முக்கிய போலீஸ் அதிகாரிகள் அதிரடி டிரான்ஸ்பர்.. உளவுத்துறை ஏடிஜிபி தேவாசீர்வாதத்திற்கு டம்மி பதவி!

Updated: Tuesday, June 27, 2023, 21:25 [IST]

Subscribe to Oneindia Tamil

சென்னை: உளவுத்துறை ஏடிஜிபி உள்பட 3 ஐபிஎஸ் அதிகாரிகள் அதிரடியாக பணி இடமாற்றம் செய்யப்பட்டுள்ளனர். தமிழ்நாடு அரசின் முதன்மை செயலர் அமுதா ஐஏஎஸ் இதற்கான உத்தரவை பிறப்பித்துள்ளார்.

தமிழ்நாடு காவல்துறையில் முக்கியமான ஐபிஎஸ் அதிகாரிகள் இன்று அதிரடியாக டிரான்ஸ்பர் செய்யப்பட்டுள்ளனர். ஐபிஎஸ் அதிகாரிகள் இடமாற்றம் தொடர்பாக முதலமைச்சர் மு.க.ஸ்டாலின் கடந்த சில நாட்களாக தீவிர ஆலோசனை மேற்கொண்டு வந்தார்.

Intelligence ADGP Davidson Devasirvatham transferred: tn government action

இந்நிலையில், இன்று பணியிட மாறுதல் லிஸ்ட்டுக்கு முதல்வர் ஸ்டாலின் ஒப்புதல் வழங்கியுள்ளார். இதனை தமிழக அரசின் உள்துறை செயலர் அமுதா ஐஏஎஸ் இன்று வெளியிட்டுள்ளார்.

அதன்படி, உளவுத்துறை ஏடிஜிபி டேவிட்சன் தேவாசீர்வாதம் சென்னை காவல்துறை தலைமையக ஏடிஜிபியாக மாற்றம் செய்யப்பட்டுள்ளார். இந்த பதவியை ஏற்கனவே பாலநாக தேவி கூடுதல் பொறுப்பாக வைத்திருந்தார்.

சென்னை ஆவடி போலீஸ் கமிஷனர் அருண், சென்னை சட்டம் ஒழுங்கு ஏடிஜிபியாக மாற்றப்பட்டுள்ளார். சட்டம் ஒழுங்கு ஏடிஜிபி சங்கர், சென்னை ஆவடி போலீஸ் கமிஷனராக இடமாற்றம் செய்யப்பட்டுள்ளார்.

உளவுத்துறை ஏடிஜிபி டேவிட்சன் தேவாசீர்வாதம் இடமாற்றம் செய்யப்பட்டிருப்பதால் அவர் கவனித்து வந்த பொறுப்புகள் உளவுத்துறை ஐஜி செந்தில் வேலனிடம் கூடுதலாக ஒப்படைக்கப்பட்டுள்ளது.

கடந்த பல மாதங்களாக சில சம்பவங்களில் உளவுத்துறையின் செயல்பாடு கடுமையாக விமர்சிக்கப்பட்டு வந்த நிலையில் உளவுத்துறை ஏடிஜிபி டேவிட்சன் தேவாசீர்வாதம் மாற்றப்பட்டுள்ளது குறிப்பிடத்தக்கது.