இஃப்தார் தந்த விஜய்.. முஸ்லிம்களை அவதூறாக பேசிய திமுக சிவாஜி கிருஷ்ணமூர்த்தி! தவ்ஹீத் ஜமாத் வார்னிங்
சென்னை: நடிகரும், தமிழக வெற்றிக் கழகத்தின் தலைவருமான நடிகர் விஜய் சமீபத்தில் இஸ்லாமியர்களுக்கு இஃப்தார் விருந்து அளித்தார். இதுபற்றி திமுக பேச்சாளர் சிவாஜி கிருஷ்ணமூர்த்தி மேடையில் பேசியபோது இஸ்லாமியர்களை தரக்குறைவாக விமர்சனம் செய்தார். இந்நிலையில் தான் சிவாஜி கிருஷ்ணமூர்த்திக்கு இந்திய தவ்ஹீத் ஜமாஅத் கடும் கண்டனம் தெரிவித்துள்ளதோடு, அவர் மீது திமுக ஒழுங்கு நடவடிக்கை எடுக்க வேண்டும் என்று வலியுறுத்தி உள்ளது.
இஸ்லாமியர்களின் புனித பண்டிகையாக ரம்ஜான் உள்ளது. இந்த பண்டிகை அடுத்த மாதம் கொண்டாடப்பட உள்ளது. பண்டிகைக்கு முன்பாக இஸ்லாமியர்கள் வழக்கம்போல் நோன்பு கடைப்பிடித்து வருகின்றனர்.
இந்த நோன்பு காலத்தில் இஸ்லாமியர்களுக்கு இஃப்தார் விருந்து என்பது அரசியல் கட்சிகளால் வழங்கப்பட்டு வருகிறது. அந்த வகையில் சில நாட்களுக்கு முன்பு தமிழக வெற்றிக் கழகம் சார்பில் இஸ்லாமியர்களுக்கு இஃப்தார் விருந்து வழங்கப்பட்டது.
இதில் நடிகர் விஜயும் பங்கேற்றார். இஸ்லாமியர்களுடன் சேர்ந்து தொழுகையில் ஈடுபட்ட அவர் அதன்பிறகு அனைவருடன் சேர்ந்து இஃப்தார் விருந்தை சாப்பிட்டார். இந்நிலையில் தான் விஜய் வழங்கிய இஃப்தார் விருந்தில் பங்கேற்ற இஸ்லாமியர்களை திமுகவின் பேச்சாளர் சிவாஜி கிருஷ்ண மூர்த்தி மிகவும் தரக்குறைவாக விமர்சனம் செய்தார்.
அதாவது சென்னை வண்ணாரப்பேட்டை போஜராஜன் நகரில் தமிழக முதல்வர் முக ஸ்டாலின் 72 வது பிறந்தநாள் மற்றும் நலத்திட்ட உதவிகள் வழங்கும் நிகழ்ச்சி நடைபெற்றது. இதில் திமுக பேச்சாளர் சிவாஜி கிருஷ்ணமூர்த்தி நடிகர் விஜயை காட்டமாக விமர்சனம் செய்தார். அதேபோல் விஜயின் இஃப்தார் விருந்தில் பங்கேற்ற இஸ்லாமியர்களை தரக்குறைவாக பேசினார். இதுதொடர்பான வீடியோ வெளியான நிலையில் சர்ச்சையானது.
சிவாஜி கிருஷ்ணமூர்த்தி மீது நடவடிக்கை எடுக்க வண்ணாரப்பேட்டை காவல் நிலையத்தில் புகார் அளிக்கப்பட்டுள்ளது. இப்படியான சூழலில் தான் இந்திய தவ்ஹீத் ஜமாஅத் சார்பில் சிவாஜி கிருஷ்ணமூர்த்திக்கு கடும் கண்டனம் தெரிவிக்கப்பட்டுள்ளது. அதோடு அவர் மீது நடவடிக்கை எடுக்க வேண்டும் என்று திமுகவுக்கு வலியுறுத்தப்பட்டுள்ளது.
இதுதொடர்பாக இந்திய தவ்ஹீத் ஜமாஅத் பொதுச்செயலாளர் முஹம்மது ஷிப்லி வெளியிட்ட செய்தியில், ‛‛சமீபத்தில் திமுக பேச்சாளர் சிவாஜி கிருஷ்ணமூர்த்தி பொது மேடையில் நடிகர் விஜய் நடத்திய இஃப்தார் நிகழ்ச்சியில் கலந்து கொண்ட இஸ்லாமியர்கள் குறித்து பேசும் போது நாகரீகமற்ற முறையில் பேசியது சமூக வலைத்தளங்களில் பரவி வருகிறது அவரின் பேச்சு வன்மையாக கண்டிக்கத்தக்கது. இவரின் மீது திமுக ஒழுங்கு நடவடிக்கை எடுக்க வேண்டும். சிவாஜி கிருஷ்ணமூர்த்தி போன்ற தரங்கெட்ட பேச்சாளர்களால் திமுகவிற்கு நன்மைக்கு பதிலாக தீமையே விளையும் என்பதை எச்சரிக்கிறோம்'' என்று கூறியுள்ளார்.
Click it and Unblock the Notifications
Sign in with Google