் தொலைபேசிகளைப் கட்டுபடுத்துவதன் மூலம் பணம் கோருகின்றனர்.

இந்த தீங்கிழைக்கும் இணைப்புகள்/படங்கள்/files.exe/. apk ஐ நீங்கள் பதிவிறக்கியவுடன், உங்களது கைபேசி/கணினி மோசடிகாரர்களின் வசம் செல்வதுடன் வங்கிக் கணக்குகள் அல்லது சமூக வலைப்பின்னல்களின் கணக்குகளை ஹேக் செய்தல் போன்றவை நிகழலாம்.

வாட்ஸ்அப் மற்றும் சமூக ஊடகங்களுக்கு :

* நீங்கள் நம்பும் நபர்களிடம் இருந்து வீடியோ பதிவுகள் அல்லது படத்தின் கோப்புகள் வந்தால் கூட ஒருபோதும் திறக்க வேண்டாம்.

* இந்த செய்திகளை யாரிடமும் அல்லது எந்த குழுவிற்கும் ஒருபோதும் அனுப்ப வேண்டாம்.

* எந்தவொரு செய்தி பரிமாறும் தளம் மூலம் பகிறப்படும் APK கோப்புகளை பதிவிறக்கம் செய்ய வேண்டாம். கூகுள் பிளே ஸ்டோர் அல்லது அதிகாரப்பூர்வ பயன்பாடுகளிலிருந்து மட்டுமே செயலிகளை பதிவிறக்கவும்.

* முரண்பாடான புதுப்பிப்புகள் அல்லது முக்கியமான காட்சிகளைக் காண்பிப்பதாகக் கூறி பகிரப்பட்ட இணைப்புகளைக் கிளிக் செய்ய வேண்டாம்.

* போலியான தகவல் மற்றும் சந்தேகத்திற்கு இடமான தகவல்களை பகிரும் வாட்ஸ்அப் குழுக்களில் இருந்து உடனடியாக விலகுவது மட்டுமல்லாமல் அதனை புகார் செய்திட வேண்டும்,

மக்களே உஷார்... இந்தியா - பாகிஸ்தான் செய்திகள் போல போலி இணைப்புகள் : எச்சரிக்கும் Cyber Crime - பின்னணி?
=> வாட்ஸ்அப்பில் மேம்பட்ட பாதுகாப்பு :

* உங்களது வாட்ஸ்அப் கணக்கு ஹேக் செய்யப்படுவதைத் தவிர்க்க வாட்ஸ்அப் கணக்கின் உள்ளமைவில் இரண்டு படிசரிபார்ப்பை செயல்படுத்தவும்.(2 Step Verification)

* குழுவின் தீங்கிழைக்கும் செய்தி அல்லது சந்தேகத்திற்கு இடமான செயல்பாட்டை நேரடியாக வாட்ஸ்அப்பிற்கு தெரிவிக்கவும் அல்லது சைபர் க்ரைம் இல் புகார் அளிக்கவும்.

* யாருடனும் OTPயை பகிர வேண்டாம்.

மின்னஞ்சல் பயனர்களுக்கு:

* தெரியாத மின் அஞ்சல் மூலமாக பெறப்படும் மின்னஞ்சல்களில் இணைக்கப்பட்ட கோப்புகளைப் பதிவிறக்குவது அல்லது இணைப்புகளைக் கிளிக் செய்வதைத் தவிர்க்கவும்.

* மின்னஞ்சல் முகவரியை கவனமாக சரிபார்க்கவும். .ஃபிஷிங் மின்னஞ்சல்கள் பெரும்பாலும் முறையான நிறுவனங்களை போன்று காட்சி அள்ளிக்கபடுவதன் மூலம் ஏமாற்றுகின்றனர்.

* அனைத்து கணக்குகளிலும் இரண்டு காரணி அங்கீகாரத்தை (2 Factor Authentication) இயக்கவும்.

* புதுப்பிக்கப்பட்ட வைரஸ் தடுப்பு மென்பொருளைப் பயன்படுத்தவும் மற்றும் ஸ்பேம் பில்டர் செயல்படுத்தவும்.

பொதுவான இணைய சுகாதாரம்:

* இந்திய-பாகிஸ்தான் மோதல் குறித்த செய்திகளை பின்தொடர, செய்தி ஊடங்கங்கள் மற்றும் சரிபார்க்கப்பட்ட சமூக வலைப்பின்னல்களின் கணக்குகளைப் பின்பற்றவும்.

* தவறான செய்திகளை அனுப்புவதையோ பதிவிறக்குவதையோ தவிர்க்க உண்மை சரிபார்ப்பு தளங்களை பயன்படுத்தலாம்.

* இந்தியாவிற்கும் பாகிஸ்தானுக்கும் இடையிலான மோதல்கள் குறித்த முக்கியமான அல்லது பிரத்யேக செய்திகளைக் காட்டுவதாகக் கூறும் செய்திகள் அல்லது வெளியீடுகளை சரிபார்க்கவும்.

* வாட்ஸ்அப், மின்னஞ்சல் அல்லது சமூக வலைப்பின்னல்கள் மூலம் பெறப்பட்ட சந்தேகத்திற்கிடமான வீடியோக்கள், படங்கள் அல்லது இணைப்புகளை திறந்து பார்க்க வேண்டாம்.

* சரிபார்ப்பு இல்லாமல் சமூக வலைப்பின்னல்கள் மூலம் பகிரப்பட்ட இணைப்புகளைப் பதிவிறக்கவோ அல்லது கிளிக் செய்யவோ வேண்டாம்.

* உங்கள் வைரஸ் தடுப்பு மற்றும் மொபைல் பாதுகாப்பு மென்பொருளை தவறாமல் புதுப்பிக்கவும்.

* குறிப்பாக முக்கியமான புவிசார் அரசியல் நிகழ்வுகளின் போது, சரிபார்க்க படாத தகவல்களை பகிர்வதைத் தவிர்க்கவும்.

* அரசின் அதிகாரப்பூர்வ வலைத்தளங்கள் மற்றும் அதிகாரப்பூர்வ கணக்குகள் மூலம் தகவல்களை சரிபார்க்கவும்.

புகார் அளிக்க :

நீங்கள் ஏதேனும் சைபர் குற்றத்தால் பாதிக்கப்பட்டுள்ளீர்கள் என்று நீங்கள் சந்தேகித்தால் அல்லது ஏதேனும் சந்தேகத்திற்கிடமான செயல்பாட்டைக் கண்டறிந்தால், உடனடியாக நடவடிக்கை எடுப்பது முக்கியம். நிதி மோசடிகள் ஏற்பட்டால் சைபர் கிரைம் உதவி எண் 1930ஐ டயல் செய்யவும் அல்லது www.cybercrime.gov.in இல் புகார் அளிக்கவும்.

English summary

Tamil Nadu Police warns of rising cyber threats amid India-Pakistan tensions, cautioning the public against malware, phishing links, and fake news spreading via social media.